Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

3 Mose 20:1-27

EMENYAWO ƑE TOTOƉEME

  • Molek subɔsubɔ; gbɔgbɔyɔyɔ (1-6)

  • Minɔ kɔkɔe eye miabu mia dzilawo (7-9)

  • Ame si ɖi gbɔdɔdɔ manɔsenu ŋuti fɔ la dze ku (10-21)

  • Minɔ kɔkɔe be mianɔ anyigba la dzi (22-26)

  • Ŋɔliyɔla alo afakala dze na ku (27)

20  Yehowa gagblɔ na Mose be:  “Gblɔ na Israel-viwo be, ‘Ne Israel-vi aɖe alo amedzrovi aɖe si le Israel tsɔ via sa vɔe na Molek la, edze na ku.+ Dukɔ la naƒu kpee wòaku.  Maɖe ŋku atɔ ame ma, eye matsrɔ̃e ɖa le eƒe dukɔ la dome, le esi wòtsɔ via sa vɔe na Molek tsɔ gblẽ kɔ ɖo na nye kɔkɔeƒe+ la, eye wòdo vlo nye ŋkɔ kɔkɔe la ta.  Ne dukɔ la ɖoe koŋ ŋe aɖaba ƒu ame ma ƒe nuwɔna dzi, eye womewui o, evɔ wònye etsɔ via sa vɔe na Molek hafi la,+  ekema nye ŋutɔ maɖe ŋku atɔ ame ma kple eƒe ƒomea.+ Matsrɔ̃ eya kple ame siwo katã wɔ ɖeka kplii le ahasiwɔwɔ kple Molek me.  “‘Ke ame* si yia ŋɔliyɔlawo+ alo nukalawo+ gbɔ la, ewɔ gbɔgbɔmehasi, eya ta maɖe ŋku atɔ ame* ma atsrɔ̃e ɖa le eƒe dukɔ la dome.+  “‘Mikɔ mia ɖokuiwo ŋu ne mianɔ kɔkɔe,+ elabena nyee nye Yehowa mia Mawu.  Milé nye sewo me ɖe asi ne miawɔ wo dzi.+ Nyee nye Yehowa, ame si kɔ mia ŋu.+  “‘Ne ame aɖe ƒo fi de fofoa alo dadaa la, ele be woawui godoo.+ Esi wòƒo fi de fofoa kple dadaa ta la, eƒe ʋu anɔ eya ŋutɔ ƒe ta dzi. 10  “‘Ne ŋutsu aɖe wɔ ahasi kple ame bubu srɔ̃ la, ele be woawu ame si wɔ ahasi kple ehavi srɔ̃ la godoo, woawu ŋutsu ahasiwɔla la kple nyɔnu ahasiwɔla la siaa.+ 11  Ŋutsu si dɔ fofoa srɔ̃ gbɔ la, edo ŋukpe fofoa.*+ Ele be woawu wo ame evea siaa. Woƒe ʋu anɔ woawo ŋutɔwo ƒe ta dzi. 12  Ne ŋutsu aɖe dɔ toyɔvia gbɔ la, ele be woawu wo ame evea siaa. Wowɔ nu si mesɔ le dzɔdzɔme nu o. Woƒe ʋu anɔ woawo ŋutɔwo ƒe ta dzi.+ 13  “‘Ne ŋutsu aɖe dɔ ŋutsu gbɔ abe nyɔnu gbɔ ene la, wo ame evea siaa wɔ ŋunyɔnu.+ Woawu wo godoo. Woƒe ʋu anɔ woawo ŋutɔwo ƒe ta dzi. 14  “‘Ne ŋutsu aɖe de nyɔnu kple dadaa siaa gbɔ la, nuwɔna nyɔŋue*+ wònye. Woawu ŋutsua kple nyɔnuawo eye woatɔ dzo wo,+ ne nuwɔna nyɔŋu sia tɔgbi nagayi edzi le mia dome o. 15  “‘Ne ŋutsu aɖe dɔ lã aɖe gbɔ la, ele be woawu ŋutsua kple lã la siaa.+ 16  Ne nyɔnu aɖe tsɔ eɖokui na lã aɖe wòyɔ asii+ la, nyɔnua kple lã la siaa dze na ku. Ele be woawu wo godoo. Woƒe ʋu anɔ woawo ŋutɔwo ƒe ta dzi. 17  “‘Ne ŋutsu de asi nɔvianyɔnu ŋu, eɖanye fofoa vinyɔnu alo dadaa vinyɔnu o hekpɔ eƒe ama, eye nyɔnua hã kpɔ ŋutsua ƒe ama la, ŋukpenanu wònye.+ Eya ta woawu wo le woƒe dukɔ la ŋkume. Edo ŋukpe nɔvianyɔnu,* eya ta eƒe fɔɖiɖi anɔ eƒe ta dzi. 18  “‘Ne ŋutsu aɖe dɔ nyɔnu aɖe gbɔ le eƒe asiɖoanyiɣi la, ekema ŋutsua kple nyɔnua siaa klo nu le nyɔnua ƒe ʋusisi dzi.+ Woatsrɔ̃ wo ame evea ɖa le woƒe dukɔ la dome. 19  “‘Mègade asi dawò nɔvinyɔnu alo fofowò nɔvinyɔnu ŋu o, elabena enye ŋukpedodo wò ƒometɔ kpamkpam.+ Ame siwo wɔ nu sia ƒe fɔɖiɖi anɔ woƒe ta dzi. 20  Ame si dɔ fofoa nɔviŋutsu srɔ̃ gbɔ la do ŋukpe fofoa nɔviŋutsu.*+ Ame siwo wɔ nu sia ƒe fɔɖiɖi anɔ woƒe ta dzi. Woaku vimadzimadzii. 21  Ne ŋutsu aɖe xɔ nɔviaŋutsu srɔ̃ la, ŋunyɔnu wònye.+ Edo ŋukpe nɔviaŋutsu,* eya ta ele be woatsi ko. 22  “‘Milé nye sewo kple nye ʋɔnudrɔ̃ɖoɖowo+ katã me ɖe asi ne miawɔ wo dzi,+ ne anyigba si dzi mekplɔ mi yinae be mianɔ edzi la nagatu mi aƒu gbe o.+ 23  Migazɔ ɖe dukɔ siwo nyam mele ɖa le mia ŋgɔ la ƒe ɖoɖowo nu o;+ elabena nu siawo katãe wowɔ, eya ta wonyɔ ŋu nam.+ 24  Eya tae megblɔ na mi be: “Miaxɔ woƒe anyigba wòanye mia tɔ, eye matsɔ anyigba sia si dzi notsi kple anyitsi le sisim le+ la, ana mi wòazu mia tɔ. Nyee nye Yehowa mia Mawu, ame si ɖe mi ɖe vovo tso dukɔ bubuwo gbɔ.”+ 25  Miade vovototo lã si ŋu kɔ kple esi ŋu mekɔ o dome kpakple xe si ŋu kɔ kple esi ŋu mekɔ o+ dome. Migatsɔ lã kple xe kpakple nu siwo katã ʋãna le anyigba dzi, si meɖe ɖe vovo be wo ŋu mekɔ o la, do ŋunyɔ mia ɖokuiwo* o.+ 26  Minɔ kɔkɔe nam, elabena nye, Yehowa, mele kɔkɔe,+ eye meɖe mi ɖe vovo tso dukɔ bubuwo gbɔ be mianye tɔnye koŋ.+ 27  “Ŋutsu alo nyɔnu si nye ŋɔliyɔla alo afakala* la dze na ku. Woaƒu kpe wo woaku.+ Woƒe ʋu anɔ woawo ŋutɔwo ƒe ta dzi.’”

Etenuŋɔŋlɔ

Alo, “luʋɔ.”
Alo, “luʋɔ.”
Egɔmeɖeɖe tẽe, “eɖe ama fofoa.”
Alo, “ŋukpenanu; gbɔdɔnuwɔna vɔ̃ɖi.”
Egɔmeɖeɖe tẽe, “Eɖe ama nɔvianyɔnu.”
Egɔmeɖeɖe tẽe, “ɖe ama fofoa nɔviŋutsu.”
Egɔmeɖeɖe tẽe, “Eɖe ama nɔviaŋutsu.”
Alo, “miaƒe luʋɔwo.”
Alo, “si me afakagbɔgbɔ le.”