Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

4 Mose 11:1-35

EMENYAWO ƑE TOTOƉEME

  • Liʋiliʋĩlilĩ na dzo tso Yehowa gbɔ (1-3)

  • Dukɔa fa avi ɖe lã ta (4-9)

  • Mose bui be agba wu tsɔtsɔ na ye (10-15)

  • Yehowa na gbɔgbɔ kɔkɔea ametsitsi 70-awo (16-25)

  • Eldad kple Medad; Yosua ʋã ŋu ɖe Mose nu (26-30)

  • Tegliwo ɖoɖo ɖa; wohe to na dukɔa le ŋukeklẽ ta (31-35)

11  Ke dukɔ la de asi liʋiliʋĩlilĩ me vevie le Yehowa ŋkume. Esi Yehowa see la, eƒe dɔmedzoe bi ɖe wo ŋu, eye dzo tso Yehowa gbɔ va fiã wo dometɔ aɖewo le asaɖa la ƒe mlɔenu.  Esi dukɔ la de asi ɣlidodo me na Mose la, eƒo koko na Yehowa,+ eye dzo la tsi.  Ale wona ŋkɔ teƒe la be Tabera,* elabena afi mae dzo tso Yehowa gbɔ va fiã amewo le.+  Eye ɖokuitɔdidi ƒe dzodzro+ ho ɖe ame vovovowo ƒe ha*+ si le wo dome la me, eye Israel-viwo hã gade asi avifafa me be: “Ame ka gɔ̃e ana lã mí míaɖu?+  Aleke míeheɖo ŋku tɔmelã siwo míeɖuna le Egipte femaxee kpakple aŋanyi, adzamatre, sabala vovovowo kple gbegãdzi* dzii ale!+  Ke azɔ nu te mía* ŋu belibeli. Míele naneke kpɔm le afi sia tsɔ wu mana+ sia ko o.”  Ke mana+ la le abe korianda ku+ ene, eye wòfu abe bedolak-ti me tsi ene.  Dukɔ la doa go yina ɖafɔnɛ; wotunɛ le té dzi alo tonɛ le to me, woɖanɛ le ze me alo tsɔnɛ ƒoa abolo nogoe;+ evivina abe tatali ene.  Ne zãmu dza ɖe asaɖa la me le zã me la, mana la hã dzana.+ 10  Ke Mose se ale si dukɔ la le avi famee, ƒome ɖe sia ɖe le efam le eƒe agbadɔ nu. Ale Yehowa do dɔmedzoe vevie,+ eye nya la ve dɔme na Mose hã ŋutɔ. 11  Eye Mose gblɔ na Yehowa be: “Nu ka tae nèdo nuxaxa na wò subɔla? Nu ka tae mève nunye o, ale be nètsɔ dukɔ blibo sia katã ƒe agba dro ɖe dzinye?+ 12  Alo nyee fɔ dukɔ sia ƒe fua? Nyee dzi wo hafi nèle gbɔgblɔm nam be: ‘Kɔ wo ɖe wò akɔnu, abe ale si vidzikpɔla* kɔa vi nono ene,’ yi anyigba si ŋu nèka atam ɖo na wo tɔgbuiwo la dzia?+ 13  Afi kae makpɔ lã le ana dukɔ blibo sia katã? Elabena wole avi fam nam be: ‘Na lã mí míaɖu!’ 14  Nye ɖeka nyemate ŋu atsɔ dukɔ blibo sia ƒe nyawo o; ewu tsɔtsɔ nam.+ 15  Ne aleae nèle nu wɔ ge ɖe ŋunyee la, ekema meɖe kuku, wum fifia.+ Ne ève nunye la, ke mègana makpɔ dzivedonamenu siawo teƒe azɔ o.” 16  Yehowa gblɔ na Mose be: “Ƒo Israel ƒe ametsitsi blaadre nu ƒu nam, ŋutsu siwo nènya be wonye dukɔ la ƒe ametsitsiwo kple ŋgɔnɔlawo,+ eye nàkplɔ wo ayi takpegbadɔa gbɔ, ne wò kpli wo miatɔ ɖe afi ma. 17  Maɖi+ ava ƒo nu kpli wò le afi ma;+ eye maɖe gbɔgbɔ si le dziwò la ƒe ɖe+ ada ɖe wo dzi, ne woatsɔ dukɔ la ƒe agba akpe wò, ale be agba la naganɔ wò ɖeka ko dzi o.+ 18  Gblɔ na dukɔ la be, ‘Mikɔ mia ɖokuiwo ŋu hena etsɔ,+ elabena miele lã ɖu ge, elabena miefa avi ɖe to me na Yehowa+ be: “Ame ka ana lã mí míaɖu? Eme nyo na mí wu le Egipte.”+ Yehowa ana lã mi miaɖu agaɖui.+ 19  Miaɖui, menye ŋkeke ɖeka alo ŋkeke eve alo ŋkeke atɔ̃ alo ŋkeke ewo alo ŋkeke blaeve o, 20  ke boŋ ɣleti blibo ɖeka sɔŋ, va se ɖe esime wòado to ŋɔti me na mi, eye wòanyɔ ŋu na mi,+ elabena miegbe Yehowa, ame si le mia dome la, eye miefa avi le eŋkume be: “Nu ka ta koŋ míedzo le Egipte ɖo?”’”+ 21  Eye Mose gblɔ be: “Dukɔ si dome mele la me tɔwo le ŋutsu afɔzɔla akpe alafa ade,+ eye wòa nèbe: ‘Mana lã wo woaɖu wòasu wo ɣleti blibo ɖeka sɔŋ’! 22  Alẽ kple nyi nenie woawu na wo wòade wo nu? Alo ƒumelãwo katãe woaɖe na wo be wòade wo nua?” 23  Eye Yehowa gblɔ na Mose be: “Ðe Yehowa ƒe asi to ɖe emea?+ Azɔ àkpɔe ne nya si gblɔm mele la ava eme na wò loo alo mava eme o.” 24  Eya ta Mose do go yi ɖagblɔ Yehowa ƒe nyawo na dukɔ la. Eye wòƒo dukɔ la ƒe ametsitsi blaadre nu ƒu hena wova tsi tre ƒo xlã takpegbadɔ la.+ 25  Eye Yehowa ɖi va le alilikpo+ me heƒo nu kplii,+ eye wòɖe gbɔgbɔ+ si le edzi la ƒe ɖe da ɖe ametsitsi blaadreawo dometɔ ɖe sia ɖe dzi. Eye wòva eme be, esi gbɔgbɔ la va wo dzi ko la, enumake wode asi nuwɔwɔ me abe nyagblɔɖilawo+ ene,* gake womegawɔ nu nenema emegbe o. 26  Ke ŋutsuawo dometɔ eve tsi asaɖa la me. Woƒe ŋkɔwoe nye Eldad kple Medad. Eye gbɔgbɔ la va woawo hã dzi, elabena wole ame siwo ŋkɔ woŋlɔ la dome, ke womedo go yi takpegbadɔ la gbɔ o. Ale wote nuwɔwɔ abe nyagblɔɖilawo ene le asaɖa la me. 27  Ke ɖekakpui aɖe ƒu du yi ɖaka eta na Mose be: “Eldad kple Medad le nu wɔm abe nyagblɔɖilawo ene le asaɖa la me!” 28  Eye Yosua,+ Nun vi si nye Mose ƒe subɔvi tso eƒe ɖekakpuime ke la gblɔ be: “Nye aƒetɔ Mose, gbee na wo!”+ 29  Ke Mose gblɔ nɛ be: “Ŋu ʋãm nèle ɖe nunyea? Ao, ɖe madi be Yehowa nakɔ eƒe gbɔgbɔ la ɖe Yehowa ƒe dukɔ la me tɔwo katã dzi ne woanye nyagblɔɖilawo hafi!” 30  Emegbe Mose kple Israel ƒe ametsitsiawo gbugbɔ yi asaɖa la me. 31  Azɔ Yehowa na ya sesẽ aɖe ƒo hekplɔ tegliwo tso ƒu gome va kɔ ɖe asaɖa la ŋu godoo va kpe,+ abe ŋkeke ɖeka ƒe mɔzɔzɔ le akpa si, kple ŋkeke ɖeka ƒe mɔzɔzɔ le akpa kemɛ ene, eye woli kɔ ɖi anɔ abɔklugui* eve tso anyigba. 32  Ale dukɔ la tso hefɔ tegliawo ŋkeke blibo ma kple zã blibo ma kpakple ŋkeke si kplɔe ɖo la katã. Ame aɖeke mefɔe wònɔ ʋɛ wu homer* ewo o, eye wosia wo ɖe afi sia afi ƒo xlã asaɖa la godoo va kpe. 33  Ke lã la kpɔtɔ le aɖutɛ me na wo, eye womeɖui vɔ hafi Yehowa ƒe dziku fla ɖe dukɔ la ŋu o, eye Yehowa na amewo ku le dukɔ la dome eteƒe mekɔ o.+ 34  Ale wona ŋkɔ teƒe la be Kibrot-Hataava,*+ elabena afi mae woɖi ame siwo dzro nu ɖokuitɔdiditɔe ɖo.+ 35  Emegbe dukɔ la ho tso Kibrot-Hataava ɖo ta Hazerot, eye wotsi Hazerot.+

Etenuŋɔŋlɔ

Egɔmee nye, “Dzobibi,” Efia, dzo gã si le bibim flaflafla.
Ðewohĩ efia ame siwo menye Israel-viwo o.
Ayo alo galik.
Alo, “míaƒe luʋɔ.”
Alo, “ŋutsu vidzikpɔla.”
Alo, “wode asi nyagbɔgblɔ ɖi me.”
Abɔklugui ɖeka le sentimeta 44.5. Kpɔ Megbenyawo B14.
Homer ɖeka le lita 220. Kpɔ Megbenyawo B14.
Egɔmee nye, “Nudzrolawo Ðiƒe.”