Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Ezekiel 39:1-29

EMENYAWO ƑE TOTOƉEME

  • Gog kple eƒe amewo tsɔtsrɔ̃ (1-10)

  • Ameɖiɖi le Hamon-Gog Bali la me (11-20)

  • Israel gbugbɔgaɖoanyi (21-29)

    • Mawu ƒe gbɔgbɔa kɔkɔ ɖe Israel dzi (29)

39  “Amegbetɔvi, gblɔ nya ɖi ɖe Gog+ ŋu, eye nàgblɔ nɛ be, ‘Ale Aƒetɔ Dziɖulagã Yehowa gblɔe nye esi: “Oo Gog, metso ɖe ŋuwò, wò, Mesek kple Tubal-megãwo+ ƒe tatɔ.*  Mana nàtrɔ, makplɔ wò, mana nàho tso keke dziehe+ ke ahakplɔ wò ava Israel towo dzi.  Maƒo wò dati si le miasi me na wò la wòage, eye mana wò aŋutrɔwo nage le ɖusi na wò.  Àdze anyi ɖe Israel towo dzi,+ wò kple wò aʋakɔ blibo la kpakple dukɔ siwo le ŋuwò la. Matsɔ wò ana xe ƒonu ɖe sia ɖe ƒomevi kple gbemelãwo woaɖu.”’+  “‘Àdze anyi ɖe gbe me,+ elabena nyee ƒo nu,’ Aƒetɔ Dziɖulagã Yehowa ye gblɔe.  “‘Maɖo dzo ɖe Magog kple ame siwo ɖe dzi ɖi bɔkɔɔ le ƒukpowo dzi la,+ ne woadze sii be, nyee nye Yehowa.  Mana woanya nye ŋkɔ kɔkɔe la le nye dukɔ Israel dome, eye nyemagaɖe mɔ woaƒo ɖi nye ŋkɔ kɔkɔe la azɔ o; ne dukɔwo nadze sii be nye, Yehowa,+ ye nye Kɔkɔetɔ le Israel.’+  “‘Kpɔ ɖa! Egbɔna, eye wòle eme va ge,’ Aƒetɔ Dziɖulagã Yehowa ye gblɔe. ‘Esiae nye ŋkeke si ŋu meƒo nu le.  Ame siwo le Israel ƒe duwo me la ayi aɖafɔ aʋawɔnuwo atsɔ ado dzoe—akpoxɔnu suewo kple gãwo, da kple dati, kpowo* kple akplɔwo. Eye woatsɔ wo ado dzoe+ ƒe adre sɔŋ. 10  Mahiã be woatsɔ nake tso gbe me alo afɔ nake le avewo me hã o, elabena aʋawɔnuwoe woatsɔ ado dzoe.’ “‘Woalɔ ame siwo lɔa woƒe nuwo tsã la ƒe nunɔamesiwo, eye woaha ame siwo haa wo tsã la,’ Aƒetɔ Dziɖulagã Yehowa ye gblɔe. 11  “‘Gbe ma gbe la, mana ɖiƒe Gog+ le Israel, ɖe mɔzɔlawo ƒe bali si le atsiaƒua ƒe ɣedzeƒe gome la me, ne wòaxe mɔ na ame siwo toa afi ma yina. Afi mae woaɖi Gog kple eƒe ameha blibo la ɖo, eye woayɔe be Hamon-Gog Bali.*+ 12  Israel ƒe aƒe la atsɔ ɣleti adre sɔŋ aɖi woe, be woana anyigba la ŋu nakɔ.+ 13  Anyigba la dzi tɔwo katãe aɖi wo, eye esia ana woƒe ŋkɔ nade du le gbe si gbe mado kɔkɔ ɖokuinye,’+ Aƒetɔ Dziɖulagã Yehowa ye gblɔe. 14  “‘Woaɖe amewo woanɔ tsatsam le anyigba la dzi ɣesiaɣi be woanɔ ame kuku siwo gakpɔtɔ ɖe anyigbaa dzi la ɖim, be anyigbaa ŋu nakɔ. Woadi wo ɣleti adre sɔŋ. 15  Ne ame siwo le tsatsam le anyigba la dzi ke ɖe ameƒu aɖe ŋu la, woatu dzesi ɖe egbɔ. Eye ameɖilawo aɖii ɖe Hamon-Gog Bali la me.+ 16  Du aɖe anɔ afi ma si woayɔ be Hamona.* Eye woakɔ anyigba la ŋu.’+ 17  “Ke wò, amegbetɔvi, ale Aƒetɔ Dziɖulagã Yehowa gblɔe nye esi: ‘Gblɔ na xe ɖe sia ɖe ƒomevi kple gbemelãwo katã be, “Milɔ hoo miava. Miva ƒo ƒu ɖe nye vɔsa si mele dzadzram ɖo na mi la gbɔ, vɔsa gãe wòanye le Israel towo dzi.+ Miaɖu lã ano ʋu.+ 18  Miaɖu kalẽtɔwo ƒe lã, eye miano amegã siwo le anyigba dzi ƒe ʋu—agbowo, alẽwo, gbɔ̃wo kple nyitsuwo—wo katã wonye lã damiwo tso Basan. 19  Miaɖu nye vɔsalã si medzra ɖo na mi la ƒe ami aɖi ƒo, eye miano eƒe ʋu kakaka amu.”’ 20  “‘Matsɔ sɔwo kple sɔdolawo, kalẽtɔwo kple aʋawɔla vovovoawo katã aɖo kplɔ̃e na mi miaɖu aɖi ƒo,’+ Aƒetɔ Dziɖulagã Yehowa ye gblɔe. 21  “‘Maɖe nye ŋutikɔkɔe afia le dukɔwo dome, eye dukɔwo katã akpɔ ʋɔnu si medrɔ̃, kple nye ŋusẽ* si meɖe fia le wo dome la.+ 22  Tso gbe ma gbe la, Israel ƒe aƒe la adze sii be, nyee nye Yehowa woƒe Mawu. 23  Eye dukɔwo adze sii be, Israel ƒe aƒe la ƒe vodada tae woyi aboyo me ɖo, elabena womewɔ nuteƒe nam o.+ Eya ta meɣla nye ŋkume ɖe wo,+ eye metsɔ wo de asi na woƒe futɔwo, ale be wo katã wotsi yi nu.+ 24  Woƒe nu makɔmakɔ wɔwɔwo kple woƒe dzidadawo nue mewɔ nu ɖe wo ŋu ɖo, eye meɣla nye ŋkume ɖe wo.’ 25  “Eya ta ale Aƒetɔ Dziɖulagã Yehowa gblɔe nye esi: ‘Makplɔ Yakob ƒe aboyomewo agbɔe,+ eye makpɔ nublanui na Israel ƒe aƒe blibo la;+ eye maʋli nye ŋkɔ kɔkɔe la ta vevie.+ 26  Ne wobɔbɔ wo ɖe anyi le woƒe nuteƒemawɔmawɔ ɖe ŋunye ta vɔ megbe la,+ woanɔ woƒe anyigba dzi dedie, eye ame aɖeke mado voɖi na wo o.+ 27  Ne mekplɔ wo tso dukɔwo dome gbɔe, eye meƒo wo nu ƒu tso woƒe futɔwo ƒe anyigba dzi la,+ ekema makɔ ɖokuinye ŋu le wo dome le dukɔ geɖewo ŋkume.’+ 28  Ne mena woɖe aboyo wo yi dukɔwo me, eye megakplɔ wo katã gbɔe va woawo ŋutɔ ƒe anyigba dzi, eye nyemegblẽ wo dometɔ aɖeke ɖe afi ma o la, ekema woadze sii be, nyee nye Yehowa woƒe Mawu.+ 29  Nyemagaɣla nye ŋkume ɖe Israel ƒe aƒe la azɔ o,+ elabena matrɔ nye gbɔgbɔ akɔ ɖe wo dzi,’+ Aƒetɔ Dziɖulagã Yehowa ye gblɔe.”

Etenuŋɔŋlɔ

Alo, “amegã.”
Efia, kpo si nu ga tsutsuẽ le.
Alo, “Gog Ƒe Amehawo Ƒe Bali.”
Egɔmee nye, “Amehawo.”
Egɔmeɖeɖe tẽe, “alɔ.”