Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Nyaɖeɖefia 19:1-21

EMENYAWO ƑE TOTOƉEME

  • Mikafu Yah ɖe eƒe ʋɔnudɔdrɔ̃wo ta (1-10)

    • Alẽvi la ƒe srɔ̃ɖeɖe (7-9)

  • Sɔ ɣi dola (11-16)

  • Mawu ƒe fiẽnuɖuɖu gã la (17, 18)

  • Woɖu lã wɔadã la dzi (19-21)

19  Le nu sia megbe la, mese gbe aɖe abe ameha gã aɖe ƒe gbe ene le dziƒo. Wogblɔ be: “Mikafu Yah!*+ Xɔname kple ŋutikɔkɔe kple ŋusẽ nye mía Mawu la tɔ,  elabena eƒe ʋɔnudɔdrɔ̃wo nye nyateƒe, eye wole dzɔdzɔe.+ Elabena edrɔ̃ ʋɔnu gbolo gã si tsɔ eƒe ahasiwɔwɔ* gblẽ anyigba la, eye wòbia eƒe kluviwo ƒe ʋu ƒe hlɔ̃e.”*+  Eye enumake wogblɔ zi evelia be: “Mikafu Yah!*+ Eye gbolo la ƒe dzudzɔ le tutum le dziƒo yim tegbetegbe.”+  Eye ametsitsi blaeve vɔ eneawo+ kple nu gbagbe eneawo+ tsyɔ mo anyi hede ta agu na Mawu, ame si bɔbɔ nɔ fiazikpui la dzi, eye wogblɔ be: “Amen! Mikafu Yah!”*+  Eye gbe aɖe ɖi tso fiazikpui la gbɔ gblɔ be: “Mikafu mía Mawu la, mi eƒe kluviwo katã,+ mi ame tsɛ kple ame ŋkuta siwo katã vɔ̃nɛ.”+  Eye mese gbe aɖe abe ameha gã aɖe ƒe gbeɖiɖi kple tsi geɖewo ƒe gbeɖiɖi kple dziɖegbe sesẽwo ƒe gbeɖiɖi ene. Wogblɔ be: “Mikafu Yah,*+ elabena Yehowa,* mía Mawu Ŋusẽkatãtɔ+ la, dze fiaɖuɖu gɔme!+  Mina míakpɔ dzidzɔ, eye míatso aseye ahatsɔ ŋutikɔkɔe anae, elabena Alẽvi la ƒe srɔ̃ɖeɖe la ɖo, eye srɔ̃a dzra eɖokui ɖo.  Ɛ̃, woɖe mɔ be woatsɔ aklala biɖibiɖi wu dzadzɛ si le dzo dam la aɖo atsyɔ̃ nɛ, elabena aklala biɖibiɖi wu la le tsitre ɖi na ame kɔkɔewo ƒe nu dzɔdzɔe wɔwɔwo.”+  Eye mawudɔla la gblɔ nam be, “Ŋlɔ bena: Dzidzɔtɔwoe nye ame siwo wokpe va Alẽvi la ƒe srɔ̃ɖeɖe ƒe fiẽnuɖuƒe la.”+ Eye wògagblɔ nam be: “Nya siawo nye Mawu ƒe nya vavãwo.” 10  Ale medze klo ɖe eƒe afɔnu be made ta agu nɛ. Ke egblɔ nam be: “Kpɔ nyuie! Mègawɔ nu ma o!+ Nye hã kluvi ko menye abe wò ke ene kpe ɖe nɔviwò siwo lé Yesu ŋuti ɖaseɖiɖidɔ la me ɖe asi ŋu.+ De ta agu na Mawu!+ Elabena ɖaseɖiɖi tso Yesu ŋue ʋãa amewo wogblɔa nya ɖi.”+ 11  Eye mekpɔ dziƒo nu ʋu, kpɔ ɖa, sɔ ɣi aɖee nye esi!+ Eye woyɔ ame si bɔbɔ nɔ edzi la be Nuteƒewɔla+ kple Nyateƒetɔ,+ eye wòdrɔ̃a ʋɔnu hewɔa aʋa dzɔdzɔe.+ 12  Eƒe ŋkuwo nye dzoƒaɖe,+ eye fiakuku geɖewo le ta nɛ. Woŋlɔ ŋkɔ si ame aɖeke menya o, negbe eya ŋutɔ ko la ɖe eŋu, 13  edo awudziwui si ƒo ʋu,* eye eŋkɔe nye, Mawu Ƒe Nya+ La. 14  Eye dziƒoʋakɔwo le sɔ ɣiwo dzi dze eyome, eye wodo aklala biɖibiɖi wu ɣi dzadzɛwo. 15  Eye yi ɖaɖɛ legbe aɖe do tso eƒe nu me,+ be wòatsɔ adza dukɔwo, eye wòatsɔ gatikplɔ akplɔ wo.+ Efanyaa nu si le Mawu Ŋusẽkatãtɔ la ƒe dɔmedzoe helĩhehĩ ƒe wainfiãnu la me hã.+ 16  Eye woŋlɔ ŋkɔ ɖe eƒe awudziwui ŋu le eƒe ata ŋu be: fiawo dzi Fia kple aƒetɔwo dzi Aƒetɔ.+ 17  Mekpɔ mawudɔla aɖe hã wòle tsitre ɖe ɣe ŋkume, eye wòdo ɣli kple gbe gã aɖe ɖo ɖe xe siwo katã dzona le yame la be: “Miva afii, miva ƒo ƒu ɖe Mawu ƒe fiẽnuɖuɖu gã la ŋu,+ 18  ne miaɖu fiawo ƒe lã, aʋafiagãwo ƒe lã, ame sesẽwo+ ƒe lã, sɔwo kple wo dolawo ƒe lã,+ kple amewo katã, ablɔɖemewo kpakple kluviwo, ame tsɛwo kple ame ŋkutawo ƒe lã.” 19  Eye mekpɔ lã wɔadã la kple anyigbadzifiawo kpakple woƒe aʋakɔwo woƒo ƒu be yewoawɔ aʋa kple ame si bɔbɔ nɔ sɔ la dzi kple eƒe aʋakɔ la.+ 20  Eye wolé lã wɔadã la kple aʋatsonyagblɔɖila,+ si wɔ dzesiwo le eŋkume tsɔ flu ame siwo xɔ lã wɔadã la ƒe dzesia,+ kple ame siwo de ta agu na eƒe legba la.+ Wotsɔ wo kple evea siaa ƒu gbe agbagbee ɖe dzota si me dzokpe le bibim le la me.+ 21  Ke wowu ame susɔeawo kple yi legbe si do tso sɔdola la ƒe nu me.+ Eye xewo katã ɖu woƒe lã ɖi ƒo.+

Etenuŋɔŋlɔ

Alo, “Haleluyah!” “Yah” nye ŋkɔ Yehowa ŋɔŋlɔ kpuie.
Helagbe, pornia. Kpɔ Nya Tɔxɛwo Gɔmeɖeƒea.
Egɔmeɖeɖe tẽe, “ʋu ƒe hlɔ̃ le esi.”
Alo, “Haleluyah!” “Yah” nye ŋkɔ Yehowa ŋɔŋlɔ kpuie.
Alo, “Haleluyah!” “Yah” nye ŋkɔ Yehowa ŋɔŋlɔ kpuie.
Alo, “Haleluyah!” “Yah” nye ŋkɔ Yehowa ŋɔŋlɔ kpuie.
Agate ŋu afia, “si me ʋu hlẽ ɖo.”