Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

3 Mose 5:1-19

EMENYAWO ƑE TOTOƉEME

  • Nu vɔ̃ aɖewo koŋ kple wo ŋuti vɔsawo (1-6)

    • Ame bubuwo ƒe nu vɔ̃ gbɔgblɔ (1)

  • Vɔ bubu siwo ame dahewo ate ŋu asa (7-13)

  • Ame si wɔ nu vɔ̃ le manyamanya me ƒe fɔɖivɔsa (14-19)

5  “‘Ne ame* aɖe wɔ nu vɔ̃, le esi wòsee woɖe gbeƒã le dutoƒo be woava aɖi ɖase*+ le nu vɔ̃ wɔla aɖe ŋu, eye wònye ɖasefo le eŋu, alo wòkpɔ eteƒe alo nya nu tso eŋu, evɔ meva gblɔe o la, ekema woabia eƒe vodada la ŋuti kɔntae.  “‘Alo ne ame* aɖe ka asi nu makɔmakɔ aɖe ŋu, eɖanye gbemelã makɔmakɔ aɖe ƒe kukua alo aƒemelã makɔmakɔ aɖe ƒe kukua alo nuwɔwɔ siwo nɔa ha me+ dometɔ aɖe ƒe kukua ŋu la, eŋu mekɔ o, eɖi fɔ, ne menya o gɔ̃ hã.  Alo ne eka asi ame ƒe nu makɔmakɔ aɖe ŋu, nu sia nu si ŋu mekɔ o+ si ana eŋu makɔ o la ŋu le manyamanya me, eye wòva nya emegbe la, eɖi fɔ.  “‘Alo ne ame* aɖe mebu nuwo ŋu nyuie hafi ka atam be yeawɔ nane o, eɖanye vɔ̃ alo nyui o, nu ka ke ƒe atam wòka o, evɔ menya o, gake wòva dze sii emegbe be yewɔe eŋumabumabui la, ekema eɖi fɔ.*+  “‘Eye ne ame aɖe ɖi nu siawo dometɔ ɖeka ƒe fɔ la, ekema wòaʋu nu vɔ̃ la me.+  Eye wòalé alẽnɔe alo gbɔ̃nɔe tso eƒe lãha me vɛ na Yehowa le vo si wòda heɖi fɔ la ta,+ be woatsɔ asa nuvɔ̃vɔe. Eye nunɔla la alé avu ɖe eta le eƒe nu vɔ̃ la ta.  “‘Ke ne mate ŋu ana alẽ o la, ekema wòatsɔ akpakpa* eve alo ahɔnɛvi eve+ ava sa fɔɖivɔ na Yehowa ɖe nu vɔ̃ si wòwɔ la ta: netsɔ ɖeka sa nuvɔ̃vɔ, eye wòatsɔ evelia asa numevɔ.+  Atsɔ wo ava nunɔla la gbɔ, eye nunɔla la natsɔ esi woatsɔ asa nuvɔ̃vɔe la asa vɔ gbã; atso veme nɛ, gake maɖe ta le enu o.  Eye wòahlẽ nuvɔ̃vɔsalã la ƒe ʋua ƒe ɖe ɖe vɔsamlekpui la ŋu, ke wòaɖuɖu ʋu susɔea ɖe vɔsamlekpuia te.+ Nuvɔ̃vɔsa wònye. 10  Eye wòatsɔ evelia asa numevɔ ɖe ɖoɖo si nu wowɔnɛ ɖo la nu;+ eye nunɔla la nalé avu ɖe amea ta le nu vɔ̃ si wòwɔ la ŋuti, eye woatsɔe akee.+ 11  “‘Ke ne mate ŋu ana akpakpa eve alo ahɔnɛvi eve hã o la, ekema wòatsɔ wɔ memee efa me mama ɖe ewo ƒe akpa ɖeka*+ ana ɖe nu vɔ̃ si wòwɔ la ta, be woatsɔ asa nuvɔ̃vɔe. Megakɔ ami ɖe edzi o, eye megatsɔ lifi da ɖe edzi o, elabena nuvɔ̃vɔsa wònye. 12  Eye wòatsɔe ava nunɔla la gbɔ, eye nunɔla la naku asiʋlo ɖeka le eŋu wòanye kpɔɖeŋuvɔsa,* eye wòatsɔe akɔ ɖe Yehowa ƒe dzovɔsawo dzi ado dzudzɔ ɖe vɔsamlekpui la dzi. Nuvɔ̃vɔsa wònye. 13  Eye nunɔla la nalé avu nɛ ɖe eƒe nu vɔ̃ si wòwɔ la ta, eɖanye nu vɔ̃ siawo dometɔ kae wòwɔ o, eye woatsɔe akee.+ Vɔsanu susɔea azu nunɔla la tɔ+ abe ale si wòle le nuɖuvɔsa la gome ene.’”+ 14  Yehowa gagblɔ na Mose be: 15  Ne ame* aɖe mewɔ nuteƒe o, le esi wòɖe ŋu ɖi wɔ nu vɔ̃ ɖe Yehowa ƒe nu kɔkɔewo ŋu ta la,+ ekema wòatsɔ agbo si sɔ blibo, si ƒe home anye klosalo sekel* siwo sɔ ɖe teƒe kɔkɔe la ƒe sekel nu*+ la, asa fɔɖivɔ na Yehowa.+ 16  Eye wòaɖo nu vɔ̃ si wòwɔ ɖe kɔkɔeƒea ŋu la teƒe ahatsɔ home la me mama atɔ̃ ƒe ɖeka akpee.+ Netsɔe na nunɔla la, ne nunɔla la natsɔ fɔɖivɔsa ƒe agbo la alé avu ɖe eta,+ eye woatsɔe akee.+ 17  “Eye ne ame* aɖe wɔ nu vɔ̃ le esi wòwɔ nu siwo ŋu Yehowa de se ɖo be woagawɔ o la dometɔ aɖe le manyamanya me gɔ̃ hã la, eɖi fɔ, eye woabia akɔntae le vo si wòda la ŋuti.+ 18  Eye wòatsɔ agbo si sɔ blibo tso eƒe alẽha dome ava nunɔla la gbɔ be woatsɔ asa fɔɖivɔe, eƒe home la nasɔ ɖe esi woɖo la nu.+ Eye nunɔla la nalé avu ɖe eta le vo si wòda le manyamanya me la ta, eye woatsɔe akee. 19  Fɔɖivɔsa wònye. Yehowa ŋue wòwɔ nu vɔ̃ ɖo heɖi fɔ.

Etenuŋɔŋlɔ

Alo, “luʋɔ.”
Egɔmeɖeɖe tẽe, “wòse fiƒodenya (atam).” Ðewohĩ enye gbeƒã si woɖe tso nu gbegblẽ wɔwɔ aɖe si me woƒo fi de nu gbegblẽ wɔlaa alo ame si kpɔ eteƒe gake meva gblɔe o la ŋu.
Alo, “luʋɔ.”
Alo, “luʋɔ.”
Nya sia fia be mewɔ atam si wòka la dzi o.
Alo, “ƒeƒlelu.”
Efa me mama ɖe ewo ƒe akpa ɖeka le lita 2.2. Kpɔ Megbenyawo B14.
Alo, “eƒe akpa si nye ŋkuɖodzinu (le wɔ blibo la teƒe).”
Alo, “luʋɔ.”
Sekel ɖeka le gram 11.4. Kpɔ Megbenyawo B14.
Alo, “le sekel kɔkɔe la nu.”
Alo, “luʋɔ.”