Ezekiel 22:1-31

  • Yerusalem, du si ɖi ʋufɔ (1-16)

  • Israel zu abe gamĩ ene (17-22)

  • Wobu fɔ Israel ƒe amegãwo kple dua me tɔwo (23-31)

22  Eye Yehowa ƒe gbe gava nam be:  “Amegbetɔvi, èle klalo adrɔ̃ ʋɔnu* du ɖiʋufɔ+ la ahaɖe eƒe ŋunyɔnuawo katã afiaea?+  Gblɔ be, ‘Ale Aƒetɔ Dziɖulagã Yehowa gblɔe nye esi: “Oo, du si kɔa ʋu ɖi+ le eƒe anyigba dzi, si ƒe ɣeyiɣi de,+ si wɔa legba nyɔŋuwo* tsɔ ƒoa ɖi eɖokui,+  wò ʋukɔkɔɖi na nèɖi fɔ,+ eye wò legba nyɔŋuwo na ŋuwò mekɔ o.+ Èdo tsɔtsɔe wò ŋkekewo ƒe nuwuwu, eye wò ƒewo ƒe nuwuwu ɖo. Esia tae mawɔ wò nàzu vlodonu na dukɔwo kple alɔmeɖenu na anyigbawo katã.+  Anyigba siwo le kpuiƒe kple didiƒe siaa aɖe alɔme le ŋuwò,+ wò ame si ƒe ŋkɔ ŋu mekɔ o, eye ʋunyaʋunya xɔ aƒe ɖe mewò.  Kpɔ ɖa! Israel ƒe amegãwo dometɔ ɖe sia ɖe si le mewò la, zãa eƒe ŋusẽ tsɔ kɔa ʋu ɖi.+  Wodoa vlo fofo kple dada le mewò.+ Wotafaa amedzro le mewò, eye wosẽa ŋuta le tsyɔ̃evi kple ahosi ŋu le mewò.”’”+  “‘Èdoa vlo nye kɔkɔeƒewo, eye nègblẽa kɔ ɖo na nye sabatwo.+  Ameŋugblẽla siwo ɖoa tame kplikpaa be yewoakɔ ʋu ɖi la le mewò.+ Woɖua vɔsanuwo le towo dzi le mewò, eye wowɔa ŋukpenanuwo le mewò.+ 10  Wodoa vlo wo fofo ƒe aba,*+ eye wodɔa nyɔnu si kpɔ dzinu la gbɔ le mewò.+ 11  Ŋutsu wɔa ŋunyɔnu ɖe ehavi srɔ̃ ŋu,+ eye ŋutsu bubu wɔa ŋukpenanu kple eya ŋutɔ ƒe toyɔvi hegblẽa kɔ ɖo nɛ,+ eye ame bubu hã dea asi nɔvianyɔnu, si nye eya ŋutɔ fofoa vinyɔnu ŋu, le mewò.+ 12  Woxɔa zãnu le mewò, ne woakɔ ʋu ɖi.+ Èdoa nu xɔa deme+ alo viɖe,* eye nèxɔa ga le hawòvi si sesẽe.+ Ɛ̃, èŋlɔm be keŋkeŋ,’ Aƒetɔ Dziɖulagã Yehowa ye gblɔe. 13  “‘Kpɔ ɖa, meƒo asikpe ɖe viɖe madzɔmadzɔ si nèkpɔ kple ʋu siwo nèkɔ ɖi le mewò la ta. 14  Ðe dzi anɔ ƒowò eye ŋusẽ anɔ wò asi ŋu le ŋkeke siwo me matso ɖe ŋuwòa?+ Nye Yehowa ye gblɔe, eye mawɔe hã. 15  Makaka wò ɖe dukɔwo dome, maka wò ahlẽ ɖe anyigbawo dzi,+ eye matsi wò nuwɔna makɔmakɔwo nu.+ 16  Àɖi gbɔ le dukɔwo ŋkume, ne nàdze sii be, nyee nye Yehowa.’”+ 17  Eye Yehowa ƒe gbe gava nam be: 18  “Amegbetɔvi, Israel ƒe aƒe la me tɔwo zu abe gamĩ ene nam. Wo katã wonye akɔbli, gaɣi, gayibɔ kple tsumi le kpo me. Klosalomĩ koe wozu.+ 19  “Eya ta ale Aƒetɔ Dziɖulagã Yehowa gblɔe nye esi: ‘Esi mi katã miezu gamĩ+ ɖeɖe sɔŋ ta la, eya ta maƒo mia nu ƒu ɖe Yerusalem. 20  Ale si wolɔa klosalo, akɔbli, gayibɔ, tsumi kple gaɣi kɔna ɖe kpo me, ne woaƒlɔ dzo ɖe wo ŋu woalólo la, nenemae malɔ mi le nye dziku kple nye dɔmedzoe me, eye maƒlɔ dzo ɖe mia ŋu mialólo.+ 21  Maƒo mia nu ƒu, eye maƒlɔ nye dɔmedzoe ƒe dzo ɖe mia ŋu+ mialólo le eme.+ 22  Ale si wolóloa klosalo le kpo mee la, nenemae woalólo mi le emee; ne miadze sii be, nye Yehowae trɔ nye dɔmedzoe ƒo ɖe mia dzi.’” 23  Eye Yehowa ƒe gbe gava nam be: 24  “Amegbetɔvi, gblɔ nɛ be: ‘Anyigba si ŋu womakɔ o, eye tsi madza ɖe edzi le dzikudogbe o lae nènye. 25  Eƒe nyagblɔɖilawo ɖo nugbe le eme,+ wole abe dzata si le gbe ɖem hele nu si wòlé la vuvum ene.+ Wole amewo* vuvum. Woxɔa kesinɔnuwo kple nu xɔasiwo sesẽe. Wona ahosiwo sɔ gbɔ ɖe eme. 26  Eƒe nunɔlawo da nye se la dzi,+ eye wole kɔ gblẽm ɖo na nye kɔkɔeƒewo.+ Womedea vovototo nu kɔkɔe kple nu gbɔlo dome o,+ eye womedzea si nu dzadzɛ kple nu si medza o,+ wogbea nye sabatwo me léle ɖe asi, eye wogblẽ kɔ ɖo nam le wo dome. 27  Amegã siwo le eme la le abe amegãxi siwo vuvua nu si wolé la ene; wokɔa ʋu ɖi, eye wowua amewo* ɖe viɖe madzɔmadzɔ ta.+ 28  Eƒe nyagblɔɖilawo si akalo ɖe woƒe nuwɔnawo dzi. Wokpɔa aʋatsoŋutegawo eye wokaa alakpafa+ na wo gblɔna be: “Ale Aƒetɔ Dziɖulagã Yehowa gblɔe nye esi,” evɔ wònye Yehowa meƒo nu hafi o. 29  Anyigba la dzi nɔlawo tafaa ame, wodaa adzo,+ wosẽa ŋuta le hiãtɔ kple ame dahe ŋu, eye wotafaa amedzro hegbea nya dzɔdzɔe dɔdrɔ̃ nɛ.’ 30  “‘Medi ame le wo dome, si aɖɔ gli la ɖo, alo atsi tsitre ɖe gbagbãƒe la le ŋkunyeme ɖe anyigba la nu, ne womagagblẽe o;+ gake nyemekpɔ ame aɖeke o. 31  Eya ta matrɔ nye dziku aƒo ɖe wo dzi, eye matsɔ nye dɔmedzoe ƒe dzo atsrɔ̃ wo keŋkeŋ. Mahe woƒe nuwɔnawo me tsonuwo ava woawo ŋutɔwo ƒe ta dzi,’ Aƒetɔ Dziɖulagã Yehowa ye gblɔe.”

Etenuŋɔŋlɔ

Egɔmeɖeɖe tẽe, “àdrɔ̃ ʋɔnu, àdrɔ̃ ʋɔnu.”
Ðewohĩ Hebrigbe me nya si wozã le afi sia la do ƒome kple nya si wozãna na “mĩ” eye wozãnɛ na nu si nyɔa ŋu.
Egɔmeɖeɖe tẽe, “Woɖea ama wo fofo.”
Alo, “xɔa deme gã.”
Alo, “luʋɔwo.”
Alo, “luʋɔwo.”