4 Mose 27:1-23

  • Zelofehad vinyɔnuwo (1-11)

  • Wotia Yosua be wòaxɔ ɖe Mose teƒe (12-23)

27  Eye Zelofehad,+ ame si nye Hefer vi, Gilead vi, Makir vi, Manase vi, tso Yosef vi Manase ƒe ƒomea me la, ƒe vinyɔnuwo va. Vianyɔnuawo ƒe ŋkɔwoe nye Mahla, Noa, Hogla, Milka kple Tirza.  Wova tɔ ɖe Mose, nunɔla Eleazar, tatɔawo,+ kple ha blibo la ŋkume le takpegbadɔa nu gblɔ be:  “Mía fofo ku le gbea dzi, eye menɔ Kora+ kple eƒe ha si tso ɖe Yehowa ŋu la dome o, ke eya ŋutɔ ƒe nu vɔ̃ tae wòku ɖo, evɔ viŋutsu aɖeke mele esi o.  Nu ka tae mía fofo ƒe ŋkɔ abu le eƒe ƒomea me le esi viŋutsu aɖeke mele esi o ta? Míeɖe kuku, na anyigba mí ɖe mía fofo nɔviŋutsuwo dome.”  Ale Mose tsɔ woƒe nya la ɖo Yehowa ŋkume.+  Eye Yehowa gblɔ na Mose be:  “Zelofehad vinyɔnuwo ƒe nya la le eme. Eya ta na domenyinu wo ɖe wo fofo nɔviŋutsuwo dome, eye nàna wo fofo ƒe domenyinu la nayi ɖe wo si me.+  Gblɔ na Israel-viwo be, ‘Ne ŋutsu aɖe ku, evɔ viŋutsu aɖeke mele esi o la, ekema vianyɔnu nanyi eƒe dome.  Eye ne vinyɔnu aɖeke mele esi o la, ekema nɔviaŋutsuwo nanyi eƒe dome. 10  Eye ne nɔviŋutsu aɖeke mele esi o la, ekema fofoa nɔviŋutsuwo nanyi eƒe dome. 11  Eye ne nɔviŋutsu aɖeke mele fofoa si o la, ekema ame si nye eƒe ƒometɔ kplikplikpli nanyi eƒe dome. Esia nanye se kple ɖoɖo na Israel-viwo, abe ale si tututu Yehowa de se na Mose ene.’” 12  Emegbe Yehowa gblɔ na Mose be: “Lia Abarim+ to sia, ne nàkpɔ anyigba si matsɔ ana Israel-viwo la ɖa.+ 13  Ne èkpɔe vɔ la, ekema woatsɔ wò hã akpe ɖe tɔgbuiwòwo ŋu,*+ abe ale si ko wotsɔ nɔviwò Aron kpe ɖe wo ŋu ene,+ 14  elabena esime ha la wɔ dzre kplim le Zin gbedzi la, miewɔ ɖe nye se dzi hekɔ ŋunye le wo ŋkume esime mena tsi wo o.+ Esiae nye Meriba+ tsi le Kades+ le Zin gbedzi.”+ 15  Eye Mose gblɔ na Yehowa be: 16  “Yehowa, Mawu si naa agbegbɔgbɔ amewo* katã la, natia ame aɖe aɖo ha la nu, 17  ame si anɔ wo ŋgɔ ayi kpli wo agagbɔ kpli wo, ame si akplɔ wo adoe agakplɔ wo agbɔe, ne Yehowa ƒe ha la naganɔ abe alẽ siwo nu kplɔla mele o ene o.” 18  Eye Yehowa gblɔ na Mose be: “Kplɔ Yosua, Nun viŋutsu si me gbɔgbɔ nyui aɖe le la, nàtsɔ wò asi aɖo edzi.+ 19  Eye nàna wòatɔ ɖe nunɔla Eleazar kple ha blibo la ŋkume, eye nàɖoe kplɔlae.+ 20  Eye nàna wò ŋusẽ* la ƒe ɖee,+ ne Israel ƒe ha blibo la katã naɖo toe.+ 21  Nunɔla Eleazar ŋkumee wòatɔ ɖo ne wòatsɔ Urim+ la abia nu nɛ le Yehowa ŋkume atsɔ akpɔ nya gbɔe. Eƒe gbeɖeɖe nue eya kple Israel ƒe ha blibo la ado go le, eye eƒe gbeɖeɖe nue woatrɔ agbɔ le.” 22  Eya ta Mose wɔ abe ale si tututu Yehowa de se nɛ ene. Eye wòkplɔ Yosua va nunɔla Eleazar kple ha blibo la ŋkume, 23  eye wòtsɔ eƒe asi ɖo edzi heɖoe kplɔlae,+ abe ale si tututu Yehowa gblɔ na Mose ene.+

Etenuŋɔŋlɔ

Esia nye nya si wozãna ne wole nu ƒom tso ku ŋu.
Egɔmeɖeɖe tẽe, “naa agbegbɔgbɔ ŋutilãwo.”
Alo, “bubu.”