Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

3 Mose 2:1-16

2  “‘Ke ne ame* aɖe di be yeasa nuɖuvɔ+ na Yehowa la, ekema wòatsɔ wɔ memee asa vɔ lae, wòakɔ ami ɖe edzi eye wòatsɔ lifi akpe ɖe eŋu.+  Eye wòatsɔe ava Aron viŋutsu siwo nye nunɔlawo gbɔ, eye nunɔla la naku wɔ memee la kple ami la kpakple lifi la katã asiʋlo ɖeka; eye wòatsɔe ado dzudzɔ ɖe vɔsamlekpui la dzi wòanye kpɔɖeŋuvɔsa,*+ wòanye dzovɔsa si nye ʋeʋẽ lilili* na Yehowa.  Ke nuɖuvɔsa susɔea nanye Aron kple viaŋutsuwo tɔ,+ abe nu kɔkɔewo ƒe nu kɔkɔe+ tso Yehowa ƒe dzovɔsawo me ene.  “‘Eye ne èbe yeatsɔ nu si womè le kpo me asa nuɖuvɔe la, ekema wòanye esi wotsɔ wɔ memee si wotsɔ ami dzabae la mè, wòanye amɔwɔ maʋamaʋã bolo kotoe alo amɔwɔ maʋamaʋã kpɔnɔ si dzi wosisi ami ɖo.+  “‘Eye ne èbe yeamè nu le agba me asa nuɖuvɔe la,+ ekema wòanye wɔ memee si wotsɔ ami dzabae, si me womede amɔwɔʋãnui o.  Woaflii kakɛkakɛe, eye nàkɔ ami ɖe edzi.+ Nuɖuvɔsa wònye.  “‘Eye ne èbe yeatsɔ nu si woɖana le ze me asa nuɖuvɔe la, ekema nàtsɔ wɔ memee kple ami aɖae.  Eye nàtsɔ nuɖuvɔsa si wotsɔ nu siawo ɖae la vɛ na Yehowa, tsɔe yi na nunɔlaa, eye wòatsɔe ayi vɔsamlekpuia gbɔ.  Eye nunɔla la atsɔ nuɖuvɔsa la ƒe ɖe, wòanye kpɔɖeŋuvɔsa,*+ eye wòatsɔe ado dzudzɔ ɖe vɔsamlekpui la dzi wòanye dzovɔsa si nye ʋeʋẽ lilili* na Yehowa.+ 10  Ke nuɖuvɔsa susɔea nanye Aron kple viaŋutsuwo tɔ, abe nu kɔkɔewo ƒe nu kɔkɔe tso Yehowa ƒe dzovɔsawo me ene.+ 11  “‘Migade nuʋãnu+ aɖeke nu siwo miatsɔ asa nuɖuvɔe na Yehowa la dometɔ aɖeke me o, elabena miekpɔ mɔ atsɔ amɔwɔ ʋaʋã aɖeke kple anyitsi* aɖeke kura ado dzudzɔ wòanye dzovɔsa na Yehowa o. 12  “‘Miate ŋu atsɔ wo vɛ na Yehowa abe kutsetse gbãtɔwo ene,+ ke womatɔ dzo wo le vɔsamlekpui la dzi wòanye ʋeʋẽ lilili* o. 13  “‘De dze wò nuɖuvɔsawo katã me; mègado kpo wò Mawu ƒe nubabla ƒe dze la dede wò nuɖuvɔsa me o. Dze nakpe ɖe wò nunanawo katã ŋu.+ 14  “‘Ne èbe yeatsɔ kutsetse gbãtɔwo asa nuɖuvɔe na Yehowa la, ekema nàtsɔ nuku yeye siwo womè le dzo me, siwo nye nuku yeye siwo wogbã keŋ la vɛ wòanye wò kutsetse gbãtɔwo ƒe nuɖuvɔsa.+ 15  Kɔ ami ɖe edzi, eye nàtsɔ lifi ada ɖe edzi. Nuɖuvɔsa wònye. 16  Eye nunɔla la natsɔ vɔsa la ƒe kpɔɖeŋuvɔsa,*+ si nye nuku si wogbã la kpakple ami la ƒe ɖe hekpe ɖe eŋuti lifi la katã ŋu ado dzudzɔ wòanye dzovɔsa na Yehowa.

Etenuŋɔŋlɔ

Alo, “luʋɔ.”
Alo, “eƒe akpa si nye ŋkuɖodzinu (le wɔ blibo la teƒe).”
Alo, “faa dzi; naa dzidzeme.”
Alo, “eƒe akpa si nye ŋkuɖodzinu (le wɔ blibo la teƒe).”
Alo, “faa dzi; naa dzidzeme.”
Edze ƒãa be menye anyitsi si anyiwo ɖana lae o, ke boŋ atikutsetsewo me tsi ye wowɔnɛ, le esi wogblɔ tso eŋu be enye kutsetse gbãtɔwo ta. (3Mo 2:12; 2Kr 31:5)
Alo, “faa dzi; naa dzidzeme.”
Alo, “eƒe akpa si nye ŋkuɖodzinu (le wɔ blibo la teƒe).”