Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Nyagblɔla 4:1-16

EMENYAWO ƑE TOTOƉEME

  • Ame siwo ku la tɔ nyo wu ame siwo tem wole ɖe anyi (1-3)

  • Susu nyui ƒe amesinɔnɔ ku ɖe dɔ ŋu (4-6)

  • Xɔlɔ̃ ƒe vevienyenye (7-12)

    • Ne ame le eve la, enyo wu ame ɖeka (9)

  • Fia ƒe agbe ate ŋu anye tofloko (13-16)

4  Megalé ŋku ɖe ameteteɖeanyi siwo katã yia edzi le ɣea te la ŋu. Mekpɔ ame siwo tem wole ɖe anyi la ƒe aɖatsiwo, ke akɔfala aɖeke meli na wo o.+ Ŋusẽ le ame siwo te wo ɖe anyi la si, ale be womekpɔ akɔfala aɖeke o.  Eye mekpɔe be ame siwo ku xoxo la tɔ nyo wu agbagbeawo tɔ.+  Ke ame siwo medzɔ haɖe+ ne woayi nuxaxadonamenu siwo wɔm wole le ɣea te kpɔ ge o ya tɔ ganyo wu wo ame evea siaa tɔ.+  Eye megakpɔ be, hoʋiʋli kple ame nɔewoe dɔa amewo wokua kutri geɖe* hewɔa aɖaŋudɔ gbogboawo;+ esia hã tofloko kple dagbadagba ɖe yame wònye.  Bometsila de asi asitɛ me, evɔ wòle ku ɖim.*+  Gbɔɖeme asiʋlo ɖeka nyo wu dɔ sesẽ wɔwɔ kple dagbadagba ɖe yame asiʋlo eve.+  Megatrɔ susu ɖe nu bubu aɖe si hã nye tofloko le ɣea te la ŋu:  Ame aɖe ya ɖeka koe li, eye ame aɖeke mele esi o; vi alo nɔvi hã mele esi o, gake eƒe dɔ sesẽ wɔwɔwo mewua enu gbeɖe o. Kesinɔnuwo meɖia ƒo na eƒe ŋku o.+ Gake ɖe wòbiaa eɖokui be, “Ame ka ta gɔ̃e mehele dɔ sesẽ wɔm hele nu nyuiwo tem ɖokuinye* ɖo”?+ Esia hã tofloko kple fuɖenameɖokuidɔ ko wònye.+  Ne ame le eve la, enyo wu ame ɖeka,+ elabena woakpɔ fetu nyui* ɖe woƒe dɔ sesẽ wɔwɔ ta. 10  Elabena ne wo dometɔ ɖeka dze anyi la, evelia afɔe ɖe tsitre. Ke aleke wòanɔ na ame si dze anyi eye ame aɖeke meli afɔe ɖe tsitre o la? 11  Gawu la, ne ame eve mlɔ wo nɔewo xa la, woléa dzo ɖe wo nɔewo ŋu, ke aleke ame ɖeka ate ŋu alé dzo ɖe eɖokui ŋu? 12  Eye ne ame aɖe ate ŋu aɖu ame ɖeka dzi hã la, ame eve ya ate ŋu anɔ te ɖe enu. Eye ka etɔ̃ si wogbi mate ŋu atso bɔbɔe o. 13  Ðekakpuivi dahe nyanu nyo wu fia tsitsi tsibome,+ si megasea aɖaŋuɖoɖo o.+ 14  Edo* tso gaxɔ me heva zu fia,+ evɔ ahedada mee wodzii ɖo le ame ma ƒe fiaɖuƒe la me hafi.+ 15  Mede ŋugble le agbagbeawo katã, siwo zɔna le ɣea te, kple ale si nuwo va yii na ɖekakpuivi si va xɔ ɖe ame kemɛa teƒe la ŋu. 16  Togbɔ be edzidelawo de ha kpaŋ hã la, ame siwo ava va emegbe makpɔ dzidzɔ ɖe eŋu o.+ Esia hã tofloko kple dagbadagba ɖe yame wònye.

Etenuŋɔŋlɔ

Alo, “wowɔa dɔ sesẽ.”
Egɔmeɖeɖe tẽe, “hele eya ŋutɔ ƒe ŋutilã ɖum.”
Alo, “luʋɔnye.”
Alo, “woakpɔ viɖe geɖe wu.”
Anye ɖekakpuivi nyanu lae wowɔnɛ.