Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Ezekiel 11:1-25

EMENYAWO ƑE TOTOƉEME

  • Wogbe amegã vɔ̃ɖiwo (1-13)

    • Wotsɔ dua sɔ kple nuɖaze (3-12)

  • Gbugbɔgaɖoanyi ƒe ŋugbedodo (14-21)

    • “Gbɔgbɔ yeye” dede wo me (19)

  • Mawu ƒe ŋutikɔkɔe dzo le Yerusalem (22, 23)

  • Ezekiel trɔ va Kaldea le ŋutega me (24, 25)

11  Eye gbɔgbɔ aɖe kɔm yi Yehowa ƒe aƒe la ƒe ɣedzeƒegbo si dze ŋgɔ ɣedzeƒe la nu.+ Mekpɔ ŋutsu blaeve vɔ atɔ̃ le agbo la nu le afi ma, Yaazaniya, Azur vi, kple Pelatiya, Benaya vi, siwo nye dukɔ la ƒe amegãwo, hã le wo dome.+  Eye wògblɔ nam be: “Amegbetɔvi, ŋutsu siawoe le tame vɔ̃ ɖom, eye wole aɖaŋu vɔ̃ ɖom le du sia me.*  Wole gbɔgblɔm be, ‘Ðe menye xɔtuɣie nye esia oa?+ Du* lae nye nuɖaze* la,+ eye míawoe nye lã le eme.’  “Eya ta gblɔ nya ɖi ɖe wo ŋu. Amegbetɔvi, gblɔ nya ɖi.”+  Eye Yehowa ƒe gbɔgbɔ va dzinye,+ eye Mawu gblɔ nam be: “Gblɔ be, ‘Ale Yehowa gblɔe nye esi: “Israel ƒe aƒe, nya si miegblɔ la le eteƒe, eye menya tame si bum miele.*  Miena ame geɖewo ku le du sia me, eye mietsɔ ame kukuwo yɔ eƒe ablɔwo dzi taŋ.”’”+  “Eya ta ale Aƒetɔ Dziɖulagã Yehowa gblɔe nye esi: ‘Ame kuku siwo miekaka ɖe dua me la woe nye lã la, eye du lae nye nuɖaze la.+ Ke miawo la, woakplɔ mi adzoe le eme.’”  “Aƒetɔ Dziɖulagã Yehowa be: ‘Yi vɔ̃m miele,+ ke yie mahe ava mia dzi.  Makplɔ mi adzoe le eme, matsɔ mi ade asi na amedzrowo, eye madrɔ̃ ʋɔnu mi.+ 10  Miatsi yi nu.+ Madrɔ̃ ʋɔnu mi le Israel ƒe liƒo dzi,+ ne miadze sii be, nyee nye Yehowa.+ 11  Du la manye nuɖaze na mi o, eye mianye lã anɔ eme o; madrɔ̃ ʋɔnu mi le Israel ƒe liƒo dzi, 12  ne miadze sii be, nyee nye Yehowa. Elabena miezɔ le nye ɖoɖowo nu o, eye miewɔ nye sewo dzi o,+ ke boŋ miewɔ nu ɖe dukɔ siwo ƒo xlã mi la ƒe sewo nu.’”+ 13  Eye esi menya gblɔ nya ɖi ko la, Pelatiya, Benaya vi la ku, eye metsyɔ mo anyi hedo ɣli sesĩe gblɔ be: “Aléle, Aƒetɔ Dziɖulagã Yehowa! Israel ƒe ame susɔeawo katãe nèbe yeatsrɔ̃a?”+ 14  Eye Yehowa ƒe gbe gava nam be: 15  “Amegbetɔvi, Yerusalemtɔwo gblɔ na nɔviwòwo, nɔviwòŋutsu siwo dze agbugbɔ wò domenyinu aƒle, kple Israel ƒe aƒe blibo la katã be, ‘Minɔ adzɔge ʋĩi tso Yehowa gbɔ. Mía tɔe nye anyigba la; wotsɔe na mí wòzu mía tɔ.’ 16  Eya ta gblɔ be, ‘Ale Aƒetɔ Dziɖulagã Yehowa gblɔe nye esi: “Togbɔ be meɖo wo ɖe dukɔwo dome ʋĩi eye meka wo hlẽ ɖe anyigbawo dzi hã la,+ mazu kɔkɔeƒe na wo ɣeyiɣi kpui aɖe le anyigba siwo dzi woyi la dzi.”’+ 17  “Eya ta gblɔ be: ‘Ale Aƒetɔ Dziɖulagã Yehowa gblɔe nye esi: “Nye hã makplɔ mi tso dukɔwo dome agbɔe, eye maƒo mia nu ƒu tso anyigba siwo dzi miekaka ɖo la dzi, eye matsɔ Israel-nyigba la ana mi.”+ 18  “Woatrɔ agbɔ va afi ma, eye woaɖe eƒe legba nyɔŋuwo kple eƒe nuwɔna nyɔŋuwo katã ɖa le edzi.+ 19  Mana dzi si to mɔ ɖeka* wo,+ eye made gbɔgbɔ yeye wo me;+ maɖe kpedzi la ɖa le wo me,+ eye mana lãkusidzi* wo,+ 20  ne woazɔ le nye ɖoɖowo nu, eye woalé nye afiatsotsowo me ɖe asi ahawɔ wo dzi. Ekema woanye nye dukɔ, eye manye woƒe Mawu.”’ 21  “‘“Ke ame siwo ƒe dzi ku ɖe woƒe legba nyɔŋuwo kple woƒe nuwɔna nyɔŋuwo ŋu la, mahe woƒe nuwɔnawo me tsonuwo ava woƒe ta dzi,” Aƒetɔ Dziɖulagã Yehowa ye gblɔe.’” 22  Azɔ kerubiawo kɔ woƒe aʋalawo dzi eye tasiaɖamfɔawo le wo xa,+ eye Israel ƒe Mawu la ƒe ŋutikɔkɔe le wo tame.+ 23  Eye Yehowa ƒe ŋutikɔkɔe+ ho yi dzi tso dua me heva tɔ ɖe to si le dua ƒe ɣedzeƒe la tame.+ 24  Gbɔgbɔ aɖe kɔm—le ŋutega si Mawu ƒe gbɔgbɔ na mekpɔ la me—eye wòkplɔm yi aboyomeawo gbɔ le Kaldea. Eye ŋutega si kpɔm menɔ la dzo le gbɔnye. 25  Eye megblɔ nu siwo katã Yehowa ɖe fiam la na aboyomeawo.

Etenuŋɔŋlɔ

Alo, “adaŋu vɔ̃ɖi dem ɖe du sia ŋu.”
Yerusalem du si me Yudatɔwo bu be yewoanɔ dedie le lae wowɔnɛ.
Alo, “nuɖaze si ƒe nu keke.”
Alo, “nu siwo miaƒe gbɔgbɔ gblɔ na mi.”
Egɔmeɖeɖe tẽe, “dzi ɖeka.”
Efia, dzi si wɔna ɖe Mawu ƒe mɔfiamewo dzi.