Nyaɖeɖefia 4:1-11

  • Yehowa ƒe anyinɔnɔ le dziƒo ƒe ŋutega la (1-11)

    • Yehowa nɔ anyi ɖe eƒe fiazikpui dzi (2)

    • Ametsitsi 24 nɔ fiazikpuiwo dzi (4)

    • Nu gbagbe eneawo (6)

4  Le nu sia megbe la, kpɔ ɖa, mekpɔ ʋɔtru aɖe le ʋuʋu le dziƒo, eye gbe gbãtɔ si mese la le abe kpẽ ƒe ɖiɖi ene, eye wògblɔ nam be: “Va dzi afii, ne mafia nu siwo ava dzɔ la wò.”  Le esia megbe la, Mawu ƒe gbɔgbɔ va dzinye enumake, eye kpɔ ɖa, mekpɔ fiazikpui aɖe le dziƒo, eye ame aɖe bɔbɔ nɔ fiazikpui la dzi.+  Ame si bɔbɔ nɔ edzi la ƒe dzedzeme le abe yaspis-kpe+ kple sardis-kpe* ene, eye anyieʋɔ si le abe emerald-kpe ene la ƒo xlã fiazikpui la.+  Eye fiazikpui blaeve vɔ ene+ ƒo xlã fiazikpui la, eye mekpɔ ametsitsi blaeve vɔ ene wobɔbɔ nɔ fiazikpui siawo dzi, wodo awu ʋlaya ɣiwo, eye sikafiakukuwo le ta na wo.  Eye dzikedzowo,+ gbeɖiɖiwo kple dziɖegbewo+ le dodom tso fiazikpui la me; eye akaɖi adre nɔ bibim le fiazikpui la ŋgɔ, esiawo le tsitre ɖi na Mawu ƒe gbɔgbɔ adreawo.+  Azɔ nane le fiazikpui la ŋgɔ si ɖi atsiaƒu+ si le abe ahuhɔ̃e ene, eye wòle abe kristalo-kpe ene. Le titina, afi si fiazikpuia le, kple fiazikpuia ŋu godoo la, nu gbagbe ene+ siwo ŋkuwo le ŋgɔgbe kple megbe na keŋ la li.  Nu gbagbe gbãtɔ le abe dzata+ ene, eye nu gbagbe evelia le abe nyitsui+ ene, nu gbagbe etɔ̃lia+ ƒe mo le abe amegbetɔ tɔ ene, eye nu gbagbe enelia+ le abe hɔ̃ si le dzodzom ene.+  Eye aʋala ade li na nu gbagbe eneawo dometɔ ɖe sia ɖe; ŋkuwo yɔ aʋalawo ŋuti kple wo me fũu.+ Eye wole gbɔgblɔm madzudzɔmadzudzɔe zã kple keli be: “Kɔkɔe, kɔkɔe, kɔkɔe nye Yehowa*+ Mawu, Ŋusẽkatãtɔ la, ame si nɔ anyi, eye wòli, eye wògbɔna.”+  Ɣesiaɣi si nu gbagbeawo tsɔ ŋutikɔkɔe, bubu kple akpedada na Ame si bɔbɔ nɔ fiazikpuia dzi, Ame si le agbe tso mavɔ me yi mavɔ me la,+ 10  ametsitsi blaeve vɔ eneawo+ tsyɔa mo anyi ɖe Ame si bɔbɔ nɔ fiazikpuia dzi la ŋkume, eye wodea ta agu na Ame si le agbe tso mavɔ me yi mavɔ me la, eye wotsɔa woƒe fiakukuawo dana ɖe fiazikpuia ŋgɔ henɔa gbɔgblɔm be: 11  “Yehowa,* mía Mawu, wòe dze be nàxɔ ŋutikɔkɔe,+ bubu+ kple ŋusẽ,+ elabena wòe wɔ nuwo katã,+ eye wò lɔlɔ̃nu ta woli, eye wowɔ wo ɖo.”

Etenuŋɔŋlɔ

Alo, “kpe xɔasi dzĩ.”