Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Ezekiel 3:1-27

EMENYAWO ƑE TOTOƉEME

  • Ezekiel ɖu agbalẽ xatsaxatsa si Mawu tsɔ nɛ la (1-15)

  • Ezekiel subɔ abe dzɔla ene (16-27)

    • Ne mèxlɔ̃ nu ame vɔ̃ɖi o la àɖi ʋufɔ (18-21)

3  Eye wògblɔ nam be: “Amegbetɔvi, ɖu nu si le ŋkuwò me la.* Ðu agbalẽ xatsaxatsa sia, eye nàyi aɖaƒo nu kple Israel ƒe aƒe la.”+  Ale meke nu, eye wòtsɔ agbalẽ la nam be maɖu.  Eye wògagblɔ nam be: “Amegbetɔvi, ɖu agbalẽ xatsaxatsa sia si tsɔm mele na wò la nàtsɔ ayɔ wò dɔgboe.” Ale meɖui, eye wòvivi le nu me nam abe anyitsi ene.+  Eye wògblɔ nam be: “Amegbetɔvi, yi Israel ƒe aƒe la gbɔ, eye nàgblɔ nye nyawo na wo.  Elabena menye dukɔ si ƒe gbegbɔgblɔ gɔme sese sesẽ alo nuƒo me mekɔna o gbɔe mele dɔwòm ɖo o, ke boŋ Israel ƒe aƒe la gbɔe.  Menye dukɔ geɖe siwo ƒe gbegbɔgblɔ gɔme sese sesẽ alo nuƒo me mekɔna o, ame siwo ƒe nyawo gɔme màte ŋu ase o la gbɔe mele dɔwòm ɖo o. Ne woawo gbɔe medɔ wò ɖo la, woaɖo to wò.+  Gake Israel ƒe aƒe la ya agbe toɖoɖo wò, le esi womedi be yewoaɖo tom o ta.+ Israel ƒe aƒe la me tɔwo katã nye tosẽlawo kple dzimesẽlawo.+  Kpɔ ɖa! Mena wò ŋkume sẽ abe woƒe ŋkume ene, eye wò ŋgonu lia abe woƒe ŋgonu ke ene.+  Mena wò ŋgonu le abe lotamekpe ene, eye wòsesẽ wu ahliha.+ Mègavɔ̃ wo o, eye woƒe mo megatso dzika ƒo na wò o,+ elabena ƒome dzeaglãe wonye.” 10  Eye wògagblɔ nam be: “Amegbetɔvi, ɖo to eye nàlé nya siwo katã magblɔ na wò la ɖe dzi me. 11  Yi aboyome siwo nye mia deviwo la dome,+ eye nàƒo nu kpli wo. Gblɔ na wo be, ‘Ale Aƒetɔ Dziɖulagã Yehowa gblɔe nye esi,’ wosee o, womeɖasee o.”+ 12  Gbɔgbɔ aɖe kɔm,+ eye mese hoowɔwɔ gã aɖe le megbenye be: “Woakafu Yehowa ƒe ŋutikɔkɔe la tso enɔƒe.” 13  Nu gbagbeawo ƒe aʋala siwo le wo nɔewo ŋu lilim la le ɖiɖim+ hekpe ɖe tasiaɖamfɔ siwo le wo xa la ƒe ɖiɖi+ kpakple hoowɔwɔ gã aɖe ŋu. 14  Gbɔgbɔ la kɔm dzoe, eye meyi le nuteɖeamedzi kple dziku me, eye Yehowa ƒe asi sẽ ɖe dzinye. 15  Eye meyi Tel-Abib, le aboyome siwo le Kebar-tɔsisia+ nu la dome, menɔ wo gbɔ le afi ma; metɔtɔ le ɖokuinye me+ henɔ wo dome ŋkeke adre. 16  Le ŋkeke adreawo ƒe nuwuwu la, Yehowa ƒe gbe va nam be: 17  “Amegbetɔvi, metsɔ wò ɖo dzɔlae ɖe Israel ƒe aƒe la nu;+ ne èse nya aɖe tso nunye me la, nàtsɔ nye nyawo axlɔ̃ nu wo.+ 18  Ne megblɔ na ame vɔ̃ɖi be, ‘Àku kokoko,’ gake mèxlɔ̃ nui o, eye mèƒo nu na ame vɔ̃ɖi la hexlɔ̃ nui be wòaɖe asi le eƒe mɔ vɔ̃ɖi la ŋu, ne wòatsi agbe o la,+ ekema aku le eƒe vodada ta elabena ame vɔ̃ɖie wònye,+ ke asiwò mee mabia eƒe ʋu le.+ 19  Ke ne èxlɔ̃ nu ame vɔ̃ɖi, gake meɖe asi le eƒe vɔɖivɔ̃ɖi ŋu hetrɔ tso eƒe mɔ vɔ̃ la dzi o la, ekema aku le eƒe vodada ta; ke wò la, àɖe wò agbe.*+ 20  Gake ne ame dzɔdzɔe ɖe asi le eƒe nu dzɔdzɔe wɔwɔ ŋu, eye wòwɔa nu gbegblẽ la, mada nu ɖe mɔ me nɛ wòakli aku.+ Ne mèxlɔ̃ nui o la, aku le eƒe nu vɔ̃ la ta, eye womaɖo ŋku nu dzɔdzɔe siwo wòwɔ dzi o; gake asiwò mee* mabia eƒe ʋu le.+ 21  Ke ne èxlɔ̃ nu ame dzɔdzɔe be megawɔ nu vɔ̃ o, eye ame dzɔdzɔe la mewɔ nu vɔ̃ o la, ekema atsi agbe godoo, elabena ese nuxlɔ̃amea,+ eye wò la, àɖe wò agbe.”* 22  Yehowa ƒe asi va dzinye le afi ma, eye wògblɔ nam be: “Tso nàyi bali la me, ne maƒo nu kpli wò le afi ma.” 23  Ale metso yi bali la me, eye kpɔ ɖa, Yehowa ƒe ŋutikɔkɔe le afi ma,+ abe ŋutikɔkɔe si mekpɔ le Kebar-tɔsisia+ to ene, eye metsyɔ mo anyi. 24  Eye gbɔgbɔ ɖo menye hena metso ɖe nye afɔwo dzi,+ eye Mawu ƒo nu kplim gblɔ be: “Yi nàdo ʋɔ ɖe ɖokuiwò nu le aƒewò me. 25  Amegbetɔvi, wole ka tsɔ ge abla wò, ale be màte ŋu ado ayi wo dome o. 26  Mana wò aɖe nalé ɖe aŋɔme* na wò, eye àzu mumu, màgagbe nya na wo azɔ o, elabena ƒome dzeaglãe wonye. 27  Ke ne mebe maƒo nu kpli wò la, ekema maʋu nu na wò, eye nàgblɔ na wo be,+ ‘Ale Aƒetɔ Dziɖulagã Yehowa gblɔe nye esi.’ Ame si be yeasee la, nesee,+ eye ame si be yeagbe la, negbe, elabena ƒome dzeaglãe wonye.+

Etenuŋɔŋlɔ

Egɔmeɖeɖe tẽe, “ɖu nu si nèkpɔ la.”
Alo, “luʋɔ.”
Alo, “wò luʋɔ si mee.”
Alo, “luʋɔ.”
Alo, “nu me.”