Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

5 Mose 34:1-12

EMENYAWO ƑE TOTOƉEME

  • Yehowa tsɔ anyigba la fia Mose (1-4)

  • Mose ƒe ku (5-12)

34  Azɔ Mose dzo le Moab tagba helia Nebo To+ la yi Pisga To,+ si dze ŋgɔ Yeriko+ la, tame. Eye Yehowa tsɔ anyigba blibo la katã fiae, tso Gilead va se ɖe Dan,+  kple Naftali blibo la katã kple Efrayim kple Manase-nyigba kpakple Yuda-nyigba blibo la katã, va se ɖe ɣetoɖoƒeƒu* la nu,+  kple Negeb*+ kple Yordan Nuto+ la, gbadzaƒe si le Yeriko Bali me, devedu la, va se ɖe keke Zoar ke.+  Yehowa gblɔ nɛ be: “Esiae nye anyigba si ŋu meka atam ɖo na Abraham, Isak kple Yakob, be: ‘Wò dzidzimeviwo matsɔe ana.’+ Mena nèkpɔe kple wò ŋkuwo, gake mèle tɔa tso ge ayi afi ma o.”+  Ema megbe Yehowa ƒe subɔla Mose ku le afi ma le Moab-nyigba dzi abe ale si Yehowa gblɔe ene.+  Eye wòɖii ɖe bali la me le Moab-nyigba dzi, le Bet-Peor ŋgɔ, eye ame aɖeke menya afi si eƒe yɔdo le o va se ɖe egbe sia.+  Mose xɔ ƒe alafa ɖeka blaeve hafi ku.+ Eƒe ŋkuwo metsi o, eye ŋusẽ mevɔ le eŋu o.  Israel-viwo fa Mose le Moab tagba ŋkeke blaetɔ̃.+ Emegbe ŋkeke siwo wotsɔ fa Mose la wu enu.  Nunya ƒe gbɔgbɔ yɔ Yosua, Nun vi la fũu, elabena Mose da asi ɖe eya amea dzi;+ eye Israel-viwo te toɖoɖoe, eye wowɔ abe ale si tututu Yehowa de se na Mose ene.+ 10  Gake nyagblɔɖila aɖeke meganɔ Israel kpɔ, abe Mose,+ ame si Yehowa nya ŋkume kple ŋkume ene o.+ 11  Ewɔ dzesi kple nukunu siwo katã Yehowa dɔe be wòawɔ le Egipte-nyigba dzi ɖe Farao kple eƒe subɔviwo katã kpakple eƒe anyigba blibo la katã ŋu la,+ 12  hekpe ɖe ŋusẽdɔ kple nu klitsu siwo katã Mose wɔ le Israel blibo la ŋkume la ŋu.+

Etenuŋɔŋlɔ

Efia, Ƒu Gã la, si nye Domeƒu.
Alo, “Anyiehe.”