Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Dɔwɔwɔwo 12:1-25

EMENYAWO ƑE TOTOƉEME

  • Wowu Yakobo; wode Petro gaxɔ me (1-5)

  • Woɖe Petro nukutɔe (6-19)

  • Mawudɔla aɖe ƒo Herodes (20-25)

12  Ɣeyiɣi mawo me la, fia Herodes de asi ŋutasesẽ le hame la me tɔ aɖewo ŋu me.+  Ewu Yakobo si nye Yohanes nɔvi+ kple yi.+  Esi wòkpɔ be esia dzɔ dzi na Yudatɔwo ta la, elé Petro hã. (Nu sia dzɔ le Amɔwɔ Maʋamaʋã Bolo Ŋkekenyui la ɖuɣi.)+  Esi eƒe asi su edzi la, edee gaxɔ me,+ eye wòtsɔe de asi na asrafoha ene siwo dometɔ ɖe sia ɖe me asrafo ene le la be woanɔ wo nɔewo ɖɔlim eye woadzɔ eŋu, elabena eɖoe be yeakplɔe ava* dukɔa ŋkume le Ŋutitotoŋkekenyui la megbe.  Eya ta wonɔ Petro ŋu dzɔm le gaxɔa me, ke hame la nɔ gbe dom ɖa vevie na Mawu ɖe eta.+  Ke le zã si do ŋgɔ na gbe si gbe Herodes akplɔe ava dutoƒo me la, Petro nɔ alɔ̃ dɔm hele babla le kɔsɔkɔsɔ eve me le asrafo eve dome, eye dzɔla siwo le ʋɔtrua nu la le gaxɔa ŋu dzɔm.  Kasia, Yehowa* ƒe dɔla va tsi tsitre ɖe afi ma,+ eye kekeli aɖe klẽ ɖe gaxɔa me. Eye wòƒo Petro ƒe axadame eye wònyɔe hegblɔ be: “Fɔ kaba!” Ale kɔsɔkɔsɔawo ge le asi ŋu nɛ.+  Mawudɔla la gblɔ nɛ be: “Dzra ɖo,* eye nàdo wò afɔkpawo.” Ewɔe nenema. Mlɔeba egblɔ nɛ be: “Do wò awudziwui la nàdze yonyeme.”  Eye wòdo go hedze eyome, ke menya be nu ŋutɔŋutɔe nu si le dzɔdzɔm to mawudɔlaa dzi la nye o. Le nyateƒe me la, esusu be ŋutega kpɔmee yele. 10  Esi woto dzɔla gbãtɔwo kple eveliawo ŋu la, wova ɖo gagbo, si nu wotona yia dua me la nu, eye agboa ŋutɔ ʋu na wo le eɖokui si. Esi wodo go la, wozɔ ɖo mɔdodo aɖe dzi, eye enumake mawudɔla la dzo le egbɔ. 11  Esi Petro nyɔ le eɖokui me la, egblɔ be: “Azɔ menyae vavã be Yehowa* dɔ eƒe dɔla ɖa wòva ɖem tso Herodes si me, kple nu siwo katã Yudatɔwo le mɔ kpɔm na la me.”+ 12  Esi wòkpɔe alea la, eyi Yohanes si wogayɔna be Marko+ la dada Maria ƒe me, afi si ame geɖewo ƒo ƒu ɖo le gbe dom ɖa le. 13  Esi wòƒo agboa la, dɔlanyɔnuvi aɖe si ŋkɔe nye Roda la do va be yeakpɔ ɖa be ame kae hã. 14  Esi wòse Petro ƒe gbe la, dzi dzɔe ale gbegbe be meʋu agboa o, ke boŋ eƒu du yi aƒea me ɖagblɔ na wo be Petro le tsitre ɖe agboa nu. 15  Wogblɔ nɛ be: “Aɖaʋa dzem nèle.” Ke eka ɖe edzi na wo be nyateƒee. Ale wogblɔ be: “Eƒe mawudɔlae.” 16  Ke Petro kpɔtɔ le afi ma le agboa ƒom. Esi woʋu agboa la, wokpɔe, eye gbɔgblɔ bu ɖe wo. 17  Ke ewɔ asi na wo be woazi ɖoɖoe, eye wògblɔ ale si Yehowa* ɖee tso gaxɔa me la na wo tsitotsito, eye wògblɔ be: “Mika nya siawo ta na Yakobo+ kple nɔviawo.” Eye wòdzo le afi ma yi teƒe bubu. 18  Esi ŋu ke la, asrafoawo tɔtɔ ale gbegbe le nu si anya dzɔ ɖe Petro dzi la ŋuti. 19  Herodes na wodii nyuie, eye esi mekpɔe o la, ebia gbe asrafoawo tsitotsito, eye wòɖe gbe be woakplɔ wo ayi aɖahe to na wo;+ ale wòdzo le Yudea yi Kaisarea henɔ afi ma vie. 20  Ke dɔme le evem vevie ɖe Tirotɔwo kple Sidontɔwo ŋu. Eya ta wova egbɔ kple nu sɔsɔe, eye esi wokpɔ fia ƒe aƒedzikpɔla Blasto wòlɔ̃ ɖe edzi na wo vɔ la, wobiae be yewoawɔ ŋutifafa kple fia la, elabena fia la ƒe anyigba dzie woƒe dukɔa kpɔa nuɖuɖu tsona. 21  Ke le ŋkeke ɖoɖi aɖe dzi la, Herodes do fiawu, eye wòbɔbɔ nɔ ʋɔnudrɔ̃zikpui la dzi hede asi nuƒoƒo me na wo. 22  Eye ame siwo kpe ta la nɔ ɣli dom be: “Mawu ƒe gbee, menye amegbetɔ tɔe o!” 23  Enumake Yehowa* ƒe dɔla ƒoe, elabena metsɔ ŋutikɔkɔe na Mawu o, eye ŋɔwo ɖui wòku. 24  Ke Yehowa* ƒe nya kaka ɖe edzi de teƒeteƒewo.+ 25  Esi Barnaba+ kple Saul wu kpekpeɖeŋunadɔ la nu le Yerusalem+ la, wotrɔ gbɔ, eye wokplɔ Yohanes+ si wogayɔna be Marko la ɖe asi.

Etenuŋɔŋlɔ

Alo, “yeakplɔe ado goe adrɔ̃ ʋɔnui le.”
Alo, “Bla ali dzi.”