Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Ezekiel 21:1-32

EMENYAWO ƑE TOTOƉEME

  • Mawu ɖe eƒe ʋɔnudɔdrɔ̃ ƒe yi le aku me (1-17)

  • Babilon-fia adze Yerusalem dzi (18-24)

  • Israel ƒe amegã vɔ̃ɖi la ɖeɖe ɖa (25-27)

    • “Ðe fiakuku ɖi” (26)

    • “Va se ɖe esime ame si tɔ wònye le se nu la nava” (27)

  • Woɖe yi ɖe Amonitɔwo ŋu (28-32)

21  Yehowa ƒe gbe gava nam be:  “Amegbetɔvi, trɔ mo ɖe Yerusalem lɔƒo, eye nàgblɔ nya ɖe kɔkɔeƒewo ŋu, eye nàgblɔ nya ɖi ɖe Israel-nyigba ŋu.  Gblɔ na Israel-nyigba be, ‘Ale Yehowa gblɔe nye esi: “Kpɔ ɖa, metso ɖe ŋuwò, maɖe nye yi le aku me+ atsrɔ̃ ame dzɔdzɔe kple ame vɔ̃ɖi siaa ɖa le mewò.  Elabena mele ame dzɔdzɔe kple ame vɔ̃ɖi siaa tsrɔ̃ ge ɖa, nye yi ado le aku me ɖe ŋutilãwo* katã ŋu tso anyiehe va se ɖe dziehe.  Amewo katã adze sii be nye Yehowa ye ɖe nye yi le aku me. Magagbugbɔ ayi aku me o.”’+  “Ke wò amegbetɔvi, nɔ ŋeŋem nànɔ dzodzom nyanyanya,* ɛ̃, nɔ ŋeŋem abe ame si le veve sem helĩhelĩ ene le wo ŋkume.+  Eye ne wobia wò be: ‘Nu ka tae nèle ŋeŋem ɖo?’ hã la, nàɖo eŋu na wo be, ‘Nya aɖe tae.’ Elabena ele eme va ge, vɔvɔ̃ ana dziwo katã nalólo gbanaa, eye asiwo katã ado agblɔ, nu ate gbɔgbɔwo katã ŋu, eye tsi atsyɔ le klowo katã nu.*+ ‘Kpɔ ɖa! Egbɔna, eye wòle eme va ge,’ Aƒetɔ Dziɖulagã Yehowa ye gblɔe.”  Eye Yehowa ƒe gbe gava nam be:  “Amegbetɔvi, gblɔ nya ɖi, eye nàgblɔ be, ‘Ale Yehowa gblɔe nye esi: “Gblɔ be: ‘Yi!+ Wonyre yi, eye wozrɔ̃ eŋu. 10  Wonyree be wòawu ame geɖe; wozrɔ̃ eŋu be wòada dzo abe dzikedzo ene.’”’” “Ðe míakpɔ dzidzɔ oa?” “‘Ðe wòado* vlo vinye ƒe fiatikplɔ la,+ abe ale si wòwɔ ati ɖe sia ɖe enea? 11  “‘Wotsɔe na be woazrɔ̃ eŋu, ne woalée ɖe asi. Wonyre yi sia hezrɔ̃ eŋu be woatsɔ ade asi na ametsrɔ̃la.+ 12  “‘Amegbetɔvi, do ɣli, eye nàƒu asi nu,+ elabena yi la va ɖe nye dukɔ ŋu; Israel ƒe amegãwo katã ŋue wòva ɖo.+ Yi la awu wo kple nye dukɔ la siaa. Eya ta ƒo aklito nàxa nu. 13  Elabena wodoe kpɔ,+ ke nu kae adzɔ ne yi la do vlo fiatikplɔ la hã? Maganɔ* anyi o,’+ Aƒetɔ Dziɖulagã Yehowa ye gblɔe. 14  “Amegbetɔvi, gblɔ nya ɖi, si akpe, eye nàgblɔ zi etɔ̃ be, ‘Yi!’ Amewuyie, yi si awu ame geɖewoe wònye ɖe to ɖe wo.+ 15  Vɔvɔ̃ ana woƒe dziwo nalólo gbanaa,+ eye ame geɖewo aku aɖo baba ɖe woƒe agbowo nu; matsɔ yi awu ame geɖe. Vavãe, ele dzo dam abe dzikedzo ene, eye wozrɔ̃ yi la ŋu na amewuwu! 16  Lã nu le ɖusime! Nyè yi miame! Yi afi sia afi si wò nu trɔ ɖo! 17  Nye hã masi akpe, eye mawɔ nu si ana nye dɔmedzoe nu nafa.+ Nye Yehowa ye gblɔe.” 18  Eye Yehowa ƒe gbe gava nam be: 19  “Amegbetɔvi, de dzesi mɔ eve siwo dzi Babilon-fia ƒe yi la ato ava. Mɔ eve siawo nadze egɔme tso anyigba ɖeka dzi, eye nàtu mɔfiati* ɖe afi si mɔa dze le ɖo ta du eveawo me. 20  De dzesi mɔ ɖeka na yi la be wòato ayi ɖe Amonitɔwo ƒe du Raba+ ŋu, eye bubu nayi ɖe Yerusalem+ si ŋu woɖo gli sesẽwo ɖo le Yuda la ŋu. 21  Elabena Babilon-fia va tɔ ɖe mɔ dzevee la nu, le mɔ eveawo dzeƒe, be yeaka afa. Eʋuʋu aŋutrɔawo. Ebia gbe eƒe legbawo;* eɖe ŋku ɖe aklã ŋu. 22  Afa si le nuɖusi me nɛ la trɔ ɖe Yerusalem ŋu, ne woatu gligbãnuwo, woaɖe gbe woawu amewo, woado aʋaɣli, woatu gligbãnu ɖe agbowo ŋu, woaƒu kpo ahaɖo dudzidzelawo ƒe gli ɖe eŋu.+ 23  Gake afa la adze aʋatsonyae le ame siwo* ka atam na wo la ŋkume.+ Ke eɖo ŋku woƒe vodada dzi, eye aɖe aboyo wo.+ 24  “Eya ta ale Aƒetɔ Dziɖulagã Yehowa gblɔe nye esi: ‘Miena miaƒe dzidadawo kple nu vɔ̃wo dze ƒãa le miaƒe nuwɔnawo katã me ale be woɖo ŋku miaƒe vodada dzi. Azɔ esi woɖo ŋku mia dzi la, woalé mi sesẽe.’* 25  “Gake wò ŋkeke de azɔ, Oo Israel ƒe amegã vɔ̃ɖi,+ si ŋu wode kubii, wò toheɣi mamlɛa ɖo. 26  Ale Aƒetɔ Dziɖulagã Yehowa gblɔe nye esi: ‘Ðe tablanu ɖa, eye ɖe fiakuku ɖi.+ Maganɔ alea o.+ Do ame tsɛ ɖe dzi,+ eye nàbɔbɔ amegã ɖe anyi.+ 27  Gbegblẽ, gbegblẽ, gbegblẽe mana wòazu. Eye manye ame aɖeke tɔ o va se ɖe esime ame si tɔ wònye le se nu la nava,+ eye matsɔe anɛ.’+ 28  “Amegbetɔvi, gblɔ nya ɖi be, ‘Ale Aƒetɔ Dziɖulagã Yehowa gblɔ ɖe Amonitɔwo kple woƒe vlodoame la ŋue nye esi.’ Gblɔ bena: ‘Yi! Woɖe yi le aku me hena amewuwu, wozrɔ̃ eŋu be wòada dzo abe dzikedzo ene hena nugbegblẽ. 29  Togbɔ be wokpɔ aʋatsoŋutegawo eye woka alakpafa na wò hã la, woatsɔ wò ali kɔ ɖe ame siwo wowu,* ame vɔ̃ɖi siwo ƒe ŋkeke de, eye woƒe toheɣi mamlɛa ɖo la dzi. 30  Gbugbɔ yi la de aku me. Madrɔ̃ ʋɔnu wò le teƒe si wowɔ wò le, le anyigba si dzi nèdzɔ ɖo. 31  Matrɔ nye dziku aƒo ɖe dziwò. Maƒlɔ nye dɔmedzoe ƒe dzo ɖe ŋuwò, eye matsɔ wò ade asi na ŋutasẽlawo, ame siwo bi ɖe nu gbegblẽ ƒe aɖaŋu me.+ 32  Àzu nake na dzo,+ eye woakɔ wò ʋu ɖi le anyigba la dzi, womagaɖo ŋku dziwò akpɔ o, elabena nye Yehowa ye gblɔe.’”

Etenuŋɔŋlɔ

Alo, “amewo.”
Egɔmeɖeɖe tẽe, “nàna wò ali nanɔ ƒoƒom.”
Efia, aɖuɖɔ agbɔ le ame ŋu le vɔvɔ̃ ta.
Yehowa ƒe yie wowɔnɛ.
Alo, “Fiatikplɔ la maganɔ.”
Egɔmeɖeɖe tẽe, “mɔfiasi.”
Egɔmeɖeɖe tẽe, “terafim.”
Efia, Yerusalemtɔwo.
Egɔmeɖeɖe tẽe, “asi atu mi.”
Egɔmeɖeɖe tẽe, “ɖe ametsiaʋawo ƒe kɔ̀wo dzi.”