Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

4 Mose 3:1-51

EMENYAWO ƑE TOTOƉEME

  • Aron viŋutsuwo (1-4)

  • Wotia Lewi viwo be woawɔ subɔsubɔdɔ (5-39)

  • Ŋgɔgbeviŋutsu ta ƒeƒle (40-51)

3  Ke ame siawoe nye Aron kple Mose viwo* le gbe si gbe Yehowa ƒo nu kple Mose le Sinai To la dzi.+  Aron viŋutsuwo ƒe ŋkɔwoe nye esi: eƒe ŋgɔgbevi Nadab, eyome Abihu,+ Eleazar+ kple Itamar.+  Ame siawoe nye Aron viŋutsu siwo wosi ami na heɖo nunɔlawoe.+  Ke Nadab kple Abihu ku le Yehowa ŋkume esi wodo dzo si ŋu womeɖe mɔ ɖo o le Yehowa ŋkume+ le Sinai gbedzi; vi aɖeke menɔ wo si o. Ke Eleazar+ kple Itamar+ ya yi edzi wɔ nunɔladɔ kpe ɖe wo fofo Aron ŋu.  Yehowa gblɔ na Mose be:  “Na Lewi-to+ la nate va nunɔla Aron gbɔ ne woawɔ subɔsubɔdɔ+ nɛ.  Woawɔ subɔsubɔdɔ na eya kple ha blibo la katã le takpegbadɔa ŋgɔ, eye woawɔ avɔgbadɔa me dɔwo.  Woakpɔ takpegbadɔa ŋu nuwo katã dzi,+ eye woawɔ avɔgbadɔa me dɔwo+ ɖe Israel-viwo nu.  Eye nàtsɔ Lewi viwo ade asi na Aron kple viaŋutsuwo. Woawoe nye ame siwo woɖe tso Israel-viwo dome tsɔ na.+ 10  Eye nàɖo Aron kple viaŋutsuwo ne woawɔ woƒe nunɔladɔ,+ ame sia ame si womeɖe mɔ na o* si ate va la, woawui.”+ 11  Yehowa gagblɔ na Mose be: 12  “Kpɔ ɖa, meɖe Lewi viwo tso Israel-viwo dome be woaxɔ ɖe ŋgɔgbeviwo katã* teƒe le Israel-viwo dome,+ ale be Lewi viwo nazu tɔnye. 13  Elabena ŋgɔgbeviwo katã tɔnyee wonye.+ Gbe si gbe mewu ŋgɔgbeviwo katã le Egipte-nyigba dzi la,+ mekɔ amegbetɔwo kple lãwo siaa ƒe ŋgɔgbeviwo ŋu le Israel na ɖokuinye+ be woazu tɔnye. Nyee nye Yehowa.” 14  Yehowa gagblɔ na Mose le Sinai gbedzi+ be: 15  “Ŋlɔ Lewi viwo ŋkɔ le wo fofowo ƒe aƒekɔwo kple woƒe ƒomewo nu. Ŋlɔ ŋutsu siwo katã xɔ tso ɣleti ɖeka la ŋkɔ.”+ 16  Eye Mose ŋlɔ wo ŋkɔ abe ale si tututu Yehowa de se nɛ ene. 17  Lewi viwo ƒe ŋkɔwoe nye esi: Gerson, Kohat, kple Merari.+ 18  Gerson viwo ƒe ŋkɔwo le woƒe ƒomewo nue nye, Libni kple Simei.+ 19  Kohat viwo ƒe ŋkɔ le woƒe ƒomewo nue nye Amram, Yizhar, Hebron kple Uziel.+ 20  Merari viwo ƒe ŋkɔ le woƒe ƒomewo nue nye Mahli+ kple Musi.+ Esiawoe nye Lewi ƒomeawo le wo fofowo ƒe aƒekɔwo nu. 21  Ƒome siwo dzɔ tso Gerson mee nye Libni viwo+ kple Simei viwo ƒe ƒomewo. Esiawoe nye Gerson viwo ƒe ƒomewo. 22  Woƒe ŋutsu siwo katã xɔ tso ɣleti ɖeka siwo ŋkɔ woŋlɔ la le ame akpe adre alafa atɔ̃.+ 23  Gerson viwo ƒe ƒomeawo ƒu asaɖa anyi ɖe avɔgbadɔ+ la megbe le ɣetoɖoƒe gome. 24  Gerson viwo ƒe tatɔ si le wo fofowo ƒe aƒekɔ nue nye Eliyasaf, Lael vi. 25  Takpegbadɔ la ŋuti dɔ siwo gbɔ Gerson viwo+ akpɔe nye agbadɔvɔ+ la, etamegbanu+ la kple takpegbadɔa ƒe mɔnuvɔ+ la, 26  avɔ+ si wotsɔ tɔ kpɔ ɖe xɔxɔnu la, kple kpɔtɔtɔ si ƒo xlã avɔgbadɔ la kple vɔsamlekpui la ƒe kpɔnuvɔ+ kpakple eŋu kawo, kple eŋu dɔwo katã. 27  Ƒome siwo dzɔ tso Kohat mee nye Amram viwo, Yizhar viwo, Hebron viwo kple Uziel viwo ƒe ƒomewo. Esiawoe nye Kohat viwo ƒe ƒomeawo.+ 28  Ŋutsu siwo katã xɔ tso ɣleti ɖeka la le ame akpe enyi alafa ade; woawoe nye ame siwo kpɔa kɔkɔeƒe la ŋuti dɔwo gbɔ.+ 29  Kohat viwo ƒe ƒomeawo ƒu asaɖa anyi ɖe avɔgbadɔ la ƒe anyiehe gome.+ 30  Kohat viwo ƒe tatɔ si le wo fofowo ƒe aƒekɔ nue nye Elizafan, Uziel vi.+ 31  Woƒe dɔe nye be woakpɔ Aɖaka+ la, kplɔ̃+ la, akaɖiti+ la, vɔsamlekpuiawo,+ kɔkɔeƒe la ŋu nu siwo+ wotsɔna wɔa subɔsubɔdɔe, kple xɔmetsovɔ+ la kpakple wo ŋu dɔwo katã gbɔ.+ 32  Lewi viwo ƒe tatɔwo ƒe ŋgɔnɔlae nye nunɔla Aron vi Eleazar,+ eye eyae kpɔa ame siwo wɔa kɔkɔeƒe la ŋu dɔwo dzi. 33  Ƒome siwo dzɔ tso Merari mee nye Mahli viwo kple Musi viwo ƒe ƒomewo. Esiawoe nye Merari ƒe ƒomeawo.+ 34  Woƒe ŋutsu siwo katã xɔ tso ɣleti ɖeka siwo ŋkɔ woŋlɔ la le ame akpe ade alafa eve.+ 35  Merari ƒomeawo ƒe tatɔ si le wo fofowo ƒe aƒekɔ nue nye Zuriel, Abihayil vi. Woƒu asaɖa anyi ɖe avɔgbadɔ la ƒe dziehe gome.+ 36  Merari viwo ƒe dɔe nye be woakpɔ avɔgbadɔ la ƒe ʋuƒowo,+ eƒe xɔblatiwo,+ eƒe sɔtiwo,+ eƒe anyinɔwo kple eŋu nuwo katã+ kpakple wo ŋu dɔwo katã gbɔ,+ 37  hekpe ɖe xɔxɔnu si ƒo xlãe godoo la ƒe sɔtiwo, woƒe anyinɔwo,+ woƒe tsyotiwo kple wo ŋu kawo ŋuti. 38  Mose kple Aron kpakple Aron viwo ƒu asaɖa anyi ɖe avɔgbadɔ la ŋgɔ le takpegbadɔ la ƒe ɣedzeƒe gome. Woƒe dɔe nye be woawɔ kɔkɔeƒe la me dɔwo ɖe Israel-viwo nu. Eye ame sia ame si womeɖe mɔ na o* si ate va la, woawui.+ 39  Lewi viwo ƒe ŋutsu siwo katã xɔ tso ɣleti ɖeka, siwo ŋkɔ Mose kple Aron ŋlɔ le woƒe ƒomeawo nu abe ale si Yehowa de see ene la, le ame akpe blaeve vɔ eve. 40  Yehowa gagblɔ na Mose be: “Ŋlɔ Israel-viwo ƒe ŋgɔgbeviŋutsu siwo katã xɔ tso ɣleti ɖeka+ la ŋkɔ kple woƒe xexlẽme ɖi. 41  Eye nàtsɔ Lewi viwo anam ɖe Israel-viwo ƒe ŋgɔgbeviwo katã teƒe,+ eye nàtsɔ Lewi viwo ƒe aƒemelãwo anam ɖe Israel-viwo ƒe aƒemelãwo ƒe vi gbãtɔwo katã teƒe+—nyee nye Yehowa.” 42  Ale Mose ŋlɔ Israel-viwo ƒe ŋgɔgbeviwo katã ŋkɔ, abe ale si tututu Yehowa de se nɛ ene. 43  Ŋgɔgbeviŋutsu siwo katã xɔ tso ɣleti ɖeka siwo ŋkɔ woŋlɔ la ƒe xexlẽme va le ame akpe blaeve vɔ eve alafa eve blaadre vɔ etɔ̃. 44  Yehowa gagblɔ na Mose be: 45  “Tia Lewi viwo ɖe Israel-viwo ƒe ŋgɔgbeviwo katã teƒe, kple Lewi viwo ƒe aƒemelãwo ɖe woƒe aƒemelãwo teƒe, eye Lewi viwo nazu tɔnye. Nyee nye Yehowa. 46  Eye woaxe fe ɖe+ Israel-viwo ƒe ŋgɔgbevi alafa eve blaadre vɔ etɔ̃, siwo wotsɔ sɔ gbɔ wu Lewi viwo+ la ta. 47  Xɔ sekel* atɔ̃ ɖe ame ɖeka ta.+ Nàxɔe ɖe teƒe kɔkɔe la ƒe sekel* la nu. Sekel ɖeka le gera* blaeve.+ 48  Eye nàtsɔ ga la ana Aron kple viaŋutsuwo wòanye ame siwo wotsɔ sɔ gbɔ wu woe la ƒe tafe.” 49  Eya ta Mose xɔ ame xexlẽme si wotsɔ sɔ gbɔ wu Lewi viwoe la ƒe taƒlega le wo si wònye wo tafe. 50  Israel-viwo ƒe ŋgɔgbeviwo sie wòxɔ ga la le. Sekel akpe ɖeka alafa etɔ̃ blaade vɔ atɔ̃ ye wòxɔ, le teƒe kɔkɔe la ƒe sekel la nu. 51  Eye Mose tsɔ ga si wotsɔ xe tafee la na Aron kple viaŋutsuwo le Yehowa ƒe nya* la nu, abe ale si tututu Yehowa de se na Mose ene.

Etenuŋɔŋlɔ

Egɔmeɖeɖe tẽe, “ƒe dzidzimeviwo.”
Egɔmeɖeɖe tẽe, “Ame tutɔ,” efia, ame si metso Aron ƒe ƒomea me o.
Egɔmeɖeɖe tẽe, “ŋgɔgbevi siwo katã ʋu dɔ nu.”
Egɔmeɖeɖe tẽe, “Ame tutɔ,” efia, ame si menye Lewi vi o.
Sekel ɖeka le gram 11.4. Kpɔ Megbenyawo B14.
Alo, “Sekel kɔkɔe.”
Gera ɖeka le gram 0.57. Kpɔ Megbenyawo B14.
Egɔmeɖeɖe tẽe, “numenya.”