Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

3 Mose 27:1-34

EMENYAWO ƑE TOTOƉEME

  • Nu siwo wotsɔ ɖe adzɔgbe la gbugbɔƒle (1-27)

  • Nu siwo wotsɔ ɖe adzɔgbe na Yehowa ɖikaa (28, 29)

  • Nuwo ƒe ewolia gbugbɔƒle (30-34)

27  Yehowa gagblɔ na Mose be:  “Gblɔ na Israel-viwo be, ‘Ne ame aɖe ɖe adzɔgbe tɔxɛ+ be yeatsɔ ga home si woxena ɖe ame* ta ana Yehowa la,  ne enye ŋutsu si le ƒe blaeve kple ƒe blaade domee la, ekema eƒe asi nanye klosalo sekel* blaatɔ̃ le teƒe kɔkɔe la ƒe sekel* la nu.  Ke ne nyɔnue la, ekema eƒe asi nanye sekel blaetɔ̃.  Ne ele ƒe atɔ̃ kple ƒe blaeve domee la, ekema ŋutsu ƒe asi nanye sekel blaeve, eye nyɔnu ƒe asi nanye sekel ewo.  Eye ne ele ɣleti ɖeka kple ƒe atɔ̃ domee la, ekema ŋutsu ƒe asi nanye klosalo sekel atɔ̃, eye nyɔnu ƒe asi nanye klosalo sekel etɔ̃.  “‘Ke ne exɔ ƒe blaade kple edzivɔ la, ekema ŋutsu ƒe asi nanye sekel wuiatɔ̃, eye nyɔnu ƒe asi nanye sekel ewo.  Ke ne eda ahe ale gbegbe be mate ŋu ana home ma+ o la, ekema woana amea nava nunɔla la gbɔ, eye nunɔla la nado asi ɖe eŋu. Nunɔla la nado asi ɖe eŋu le adzɔgbeɖelaa ƒe ŋutete nu.+  “‘Ne lã siwo wotsɔna saa vɔ na Yehowa ƒe ɖee la, ekema nu sia nu si wòana Yehowa la nazu nu kɔkɔe. 10  Mate ŋu aɖɔlii o; matsɔ nyui aɖɔli manyomanyoa alo atsɔ manyomanyo aɖɔli nyuia o. Ke ne ehiã be wòatsɔ lã aɖɔli esi wòtsɔ ɖe adzɔgbee godoo la, ekema esi woɖɔli kple esi wotsɔ ɖɔlii la siaa nazu nu kɔkɔe. 11  Eye ne lã si ŋu mekɔ o,+ si womate ŋu atsɔ ava sa vɔ na Yehowa o ye la, ekema wòakplɔ lã la ava nunɔla la gbɔ. 12  Eye nunɔlaa nalé ŋku ɖe eŋu akpɔ be enyo loo alo menyo o, ne wòado asi ɖe eŋu. Asi si nunɔla la ado ɖe eŋu la, nenemae wòaxɔ. 13  Ke ne edi be yeagbugbɔe aƒle kokoko la, ekema wòaxe asi si wodo ɖe eŋu la ahatsɔ home ma me mama ɖe atɔ̃ ƒe akpa ɖeka akpee.+ 14  “‘Ne ame aɖe kɔ eƒe xɔ ŋu wòzu nu kɔkɔe na Yehowa la, ekema nunɔla la nakpɔe ɖa be enyo loo alo menyo o, eye wòado asi ɖe eŋu. Asi si nunɔlaa ado ɖe eŋu la, nenemae wòaxɔ.+ 15  Ke ne ame si kɔ xɔa ŋu di be yeagaxɔe aƒle la, ekema wòaxe asi si wodo ɖe eŋu la ahatsɔ home ma me mama ɖe atɔ̃ ƒe akpa ɖeka akpee, eye wòazu etɔ. 16  “‘Ne ame aɖe kɔ eƒe agble ƒe akpa aɖe ŋu na Yehowa la, ekema woado asi ɖe eŋu ɖe nuku agbɔsɔsɔ si woate ŋu aƒã ɖe edzi la nu. Ne ƒo homer* ɖekae la, ekema eƒe home nanye klosalo sekel blaatɔ̃. 17  Ne ekɔ eƒe agble ŋu tso Ablɔɖeƒe+ la dzi la, ekema asi si wodo ɖe eŋu la, eyae anye eƒe home. 18  Ne Ablɔɖeƒe la megbee wòkɔ eƒe agble ŋu la, ekema nunɔla la nabu eƒe home la nɛ ɖe ƒe siwo susɔ hafi Ablɔɖeƒe bubu naɖo la nu, eye woaɖe asi si wodo ɖe eŋu la dzi.+ 19  Ke ne ame si kɔ agblea ŋu la di be yeagaxɔe aƒle kokoko la, ekema wòaxe asi si wodo ɖe eŋu la ahatsɔ home ma me mama ɖe atɔ̃ ƒe akpa ɖeka akpee, ekema agblea agazu etɔ. 20  Ke ne mexɔ agblea ƒle o, eye wogadzrae na ame bubu la, ekema magate ŋu axɔe aƒle o. 21  Ne agblea do le ame si le Ablɔɖeƒea me la, azu nu kɔkɔe na Yehowa, abe agble si wotsɔ ɖe adzɔgbe na Mawu ene. Azu nunɔla la ƒe domenyinu.+ 22  “‘Ne ame aɖe kɔ agble aɖe si wòƒle ŋu na Yehowa, eye agble la menye eƒe domenyinu o la,+ 23  ekema nunɔla la nabu asia nɛ ɖe ƒe siwo susɔ hafi Ablɔɖeƒea naɖo la nu, eye wòaxe ga home ma gbe ma gbe.+ Ga la zu nu kɔkɔe na Yehowa. 24  Ke agblea agatrɔ azu ame si si wòƒlee le, ame si ƒe domenyinu wònye, la tɔ le Ablɔɖeƒe la dzi.+ 25  “‘Woado asiawo katã ɖe teƒe kɔkɔe la ƒe sekel la nu. Sekel ɖeka nanye gera* blaeve. 26  “‘Gake womakɔ lãwo ƒe ŋgɔgbeviwo ya ŋu na Yehowa o,+ elabena etɔe wonye xoxo. Eɖanye nyi alo alẽ o, Yehowa tɔe wònye.+ 27  Ne lã si ŋu mekɔ o ye wònye la, ekema nua tɔ naxe ga home si woado ɖe eŋu la, eye wòatsɔ home ma me mama ɖe atɔ̃ ƒe akpa ɖeka akpee.+ Gake ne maxe fea axɔe o la, ekema nunɔla la nadzrae ɖe asi si wòdo ɖe eŋu la nu. 28  “‘Ne ame aɖe tsɔ eƒe domenyinu aɖe ɖe adzɔgbe na Yehowa ɖikaa la, eɖanye amegbetɔ, lã, alo agble si nye etɔ o, womadzrae o, eye womagbugbɔ axɔe aƒle o. Nu sia nu si wotsɔ ɖe adzɔgbe ɖikaa la, nu kɔkɔewo ƒe nu kɔkɔe wònye na Yehowa.+ 29  Ne wobu fɔ ame aɖe be edze na tsɔtsrɔ̃ la, womaxe fe ɖe eta axɔe o.+ Ele be woawui godoo.+ 30  ‘“Nu siwo katã anyigba wɔ, agblemenukuwo loo alo kutsetsewo me mama ewo ƒe akpa ɖeka+ nye Yehowa tɔ. Nu kɔkɔe wònye na Yehowa. 31  Ne ame aɖe di be yeagbugbɔ axɔ yeƒe nuwo ƒe ewolia aƒle godoo la, ekema wòaxe ga home si wodo ɖe eŋu ahatsɔ home ma me mama ɖe atɔ̃ ƒe akpa ɖeka akpee. 32  Nyi alo alẽ ƒe ewolia ɖe sia ɖe si ato lãkplɔti te esi wole wo xlẽm la azu nu kɔkɔe na Yehowa. 33  Malé ŋku ɖe eŋu akpɔe ɖa be enyo loo alo menyo o, eye maɖɔlii hã o. Ke ne wodi be woaɖɔlii kokoko la, ekema esi woɖɔli kple esi wotsɔ ɖɔlii la siaa nazu nu kɔkɔe.+ Womagbugbɔ axɔe aƒle o.’” 34  Esiawoe nye se siwo Yehowa tsɔ na Mose le Sinai To la dzi be wòade na Israel-viwo.+

Etenuŋɔŋlɔ

Alo, “luʋɔ.”
Sekel ɖeka le gram 11.4. Kpɔ Megbenyawo B14.
Alo, “sekel kɔkɔe.”
Homer ɖeka le lita 220. Kpɔ Megbenyawo B14.
Gera ɖeka le gram 0.57. Kpɔ Megbenyawo B14.