Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Ezekiel 33:1-33

EMENYAWO ƑE TOTOƉEME

  • Gbetakpɔla ƒe agbanɔamedziwo (1-20)

  • Yerusalem tsɔtsrɔ̃ ŋu nya (21, 22)

  • Gbedeasi na Yerusalem du zuaƒedo la (23-29)

  • Ameawo mawɔ nyawo dzi o (30-33)

    • Ezekiel “le abe lɔlɔ̃ha” ene (32)

    • “Nyagblɔɖila aɖe nɔ yewo dome kpɔ” (33)

33  Yehowa ƒe gbe va nam be:  “Amegbetɔvi, ƒo nu kple mia deviwo+ nàgblɔ na wo be:“‘Ne mena wotsɔ yi ɖe anyigba aɖe ŋu,+ eye anyigba la dzi nɔlawo katã tia wo dometɔ ɖeka tsɔ ɖo gbetakpɔlae,  eye gbetakpɔla la kpɔ yi gbɔna anyigba la dzi, eye wòku kpẽ tsɔ xlɔ̃ nu dukɔ la,+  eye ame aɖe se kpẽa ƒe ɖiɖi, gake mewɔ ɖe nuxlɔ̃amea dzi o,+ eye yi va ɖe eƒe agbe ɖa la, ekema eƒe ʋu anɔ eya ŋutɔ ƒe ta dzi.+  Elabena ese kpẽa ƒe ɖiɖi, gake mewɔ ɖe nuxlɔ̃amea dzi o. Eƒe ʋu anɔ eya ŋutɔ dzi. Ne ɖe wòɖo to nuxlɔ̃amea la, anye ne exɔ eɖokui* ɖe agbe.  “‘Ke ne gbetakpɔla la kpɔ yi gbɔna, gake meku kpẽ+ tsɔ xlɔ̃ nu dukɔ la o, eye yi va tsrɔ̃ ame* aɖe ɖa le wo dome la, ekema eya ŋutɔ ƒe vodada tae wòku ɖo, ke mabia eƒe ʋu tso gbetakpɔla la si me.’+  “Amegbetɔvi, metsɔ wò ɖo gbetakpɔla na Israel ƒe aƒe la be, ne èse nya tso nunye la, nàtsɔ nye nyawo axlɔ̃ nu wo.+  Ne megblɔ na ame vɔ̃ɖi be, ‘Ame vɔ̃ɖi, ku kee nàku,’+ gake mèƒo nu hexlɔ̃ nu ame vɔ̃ɖi la be wòaɖe asi le eƒe mɔ vɔ̃wo ŋu o la, ekema ame vɔ̃ɖi la aku le eƒe vodada ta,+ ke asiwò mee mabia eƒe ʋu le.  Ke ne èxlɔ̃ nu ame vɔ̃ɖi la be wòaɖe asi le eƒe mɔ vɔ̃wo ŋu, gake wògbe tɔtrɔ le eƒe mɔwo dzi la, ekema aku le eƒe vodada ta,+ ke wò la, àɖe wò agbe.*+ 10  “Ke wò amegbetɔvi, gblɔ na Israel ƒe aƒe la be: ‘Miegblɔ be, “Esi míaƒe dzidadawo kple míaƒe nu vɔ̃wo do agba ɖe mía dzi, eye wona míetsrɔ̃ vɔ ɖe,+ aleke míawɔ anɔ agbe?”’+ 11  Gblɔ na wo be, “Ale Aƒetɔ Dziɖulagã Yehowa gblɔe nye esi: ‘Zi ale si mele agbe la, ame vɔ̃ɖi ƒe ku mevivia nunye o,+ ke boŋ be ame vɔ̃ɖi la natrɔ ɖa le eƒe mɔ vɔ̃wo dzi,+ ne wòanɔ agbe.+ Oo, Israel ƒe aƒe,+ mitrɔ, mitrɔ tso miaƒe mɔ vɔ̃wo dzi,+ nu ka tae miedi be yewoaku?”’ 12  “Ke wò amegbetɔvi, gblɔ na mia deviwo be, ‘Ame dzɔdzɔe ƒe dzɔdzɔenyenye maɖee le gbe si gbe wòdze aglã o;+ eye ame vɔ̃ɖi ƒe nu vɔ̃ɖi wɔwɔ mana wòadze anyi le gbe si gbe wòɖe asi le eƒe nu vɔ̃ɖi wɔwɔ ŋu o;+ eye ame dzɔdzɔe ƒe dzɔdzɔenyenye hã mana wòatsi agbe le gbe si gbe wòwɔ nu vɔ̃ o.+ 13  Ne megblɔ na ame dzɔdzɔe be, “Ànɔ agbe godoo,” eye wòɖo dzi ɖe eƒe dzɔdzɔenyenye ŋu hewɔ nu madzɔmadzɔ la,+ ekema womagaɖo ŋku nu dzɔdzɔe siwo katã wòwɔ la dzi o, ke boŋ aku le nu madzɔmadzɔ si wòwɔ la ta.+ 14  “‘Eye ne megblɔ na ame vɔ̃ɖi be: “Ku kee nàku,” eye wòɖe asi le eƒe nu vɔ̃ɖi wɔwɔ ŋu heva le nu dzɔdzɔe kple nu si le eteƒe wɔm,+ 15  eye ame vɔ̃ɖi la gbugbɔ nu si wòxɔ awɔbae la na,+ eɖo nu si wòda adzoe la teƒe,+ eye wòdzudzɔ nu madzɔmadzɔ wɔwɔ hezɔ ɖe se siwo kplɔa ame yia agbe me nu la, ekema anɔ agbe godoo.+ Maku o. 16  Womagabu nu vɔ̃ siwo wòwɔ la dometɔ aɖeke nɛ o.*+ Anɔ agbe godoo,+ le esi wòwɔ nu dzɔdzɔe kple nu si le eteƒe ta.’ 17  “Ke mia deviwo gblɔ be, ‘Yehowa ƒe mɔ mele eteƒe o,’ evɔ wònye woawo ŋutɔwo boŋ ƒe mɔe mele eteƒe o hafi. 18  “Ne ame dzɔdzɔe ɖe asi le eƒe nu dzɔdzɔe wɔwɔ ŋu eye wòwɔa nu gbegblẽ la, esia tae wòaku ɖo.+ 19  Gake ne ame vɔ̃ɖi ɖe asi le eƒe nu vɔ̃ɖi wɔwɔ ŋu va le nu dzɔdzɔe kple nu si le eteƒe wɔm la, esia tae wòanɔ agbe ɖo.+ 20  “Ke miawo miegblɔ be: ‘Yehowa ƒe mɔ mele eteƒe o.’+ Oo, Israel ƒe aƒe, madrɔ̃ ʋɔnu mia dometɔ ɖe sia ɖe ɖe eƒe zɔzɔme nu.” 21  Le ƒe wuievelia ƒe ɣleti ewolia me, le míaƒe aboyomeyiyi ƒe ɣletia ƒe ŋkeke atɔ̃lia dzi la, ame aɖe si sí tso Yerusalem la va gbɔnye+ va gblɔ be: “Wosi du la!”+ 22  Ke Yehowa ƒe asi va dzinye le fiẽ si do ŋgɔ na sisila la ƒe vava, eye wòʋu nu nam hafi amea va gbɔnye le ŋdi. Ale nye nu ʋu, eye nyemeganye mumu o.+ 23  Eye Yehowa ƒe gbe va nam be: 24  “Amegbetɔvi, ame siwo le du gbagbã+ siawo me la le gbɔgblɔm le Israel-nyigba ŋu be, ‘Abraham ɖeka koe nɔ anyi, gake exɔ anyigba la wòzu etɔ.+ Ke esi míawo míesɔ gbɔ ta la, ɖikeke mele eme o be míawoe wotsɔ anyigba la na be míanyi eƒe dome.’ 25  “Eya ta gblɔ na wo be, ‘Ale Aƒetɔ Dziɖulagã Yehowa gblɔe nye esi: “Miele lã kple ʋu ɖum,+ miewu mo dzi ɖe miaƒe legba nyɔŋuwo* ŋu, eye miele ʋu kɔm ɖi.+ Eye miebe anyigba la nazu yewo tɔa? 26  Mieɖo ŋu ɖe miaƒe yiwo ŋu,+ miewɔ ŋunyɔnuwo, eye mia dometɔ ɖe sia ɖe gblẽ kɔ ɖo na ehavi srɔ̃.+ Eya ta nu ka ta anyigba la nazu mia tɔ?”’+ 27  “Gblɔ na wo be, ‘Ale Aƒetɔ Dziɖulagã Yehowa gblɔe nye esi: “Zi ale si mele agbe la, ame siwo le gli gbagbã siawo me atsi yi nu; matsɔ ame siwo le gbe me la ana gbemelãwo woaɖu; eye ame siwo le mɔ́ sesẽwo kple agadowo me la aku ɖe dɔvɔ̃ si me.+ 28  Mana anyigba la nazu gbegbewo ƒe gbegbe,+ mana eƒe ŋusẽ si dzi wòdana ɖo la nu natsi, eye Israel towo atsi ƒeƒle,+ ale be ame aɖeke magato wo dzi o. 29  Eye ne mena anyigba la zu gbegbewo ƒe gbegbe+ le woƒe ŋunyɔnu siwo katã wowɔ ta la,+ ekema woadze sii be, nyee nye Yehowa.”’ 30  “Ke wò amegbetɔvi, mia deviwo tɔ ɖe gliwo ŋu kple xɔmɔnuwo hele nu ƒom le ŋuwò.+ Wole gbɔgblɔm le wo nɔewo dome be, ‘Miva ne míase gbe si tso Yehowa gbɔ.’ 31  Woalɔ hoo ava bɔbɔ nɔ ŋkuwòme abe nye dukɔ ene; woase wò nyawo baa, gake womawɔ wo dzi o.+ Elabena nya ŋɔnɔe le aɖe dzi na wo, evɔ woƒe dzi ya klẽa ŋu ɖe viɖe ƒoɖi ŋu. 32  Kpɔ ɖa, èle na wo abe lɔlɔ̃ha si wotsɔ gbe vivi dzi heƒo saŋku ɖe edzi nyuie la ene. Woase wò nyawo ya, gake wo dometɔ aɖeke mawɔ wo dzi o. 33  Ne eva eme la—ele eme va ge hã—ekema woadze sii be, nyagblɔɖila aɖe nɔ yewo dome kpɔ.”+

Etenuŋɔŋlɔ

Alo, “eƒe luʋɔ.”
Alo, “luʋɔ.”
Alo, “luʋɔ.”
Egɔmeɖeɖe tẽe, “Womagaɖo ŋku nu vɔ̃ siwo wòwɔ la dometɔ aɖeke dzi o.”
Ðewohĩ Hebrigbe me nya si wozã le afi sia la do ƒome kple nya si wozãna na “mĩ” eye wozãnɛ na nu si nyɔa ŋu.