Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Hebritɔwo 5:1-14

EMENYAWO ƑE TOTOƉEME

  • Yesu kɔ wu amegbetɔwo ƒe nunɔlagãwo (1-10)

    • Nunɔlae nènye abe Melkizedek ene (6, 10)

    • Esrɔ̃ toɖoɖo le fukpekpe me (8)

    • Edzie woato akpɔ ɖeɖe mavɔ (9)

  • Nuxɔxlɔ̃ le ɖeviwo ko nyenye ŋu (11-14)

5  Elabena nunɔlagã ɖe sia ɖe si wotia tso amegbetɔwo dome la, woɖonɛ be wòawɔ Mawu ƒe subɔsubɔdɔ ɖe amewo nu,+ ale be wòatsɔ nunanawo ana, eye wòasa vɔ ɖe nu vɔ̃wo ta.+  Etea ŋu sea veve ɖe ame siwo wɔa nu le manyamanya me kple ame siwo daa vo la nu, le esi gbɔdzɔgbɔdzɔ le eya ŋutɔ hã ŋu ta,  eye esia tae wòle nɛ be wòasa vɔ ɖe eya ŋutɔ ƒe nu vɔ̃wo ta abe ale si ko wòwɔnɛ ɖe dukɔ la ta ene.+  Ame aɖeke metiaa bubunɔƒe sia na eɖokui o, negbe ɖe Mawu yɔe ko hafi, abe ale si wòyɔ Aron ene.+  Nenema kee Kristo la hã medo eɖokui ɖe dzi+ heɖo eɖokui nunɔlagãe o, ke boŋ Ame si gblɔ nɛ be: “Vinyee nènye; mezu fofowò egbe,”+ lae doe ɖe dzi.  Abe ale si wògagblɔ le teƒe bubu hã be, “Nunɔlae nènye abe Melkizedek ene tegbee.”+  Le Kristo ƒe anyigbadzigbenɔnɔ me* la, etsɔ ɣlidodo sesĩwo kple aɖatsiwo ƒo koko heɖe kuku vevie+ na Ame si te ŋu ɖee tso ku me la, eye wòɖo toe le eƒe mawuvɔvɔ̃ ta.  Togbɔ be vi wònye hã la, esrɔ̃ toɖoɖo le fu siwo wòkpe la me.+  Eye esi wona wòzu blibo vɔ la,+ eva zu ame si dzi ame siwo katã ɖoa toe la tona kpɔa ɖeɖe mavɔ,+ 10  elabena Mawu ŋutɔe da ŋkɔ ɖe edzi be enye nunɔlagã abe Melkizedek ene.+ 11  Nya geɖewo li míagblɔ tso eya amea ŋu, gake wo me ɖeɖe sesẽ, le esi nugɔmesese* zu dɔ na mi ta. 12  Elabena va ɖo fifia la, ɖe wòle be mianye nufialawo hafi, gake egahiã be woafia Mawu ƒe gbedeasi kɔkɔeawo ƒe gɔmedzenuwo+ mi tso nu gbãtɔwo dzi, eye miegatrɔ zu ame siwo hiã notsi, ke menye nuɖuɖu sesẽ o. 13  Elabena ame sia ame si gakpɔtɔ noa notsi la, menya naneke le dzɔdzɔenyenye ƒe nya la ŋu o, elabena ɖevi ko wòganye.+ 14  Ke ame tsitsiwo tɔe nye nuɖuɖu sesẽ, ame siwo na hehe woƒe nugɔmeseseŋutetewo to wo zazã me, be woate ŋu ade vovo nyui kple vɔ̃ dome.

Etenuŋɔŋlɔ

Egɔmeɖeɖe tẽe, “ŋutilãmenɔɣi.”
Alo, “nusese.”