3 Mose 19:1-37

  • Kɔkɔenyenye ŋuti sewo (1-37)

    • Agblemenukuwo ŋeŋe ŋuti se (9, 10)

    • Tokunɔwo kple ŋkuagbãtɔwo ŋu bubu (14)

    • Ameŋugbegblẽ (16)

    • Migalé ame ɖe dɔme o (18)

    • Sedede ɖe afakaka kple gbɔgbɔyɔyɔ nu (26, 31)

    • Sedede ɖe nutáta ɖe ŋuti nu (28)

    • Bubudede ame tsitsiwo ŋu (32)

    • Ale si woawɔ nu ɖe amedzroviwo ŋu (33, 34)

19  Yehowa gagblɔ na Mose be:  “Gblɔ na Israel ƒe ha blibo la katã be, ‘Minɔ kɔkɔe, elabena nye, Yehowa mia Mawu la, mele kɔkɔe.+  “Mia dometɔ ɖe sia ɖe nade bubu dadaa kple fofoa ŋu,*+ eye milé nye sabat ƒe seawo me ɖe asi.+ Nyee nye Yehowa, mia Mawu.  Migatrɔ ɖe mawu maɖinuwo ŋu o,+ eye migalólo ga tsɔ wɔ mawuwo na mia ɖokuiwo o.+ Nyee nye Yehowa, mia Mawu.  “‘Ne miesa ŋutifafavɔ na Yehowa la,+ miwɔe le mɔ si ana miaƒe nu nadze eŋu nu.+  Miɖui le gbe si gbe miesa vɔa kple eƒe ŋufɔke, ke esi tsi anyi va se ɖe ŋkeke etɔ̃a gbe la, mitɔ dzoe.+  Gake ne mieɖui le ŋkeke etɔ̃a gbe la, ekema ezu nu makɔmakɔ, madze ŋunye o.  Ame si ɖui la, eɖi fɔ, elabena mede bubu Yehowa ƒe nu kɔkɔe ŋu o, woatsrɔ̃ ame* ma ɖa le eƒe dukɔ la dome.  “‘Ne miele agblemenukuwo ŋem le miaƒe anyigba dzi la, mègaŋe esiwo le wò bo to la keŋkeŋ o, eye mègafɔ wò nuku siwo tsi anyi la o.+ 10  Mègaxa wò waintsetsewo hã ƒiaƒiaƒia le wò agble me o, eye mègafɔ wò waintsetse siwo dudu ɖe anyi la o. Gblẽ wo ɖi na ame dahewo+ kple amedzrowo. Nyee nye Yehowa, mia Mawu. 11  “‘Migafi fi o,+ migable ame o,+ eye mia dometɔ aɖeke megaflu ehavi o. 12  Mègatsɔ nye ŋkɔ ka atam ɖe alakpanya dzi o,+ be nàgaƒo ɖi wò Mawu ƒe ŋkɔ la o. Nyee nye Yehowa. 13  Mègatafa hawòvi o,+ eye mègada adzoe o.+ Dɔwɔla ƒe fetu megatsi gbɔwò ŋu nake ɖe edzi o.+ 14  “‘Mègado ɖiŋu na tokunɔ o, eye mègada nu ɖe ŋkuagbãtɔ ŋgɔ wòakli o,+ vɔ̃ wò Mawu.+ Nyee nye Yehowa. 15  “‘Migadrɔ̃ ʋɔnu madzɔmadzɔ o. Mègate ame dahe ɖe to o, eye mègade kesinɔtɔ dzi o.+ Drɔ̃ ʋɔnu dzɔdzɔe na hawòvi. 16  “‘Mèganɔ ame ŋu gblẽm anɔ yiyim o.+ Mègadi be woakɔ hawòvi ƒe ʋu ɖi o.*+ Nyee nye Yehowa. 17  “‘Mègalé fu nɔviwò le dzi me o.+ Gbe nya na hawòvi,+ ne eƒe nu vɔ̃ naganɔ wò kplii ƒe ta dzi o. 18  “‘Mègawɔ wɔɖenui+ alo alé wò dukɔmeviwo ɖe dɔme o, lɔ̃ hawòvi abe wò ŋutɔ ɖokuiwò ene.+ Nyee nye Yehowa. 19  “‘Milé nye sewo me ɖe asi: Mègana wò aƒemelã eve ƒomevi natsaka ayɔ asi wo nɔewo o. Mègatsaka nuku eve ƒomevi aƒã ɖe wò agble me o,+ eye mègado awu si wotsɔ ka eve ƒomevi tsaka lɔ̃ la o.+ 20  “‘Ne ŋutsu aɖe dɔ subɔvinyɔnu aɖe si ŋugbe wodo na ŋutsu bubu gbɔ, evɔ womexɔ nyɔnua ƒle alo na ablɔɖee o la, ele be woahe to na wo. Womawu wo o, elabena womena ablɔɖe nyɔnua haɖe o. 21  Ŋutsua natsɔ agbo ɖeka avɛ na Yehowa le takpegbadɔa nu be woatsɔ asa fɔɖivɔ.+ 22  Nunɔla la natsɔ agbo la asa fɔɖivɔe atsɔ alé avu ɖe eta le Yehowa ŋkume le nu vɔ̃ si wòwɔ la ta, eye woatsɔ eƒe nu vɔ̃ la akee. 23  “‘Ne mieva ɖo anyigba la dzi eye miedo ati si ƒe tsetse woɖuna la, migaɖu eƒe tsetse o ƒe etɔ̃ sɔŋ; mibui le ɣeyiɣi mawo me abe ati makɔmakɔ kple ati maɖumaɖua ene.* 24  Gake le ƒe enelia me la, eƒe tsetse la katã zu nu kɔkɔe si ŋu miatso aseye ɖo le Yehowa ŋkume.+ 25  Ke le ƒe atɔ̃lia me la, miekpɔ mɔ aɖu eƒe tsetse ale be miaƒe kutsetsewo nasɔ gbɔ ɖe edzi. Nyee nye Yehowa, mia Mawu. 26  “‘Migaɖu naneke si me ʋu le o.*+ “‘Migaka afa o, eye migawɔ akunya o.+ 27  “‘Migaƒlɔ miaƒe loglo o, eye migafɔ miaƒe ge dzi ɖewoɖewoe o.+ 28  “‘Ne ame* ku la, migasi ŋuti o,+ eye migatá nu ɖe ŋuti hã o. Nyee nye Yehowa. 29  “‘Mègawɔ viwònyɔnu gbolo+ ahaklo bubu le eŋu o, ne anyigba la nagawɔ gbolo, ale be ŋukpenanuwɔwɔ naxɔ edzi o.+ 30  “‘Milé nye sabat+ ƒe sewo me ɖe asi, eye mide bubu nye kɔkɔeƒe la ŋu.* Nyee nye Yehowa. 31  “‘Migayi ŋɔliyɔlawo+ gbɔ o, eye migabia nu ta se le nukalawo+ gbɔ o, ne miagazu ame makɔmakɔwo o. Nyee nye Yehowa, mia Mawu. 32  “‘Tso ɖe tsitrenu le ta ƒowɔ ŋkume,+ nàde bubu ame tsitsi ŋu,+ eye nàvɔ̃ wò Mawu.+ Nyee nye Yehowa. 33  “‘Ne amedzrovi aɖe le gbɔwò le miaƒe anyigba dzi la, mègawɔ ŋlɔmi le eŋu o.+ 34  Amedzrovi si le mia gbɔ la nanɔ abe dumevidzidzi ke ene.+ Lɔ̃e abe ɖokuiwò ene, elabena miawo hã mienye amedzrowo kpɔ le Egipte-nyigba dzi.+ Nyee nye Yehowa, mia Mawu. 35  “‘Migatafa ame le ʋɔnudɔdrɔ̃ me o. Migazã nudzidzenu, nudanu, alo nudonu amebatɔ o.+ 36  Nudanu siwo de pɛpɛpɛ, nudakpe siwo de pɛpɛpɛ, nudogba blibo,* kple nudotre blibo*+ nanɔ mia si. Nyee nye Yehowa, mia Mawu, ame si kplɔ mi tso Egipte-nyigba dzi. 37  Eya ta milé nye sewo kple nye ʋɔnudrɔ̃ɖoɖowo katã me ɖe asi, ne miawɔ wo dzi.+ Nyee nye Yehowa.’”

Etenuŋɔŋlɔ

Egɔmeɖeɖe tẽe, “navɔ̃ dadaa kple fofoa.”
Alo, “luʋɔ.”
Agate ŋu afia, “Mègatɔ ɖi ne hawòvi ƒe agbe ɖo afɔku me o.”
Egɔmeɖeɖe tẽe, “abe aʋanuyi ene.”
Alo, “Migaɖu naneke si ŋu ʋu kpe ɖo o.”
Alo, “luʋɔ.” Hebrigbe me nya nephesh si wozã le afi sia fia ame kuku.
Egɔmeɖeɖe tẽe, “eye vɔvɔ̃ nanɔ nye kɔkɔeƒe la ŋu na mi.”
Egɔmeɖeɖe tẽe, “efa nudzidzenu si de pɛpɛpɛ.” Kpɔ Megbenyawo B14.
Egɔmeɖeɖe tẽe, “hin nudzidzenu si de pɛpɛpɛ.” Kpɔ Megbenyawo B14.