Nyaɖeɖefia 16:1-21

  • Mawu ƒe dɔmedzoekplu adreawo (1-21)

    • Wokɔe ɖe anyigba dzi (2), atsiaƒu me (3), tɔsisiwo me kple tsidzɔƒewo (4-7), ɣe dzi (8, 9), lã wɔadã la ƒe fiazikpui dzi (10, 11), Frat-tɔsisi me (12-16), kple yame (17-21)

    • Mawu ƒe aʋa si wòawɔ le Armagedon (14, 16)

16  Eye mese gbe gã aɖe tso kɔkɔeƒe+ la wògblɔ na mawudɔla adreawo be: “Miyi ne miatrɔ nu siwo le Mawu ƒe dɔmedzoekplu adreawo me la kɔ ɖe anyigba dzi.”+  Mawudɔla gbãtɔ yi ɖatrɔ nu si le eƒe kplua me la kɔ ɖe anyigba dzi.+ Eye ame siwo ŋu lã wɔadã+ la ƒe dzesi le, eye wole ta dem agu na eƒe legba+ la dze abi vɔ̃.+  Mawudɔla evelia trɔ nu si le eƒe kplua me la kɔ ɖe atsiaƒu me.+ Eye wòtrɔ zu abe ame kuku ƒe ʋu+ ene, eye nu* gbagbe siwo katã le atsiaƒua me la ku.+  Mawudɔla etɔ̃lia trɔ nu si le eƒe kplua me la kɔ ɖe tɔsisiwo me kple tsidzɔƒewo.+ Eye wotrɔ zu ʋu.+  Eye mese mawudɔla si kpɔ ŋusẽ ɖe tsiawo dzi la gblɔ be: “Wò, Ame si li,+ eye nènɔ anyi, wò, Nuteƒewɔla+ la, èle dzɔdzɔe, le esi nèdrɔ̃ ʋɔnu alea ta,+  esi wokɔ ame kɔkɔewo kple nyagblɔɖilawo ƒe ʋu ɖe anyi ta la,+ ètsɔ ʋu na wo be woano;+ eye wodze nɛ hã.”+  Eye mese vɔsamlekpui la gblɔ be: “Ɛ̃, Yehowa* Mawu, Ŋusẽkatãtɔ,+ wò ʋɔnudɔdrɔ̃wo* le eteƒe hele dzɔdzɔe.”+  Mawudɔla enelia trɔ nu si le eƒe kplua me la kɔ ɖe ɣe+ dzi, eye woɖe mɔ na ɣe be wòafiã ameawo.  Eye dzoxɔxɔ gã aɖe ɖu ameawo, gake wogblɔ busunyawo ɖe Mawu, ame si kpɔ ŋusẽ ɖe fuwɔame siawo dzi la ƒe ŋkɔ ŋu, eye wometrɔ dzi me, ne woatsɔ ŋutikɔkɔe anɛ o. 10  Mawudɔla atɔ̃lia trɔ nu si le eƒe kplua me la kɔ ɖe lã wɔadã la ƒe fiazikpui dzi. Eye eƒe fiaɖuƒe do viviti,+ eye amewo te aɖukliɖuɖu le woƒe vevesese la ta, 11  gake wogblɔ busunyawo ɖe dziƒo Mawu la ŋu le woƒe veveseseawo kple woƒe abiawo ta, eye wometrɔ dzi me tso woƒe dɔwɔwɔwo me o. 12  Mawudɔla adelia trɔ nu si le eƒe kplua me la kɔ ɖe Frat-tɔsisi+ gã la dzi, eye emetsi la mie,+ ne woadzra mɔ dzi ɖo na fia+ siwo tso ɣedzeƒe la. 13  Eye mekpɔ gbɔgbɔmenya makɔmakɔ etɔ̃ siwo le abe akpɔkplɔwo ene la, do tso ʋɔ driba+ la ƒe nu me kple lã wɔadã la ƒe nu me kpakple aʋatsonyagblɔɖila la ƒe nu me. 14  Le nyateƒe me la, wonye nya siwo tso gbɔgbɔ vɔ̃wo gbɔ, eye wowɔa dzesiwo,+ eye woyia anyigba blibo la dzi fiawo gbɔ be woaƒo wo nu ƒu hena Mawu Ŋusẽkatãtɔ+ la ƒe ŋkeke gã la ƒe aʋawɔwɔ.+ 15  “Kpɔ ɖa! Megbɔna abe fiafitɔ ene.+ Dzidzɔtɔe nye ame si nɔa ŋudzɔ,+ eye wòdzraa eƒe awudziwuiwo ɖo be wòagazɔ amama, eye amewo nakpɔ eƒe ŋukpeƒe o.”+ 16  Eye woƒo wo nu ƒu ɖe teƒe si woyɔna le Hebrigbe me be, Armagedon.*+ 17  Mawudɔla adrelia trɔ nu si le eƒe kplua me la kɔ ɖe yame. Eye gbe gã aɖe ɖi tso fiazikpui la gbɔ le kɔkɔeƒe+ la le gbɔgblɔm be: “Wowu enu!” 18  Eye dzi le dzo kem, gbeɖiɖi sesẽwo ɖi, dzi ɖe gbe, eye anyigba de asi ʋuʋu me sesĩe. Anyigba meʋuʋu sesĩe hede didiƒe nenema gbegbe kpɔ tso esime wowɔ amegbetɔ ɖe anyigba dzi o.+ 19  Eye du gã+ la ma ɖe akpa etɔ̃ me, eye dukɔwo ƒe duwo mu; eye Mawu ɖo ŋku Babilon Gã+ la dzi, ne wòatsɔ eƒe dɔmedzoe helĩhelĩ ƒe wainkplu la anɛ.+ 20  Azɔ hã, ƒukpowo katã sí, eye womegakpɔ towo o.+ 21  Eye kpetsi gã siwo dometɔ ɖe sia ɖe ƒe kpekpeme anɔ talento* ɖeka la, dza tso dziƒo ɖe ameawo dzi,+ eye ameawo gblɔ busunya ɖe Mawu ŋu le fu si kpetsi+ la wɔ wo la ta, elabena eƒe fuwɔame la nu sẽ wu gbɔgblɔ.

Etenuŋɔŋlɔ

Alo, “luʋɔ.”
Alo, “afiatsotsowo.”
Helagbe, Harmagedon, esia nye ale si woŋlɔa Hebrigbe me nya si fia “Megido To” le Helagbe me.
Helatɔwo ƒe talento ɖeka le kilogram 20.4. Kpɔ Megbenyawo B14.