Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

3 Yohanes 1:1-14

EMENYAWO ƑE TOTOƉEME

  • Gbedoname kple gbedodoɖa (1-4)

  • Gayo kafukafu (5-8)

  • Diotrefo, nɔƒe gbãtɔ dila (9, 10)

  • Woɖi ɖase nyui le Demetrio ŋu (11, 12)

  • Mele mɔ kpɔm be makpɔ wò; gbedonamewo (13, 14)

 Nye, ame tsitsi* lae le agbalẽ sia ŋlɔm ɖo ɖe Gayo lɔlɔ̃tɔ, ame si melɔ̃ vevie.  Lɔlɔ̃tɔ, medoa gbe ɖa be nu sia nu nadze edzi na wò, eye nànɔ lãmesẽ me, abe ale si nu le edzi dzem na wòe* ene.  Elabena mekpɔ dzidzɔ ŋutɔ esi nɔviwo va heɖi ɖase be nèlé nyateƒe la me ɖe asi, eye be nèyi edzi le zɔzɔm le nyateƒe la me.+  Nyemekpɔ dzidzɔ gã* wu esia o: be mase be vinyewo yi edzi le zɔzɔm le nyateƒe la me.+  Lɔlɔ̃tɔ, èle nuteƒe wɔm le nu siwo nèwɔna na nɔviawo me, togbɔ be mènya ame siawo hafi o.+  Ame siawo ɖi ɖase le wò lɔlɔ̃ ŋu le hame la ŋkume. Meɖe kuku, do mɔ ame siawo ne woayi woƒe mɔzɔzɔ si dze Mawu ŋu la dzi.+  Elabena eƒe ŋkɔ la tae wodo yi ɖo, eye womexɔ naneke+ tso dukɔwo me tɔwo si o.  Eya ta ele na mí be míaxɔ ame siawo tɔgbi nyuie awɔ amedzro na wo,+ ale be míazu hadɔwɔlawo le nyateƒe la me.+  Meŋlɔ nya aɖe na hamea, ke Diotrefo, si dina be yeanɔ nɔƒe gbãtɔ le wo dome la,+ mexɔa naneke tso mía gbɔ bubutɔe o.+ 10  Esia tae ne meva la, maɖo ŋku nu siwo wɔm wòle, si nye nya vlo siwo gblɔm wòle tsɔ le mía ŋu gblẽm la dzi.+ Eye esi nu siawo mesu eme nɛ o la, eya ŋutɔ mexɔa nɔviawo+ bubutɔe o, eye ame siwo di be yewoaxɔ wo la, edzea agbagba be yeaxe mɔ na wo, eye be yeaɖe wo le hamea me. 11  Lɔlɔ̃tɔ, mègasrɔ̃ nu vɔ̃ɖi wɔwɔ o, ke srɔ̃ nu nyui wɔwɔ boŋ.+ Ame si wɔa nu nyui la, etso Mawu me.+ Ame si wɔa nu vɔ̃ɖi la, mekpɔ Mawu o.+ 12  Nɔviawo katã ɖi ɖase nyui le Demetrio ŋu, eye nyateƒea ŋutɔ hã ɖi ɖase le eŋu. Le nyateƒe me la, míawo hã míele ɖase ɖim le eŋu, eye ènyae be ɖase si míeɖina la nye nyateƒe. 13  Nya geɖewo le asinye maŋlɔ na wò hafi, ke nyemedi be matsɔ nuŋlɔti kple agbalẽŋlɔtsi ayi nuŋɔŋlɔa dzi o. 14  Ke mele mɔ kpɔm be makpɔ wò kpuie, eye míaƒo nu ŋkume kple ŋkume. Ŋutifafa nanɔ kpli wò. Xɔlɔ̃awo do gbe na wò. Yɔ xɔlɔ̃awo ŋkɔ ɖekaɖeka nàdo gbe na wo nam.

Etenuŋɔŋlɔ

Alo, “Nye, hamemetsitsi.”
Alo, “na wò luʋɔ.”
Agate ŋu afia, “Nu bubu aɖeke meli si ta mada akpe ɖo.”