Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Ezekiel 36:1-38

EMENYAWO ƑE TOTOƉEME

  • Nya ɖe Israel towo ŋu (1-15)

  • Israel gbugbɔgaɖoanyi (16-38)

    • ‘Makɔ nye ŋkɔ gã la ŋu’ (23)

    • “Abe Eden-bɔ ene” (35)

36  “Amegbetɔvi, gblɔ nya ɖi ɖe Israel towo ŋu be: ‘Oo, Israel ƒe towo, mise Yehowa ƒe nya.  Ale Aƒetɔ Dziɖulagã Yehowa gblɔe nye esi: “Futɔ la gblɔ le mia ŋu be, ‘Ehɛ̃! Togbɛ siwo li tso blema ke la zu mía tɔ!’”’+  “Eya ta gblɔ nya ɖi be, ‘Ale Aƒetɔ Dziɖulagã Yehowa gblɔe nye esi: “Esi wowɔ mi aƒedoe hedze mia dzi le goawo katã me be miazu dukɔ susɔeawo tɔ, eye amewo le nu ƒom le mia ŋu hele aɖeɖi ƒom mi ta la,+  eya ta Oo, Israel towo, mise Aƒetɔ Dziɖulagã Yehowa ƒe nya! Ale Aƒetɔ Dziɖulagã Yehowa gblɔ na towo kple togbɛwo, tɔʋuwo kple baliwo, na du gbagbã siwo zu aƒedo,+ kple du ƒuƒlu siwo zu nuhaha kple alɔmeɖenu na dukɔ siwo ƒo xlã wo godoo la me tɔ susɔewoe nye esi;+  Aƒetɔ Dziɖulagã Yehowa be: ‘Nye ŋuʋaʋã+ ƒe dzobibi mee maƒo nu atsi tre ɖe dukɔ susɔeawo kple Edom blibo la ŋu le, wo ame siwo le aseye tsom hele alɔme ɖem*+ be nye anyigba la zu yewo tɔ, eƒe lãnyiƒe su yewo si eye wòzu nuhaha na yewo.’”’+  “Eya ta gblɔ nya ɖi ɖe Israel-nyigba ŋu, eye nàgblɔ na towo kple togbɛwo, tɔʋuwo kple baliwo be, ‘Ale Aƒetɔ Dziɖulagã Yehowa gblɔe nye esi: “Kpɔ ɖa, maƒo nu le nye ŋuʋaʋã kple nye dziku me, elabena miekpe fu le dukɔwo ƒe vlodoame ta.”’+  “Eya ta ale Aƒetɔ Dziɖulagã Yehowa gblɔe nye esi: ‘Mekɔ nye asi dzi ka atam be dukɔ siwo ƒo xlã mi la ŋutɔwoe aɖu ŋukpe.+  Ke mi Israel towo ya, miaɖe alɔ nyuie ahatse ku na nye dukɔ Israel,+ elabena woƒe gbɔgbɔɣi tu aƒe.  Elabena meli kpli mi, matrɔ ɖe mia ŋu, eye woade agble ahaƒã nu ɖe mia dzi. 10  Mana wò amewo nasɔ gbɔ ɖe edzi, Israel ƒe aƒe blibo la katã asɔ gbɔ; mana amewo nanɔ duawo me,+ eye woagbugbɔ gli gbagbãwo aɖo.+ 11  Ɛ̃, mana amegbetɔwo kple lãhawo+ nasɔ gbɔ ɖe mia dzi; woasɔ gbɔ, eye woadzi ɖe edzi; mana amewo nanɔ mia dzi abe tsã ene,+ eye mana eme nanyo na mi wu tsã;+ ne miadze sii be, nyee nye Yehowa.+ 12  Mana amewo, ɛ̃, nye dukɔ Israel, nazɔ mia dzi, eye woaxɔ mi miazu wo tɔ.+ Miazu woƒe domenyinu, eye miagawɔ wo vimanɔsitɔwo azɔ gbeɖe o.’”+ 13  “Ale Aƒetɔ Dziɖulagã Yehowa gblɔe nye esi: ‘Esi wole gbɔgblɔm na mi be, “Ènye anyigba si ɖua amelã eye nèwua wò dukɔmeviwo” la,’ 14  ‘eya ta màgaɖu amelã azɔ o, eye màgawu wò dukɔmeviwo azɔ o,’ Aƒetɔ Dziɖulagã Yehowa ye gblɔe. 15  ‘Nyemagana dukɔwo nagblɔ gbɔɖiamenyawo ɖe ŋuwò loo alo ana amewo nado ŋukpe wò azɔ o,+ eye wò hã màgana wò dukɔ la nadze anyi azɔ o,’ Aƒetɔ Dziɖulagã Yehowa ye gblɔe.” 16  Eye Yehowa ƒe gbe gava nam be: 17  “Amegbetɔvi, esi Israel ƒe aƒe la nɔ woƒe anyigba dzi la, wotsɔ woƒe zɔzɔme kple woƒe nuwɔnawo ƒo ɖii.+ Woƒe zɔzɔme le abe asiɖoanyiɣi ƒe makɔmakɔnyenye ene le ŋkunyeme.+ 18  Eye metrɔ nye dziku ƒo ɖe wo dzi le ʋu si wokɔ ɖe anyigbaa dzi la ta,+ le esi wotsɔ woƒe legba nyɔŋuwo* gblẽ kɔ ɖo na anyigba la ta.+ 19  Eya ta mekaka wo ɖe dukɔwo dome eye meka wo hlẽ ɖe anyigbawo dzi.+ Woƒe zɔzɔme kple woƒe nuwɔnawo nue medrɔ̃ ʋɔnu wo ɖo. 20  Ke esi wova ɖo dukɔwo dome la, amewo ƒo ɖi nye ŋkɔ kɔkɔe la+ esi wogblɔ le wo ŋu be: ‘Yehowa ƒe amewoe ame siawo nye, gake eva hiã be woaʋu adzo le eƒe anyigba dzi.’ 21  Le esia ta matsi dzi ɖe nye ŋkɔ kɔkɔe si Israel-viwo ƒo ɖii le dukɔ siwo me woyi la ŋu.”+ 22  “Eya ta gblɔ na Israel ƒe aƒe la be, ‘Ale Aƒetɔ Dziɖulagã Yehowa gblɔe nye esi: “Oo Israel ƒe aƒe, menye miawo tae mele ewɔm ɖo o, ke boŋ nye ŋkɔ kɔkɔe, si mieƒo ɖii le dukɔ siwo me mieyi la tae.”’+ 23  ‘Makɔ nye ŋkɔ gã+ si mieƒo ɖii le dukɔwo dome, ɛ̃, ŋkɔ si miawo mieƒo ɖii le wo dome la ŋuti; eye ne mekɔ ɖokuinye ŋu le mia dome le wo ŋkume la, ekema dukɔwo adze sii be nyee nye Yehowa,’+ Aƒetɔ Dziɖulagã Yehowa ye gblɔe. 24  ‘Makplɔ mi tso dukɔwo dome, eye maƒo mia nu ƒu tso anyigbawo katã dzi ahakplɔ mi ava miaƒe anyigba dzi.+ 25  Mahlẽ tsi dzadzɛ ɖe mia ŋu, ne mia ŋu nakɔ;+ makɔ mia ŋu tso miaƒe nuwɔna makɔmakɔwo+ katã kple miaƒe legba nyɔŋuwo katã me.+ 26  Mana dzi yeye mi,+ eye made gbɔgbɔ yeye mia me.+ Maɖe kpedzi la le mia me,+ eye mana lãkusidzi* mi. 27  Made nye gbɔgbɔ mia me, mana miazɔ ɖe nye sewo nu,+ eye miawɔ nye ʋɔnudrɔ̃ɖoɖowo dzi ahalé wo me ɖe asi. 28  Ekema mianɔ anyigba si metsɔ na mia tɔgbuiwo la dzi, mianye nye dukɔ, eye manye mia Mawu.’+ 29  “‘Maɖe mi tso miaƒe nuwɔna makɔmakɔwo katã me, mana nuku nado, mana wòabɔ, eye nyemagana dɔ nawu mi azɔ o.+ 30  Mana atikutsetse kple agblemenukuwo nabɔ, ale be miagaɖu ŋukpe le dukɔwo dome le dɔwuame ta azɔ o.+ 31  Ekema miaɖo ŋku miaƒe mɔ vɔ̃wo kple miaƒe nuwɔna gbegblẽwo dzi, eye miaƒe nu anyɔ ŋu na miawo ŋutɔwo le miaƒe vodadawo kple miaƒe nuwɔna nyɔŋuwo ta.+ 32  Gake esia nenɔ nyanya na mi be, menye miawo tae mele ewɔm ɖo o,’+ Aƒetɔ Dziɖulagã Yehowa ye gblɔe. ‘Oo, Israel ƒe aƒe, ŋu nekpe mi, eye miade mo to le miaƒe zɔzɔme ta.’ 33  “Ale Aƒetɔ Dziɖulagã Yehowa gblɔe nye esi: ‘Gbe si gbe makɔ mia ŋu tso miaƒe vodadawo katã me la, mana ame nanɔ duawo me,+ eye woagbugbɔ du gbagbãwo atso.+ 34  Woagade agble ɖe anyigba si zu gbegbe le ame siwo katã tsoa eme va yina ŋkume la dzi ake. 35  Eye amewo agblɔ be, “Anyigba si nye gbegbe tsã la, zu abe Eden bɔ ene,+ eye du siwo wotsrɔ̃, siwo zu aƒedo, eye wogbã wo ƒu anyi tsã la, zu du sesẽwo kple amenɔƒewo.”+ 36  Eye dukɔ siwo susɔ, siwo ƒo xlã mi godoo la adze sii be nye, Yehowa, ŋutɔe gbugbɔ tu nu siwo wogbã ƒu anyi la, eye mede agble ɖe anyigba si nye gbegbe la dzi. Nye, Yehowa, ŋutɔe ƒo nu, eye mewɔ edzi hã.’+ 37  “Ale Aƒetɔ Dziɖulagã Yehowa gblɔe nye esi: ‘Nu si magana Israel ƒe aƒe la nadi be mawɔ na yewo lae nye esi: Mana woƒe amewo nasɔ gbɔ kpaŋkpaŋ abe alẽha ene. 38  Ale si ame kɔkɔewo ƒe ha gã la nɔna, ale si Yerusalem ƒe lãha nɔna* le eƒe ŋkekenyuiɖuɣiwo la,+ nenemae amewo ade hae le du siwo zu aƒedo tsã la me;+ ne woadze sii be, nyee nye Yehowa.’”

Etenuŋɔŋlɔ

Alo, “le woƒe luʋɔ me.”
Ðewohĩ Hebrigbe me nya si wozã le afi sia la do ƒome kple nya si wozãna na “mĩ” eye wozãnɛ na nu si nyɔa ŋu.
Efia, dzi si trɔna ɖe Mawu ƒe mɔfiamewo ŋu.
Agate ŋu afia, “Ale si vɔsalẽwo sɔa gbɔe le Yerusalem.”