Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Dɔwɔwɔwo 28:1-31

EMENYAWO ƑE TOTOƉEME

  • Woɖi go ɖe Malta (1-6)

  • Woyɔ dɔ Publio fofo (7-10)

  • Wodze mɔ ɖo ta Roma (11-16)

  • Paulo ƒo nu na Yudatɔwo le Roma (17-29)

  • Paulo ɖe gbeƒã kple dzideƒo ƒe eve (30, 31)

28  Míeɖi go dedie vɔ hafi va nya be Malta ƒukpoa dzie míeva do ɖo.+  Eye dutagbedola mawo* nyo dɔme na mí eteƒe mekɔ o. Esi tsi nɔ dzadzam eye vuvɔ nɔ wɔwɔm ta la, wodo dzo na mí be míaƒu, eye woxɔ mí katã hekpe ɖe mía ŋu.  Ke esi Paulo fɔ nake wuwluiwo tsɔ de dzoa me la, da aɖe do tso wo me le dzoxɔxɔ la ta, eye wòxatsa ɖe eƒe asi ŋu.  Esi dutagbedola mawo kpɔ da vɔ̃ɖi sia wòxatsa ɖe eƒe asi ŋu la, wogblɔ na wo nɔewo be: “Amewula kokokoe ame sia nye, eye togbɔ be edo le ƒua me dedie hã la, Ʋɔnu Dzɔdzɔe Drɔ̃la* la meɖe mɔ nɛ be wòayi edzi anɔ agbe o.”  Gake eʋuʋu da la ɖe dzoa me, eye nu vevi aɖeke mewɔe o.  Ke woawo le mɔ kpɔm be atè, alo adze anyi aku enumake. Esi wolala ɣeyiɣi didi aɖe, eye wokpɔ be nu vevi aɖeke mewɔe o la, wotrɔ susu hegblɔ be mawu aɖee.  Ke amegã aɖe le ƒukpo sia dzi, si ŋkɔe nye Publio, ame si ƒe anyigbawo te ɖe afi ma ŋu. Exɔ mí nyuie hena míedze egbɔ ŋkeke etɔ̃ sɔŋ.  Ke edzɔ be, Publio fofo le anyimlɔƒe, elabena asrã lée eye wòle kpeta hã dem; Paulo yi egbɔ, do gbe ɖa, da eƒe asiwo ɖe edzi, eye wòyɔ dɔe.+  Le nudzɔdzɔ sia megbe la, dɔnɔ bubu siwo le ƒukpoa dzi la de asi egbɔ vava me, eye wòda dɔ na wo.+ 10  Wode bubu mía ŋu hena nu geɖe mí, eye esi míeɖo tɔdziʋu le dzodzom la, wotsɔ nu sia nu si míahiã la do agba na míaƒe tɔdziʋua. 11  Le ɣleti etɔ̃ megbe la, míeɖo ʋu aɖe si ŋu woŋlɔ ɖo be “Zeus Viwo.” Tɔdziʋu sia tso Aleksandria eye wòva tsi ƒukpoa dzi le vuvɔŋɔli la. 12  Esi míeva dze ɖe Sirakusa la, míenɔ afi ma ŋkeke etɔ̃; 13  eye tso afi ma míeva ɖo Regio. Le ŋkeke ɖeka megbe la, anyieheya aɖe ƒo, eye míeva ɖo Puteoli le ŋkeke evea gbe. 14  Míekpɔ nɔvi aɖewo le afi sia, eye woɖe kuku na mí vevie be míanɔ yewo gbɔ ŋkeke adre; emegbe míeɖo ta Roma. 15  Esi nɔviawo se mía ŋkɔ la, wotso afi ma va kpe mí le keke Apio-si me kple Amedzrodzeƒe Etɔ̃awo ke. Esi Paulo kpɔ wo la, eda akpe na Mawu, eye dzi ɖo eƒo.+ 16  Esi míeɖo Roma mlɔeba la, woɖe mɔ na Paulo be wòanɔ eɖokui si, gake asrafo nanɔ eŋu dzɔm. 17  Ke le ŋkeke etɔ̃ megbe la, eyɔ Yudatɔwo ƒe amegãwo vɛ. Esi wova ƒo ƒu la, egblɔ na wo be: “Ŋutsuwo, nɔviwo, togbɔ be nyemewɔ naneke si tsi tsitre ɖe dukɔ la alo mía tɔgbuiwo ƒe kɔnuwo+ ŋu o hã la, wode gam tso Yerusalem, eye wotsɔm de asi na Romatɔwo.+ 18  Esi ame siawo ku nya la me+ vɔ la, wodi be yewoaɖe asi le ŋunye, elabena nyemewɔ naneke si dze ku o.+ 19  Ke esi Yudatɔwo melɔ̃ ɖe edzi o ta la, eva hiã be mabia be Kaisaro nagbugbɔ nye nya la adrɔ̃ nam,+ ke hã, menye abe ɖe metsɔ nya ɖe nye dukɔa ŋu ene o. 20  Susu sia tae mebia be woana makpɔ mi ne maƒo nu kpli mi ɖo, elabena ame si Israel le mɔ kpɔm na la tae kɔsɔkɔsɔ sia le ŋunye ɖo.”+ 21  Wogblɔ nɛ be: “Míexɔ agbalẽ aɖeke tso Yudea le ŋuwò o, eye nɔvi siwo tso afi ma va la dometɔ aɖeke hã meƒo nu alo gblɔ nya vɔ̃ aɖeke tso ŋuwò o. 22  Ke míekpɔe be esɔ be míase nu si le susu me na wò, elabena le nyateƒe me la, míenyae be woƒoa nu tsia tre ɖe kɔmama sia ŋu+ le afi sia afi.”+ 23  Eya ta woɖo ŋkeke si woava kpe kplii la nɛ, eye ame siwo va egbɔ le afi si wòdze la sɔ gbɔ ŋutɔ. Eye wòɖi ɖase le Mawu Fiaɖuƒe la ŋu tsitotsito tsɔ ɖe nya la me na wo tso ŋdi va se ɖe fiẽ, eye wòna kpeɖodzi wo tso Mose ƒe Se+ la kple Nyagblɔɖilawo ƒe agbalẽwo+ me ku ɖe Yesu ŋu.+ 24  Wo dometɔ aɖewo xɔ nya siwo wògblɔ la dzi se; bubuawo mexɔ edzi se o. 25  Esi woƒe nu mesɔ o, eye wonɔ dzodzom la, Paulo gblɔ nya ɖeka sia na wo be: “Gbɔgbɔ kɔkɔe la gblɔe nyuie to nyagblɔɖila Yesaya dzi na mia tɔgbuiwo 26  be, ‘Yi dukɔ sia gbɔ nàgblɔ na wo be: “Miasee baa, gake miase egɔme akpɔ o; eye miakpɔ nu baa, gake miadze sii gbeɖe o.+ 27  Elabena dukɔ sia ƒe dzi ku atri, wosee kple woƒe towo, ke womewɔ edzi o, eye womia woƒe ŋkuwo, ne woagakpɔ nu kple woƒe ŋkuwo, eye woase nu kple woƒe towo, eye woatsɔ woƒe dziwo ase egɔme, be woatrɔ ne mada gbe le wo ŋu o.” ’+ 28  Eya ta nenɔ nyanya na mi be woɖo Mawu ƒe xɔxɔdɔ sia ɖe dukɔwo;+ woawo ya woaɖo toe godoo.”+ 29  * —— 30  Ale wònɔ afi ma le xɔ si eya ŋutɔ haya+ me ƒe eve blibo, eye wòxɔa ame siwo vaa egbɔ la nyuie. 31  Eɖea gbeƒã na wo tso Mawu Fiaɖuƒe la ŋu, eye wòfiaa nu siwo ku ɖe Aƒetɔ Yesu Kristo ŋu la wo faa*+ mɔxeɖenu aɖeke manɔmee.

Etenuŋɔŋlɔ

Alo, “afi ma tɔwo.”
Helagbe me nya Dike, si anya nye mawunɔ si biaa hlɔ̃ ɖe eteƒe loo alo anye susu si le ameawo si le nu dzɔdzɔe wɔwɔ ŋu.
Alo, “kple dzideƒo.”