Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

3 Mose 18:1-30

EMENYAWO ƑE TOTOƉEME

  • Gbɔdɔdɔ manɔsenuwo (1-30)

    • Migasrɔ̃ Kanaantɔwo o (3)

    • Ƒometɔ kpamkpam gbɔ dɔdɔ (6-18)

    • Ne nyɔnu ɖo asi anyi (19)

    • Ŋutsu kple ŋutsu ƒe dɔdɔ (22)

    • Lãwo gbɔ dɔdɔ (23)

    • ‘Minɔ kɔkɔe ne anyigba la nagatu mi aƒu gbe o’ (24-30)

18  Yehowa gagblɔ na Mose be:  “Gblɔ na Israel-viwo be, ‘Nyee nye Yehowa mia Mawu.+  Migawɔ nu abe Egipte-nyigba si dzi mienɔ la dzi nɔlawo ene o, eye migawɔ nu abe Kanaan-nyigba si dzi mekplɔ mi yinae la dzi nɔlawo ene o.+ Eye migazɔ ɖe woƒe ɖoɖowo nu o.  Miwɔ nye ʋɔnudrɔ̃ɖoɖowo dzi, eye milé nye sewo me ɖe asi, ne miazɔ ɖe wo dzi.+ Nyee nye Yehowa mia Mawu.  Milé nye sewo kple nye ʋɔnudrɔ̃ɖoɖowo me ɖe asi; elabena ame sia ame si léa wo me ɖe asi la anɔ agbe.+ Nyee nye Yehowa.  “‘Mia dometɔ aɖeke megadɔ eƒe ƒometɔ kpamkpam aɖeke gbɔ o.+ Nyee nye Yehowa.  Mègadɔ fofowò gbɔ o, eye mègadɔ dawò gbɔ o. Dawòe, eya ta mègadɔ egbɔ o.  “‘Mègadɔ fofowò srɔ̃ gbɔ o,+ elabena enye ŋukpedodo fofowò.*  “‘Mègadɔ nɔviwònyɔnu gbɔ o, eɖanye fofowò vinyɔnu alo dawò vinyɔnu o, woɖadzii ɖe aƒe alo wodzii ɖe gbe o.+ 10  “‘Mègadɔ viwòŋutsu ƒe vinyɔnu alo viwònyɔnu ƒe vinyɔnu gbɔ o, elabena wò ŋutɔ wò amae. 11  “‘Mègadɔ fofowò srɔ̃ vinyɔnu, si nye fofowò ƒe vi gbɔ o, elabena nɔviwònyɔnue. 12  “‘Mègadɔ fofowò nɔvinyɔnu gbɔ o. Ʋu ɖeka mee eya kple fofowò tso.+ 13  “‘Mègadɔ dawò nɔvinyɔnu gbɔ o, elabena ʋu ɖeka mee eya kple dawò tso. 14  “‘Mègado ŋukpe fofowò nɔviŋutsu to srɔ̃a gbɔ dɔdɔ me o,* elabena miedo ƒome.+ 15  “‘Mègadɔ toyɔviwò gbɔ o.+ Viwòŋutsu srɔ̃e, eya ta mègadɔ egbɔ o. 16  “‘Mègadɔ nɔviwòŋutsu srɔ̃ gbɔ o,+ elabena enye ŋukpedodo nɔviwòŋutsu.* 17  “‘Mègadɔ nyɔnu kple vianyɔnu siaa gbɔ o.+ Mègadɔ viaŋutsu ƒe vinyɔnu alo vianyɔnu ƒe vinyɔnu gbɔ o. Ʋu ɖeka mee wotso, nuwɔna nyɔŋue* wònye. 18  “‘Ne srɔ̃wò le agbe la, mègaɖe nɔvianyɔnu kpe ɖe eŋu be wòanye eƒe atsusi o,+ mègadɔ egbɔ o. 19  “‘Ne nyɔnu ɖo asi anyi la, mègadɔ egbɔ o, elabena eŋu mekɔ o.+ 20  “‘Mègadɔ hawòvi srɔ̃ gbɔ atsɔ aƒo ɖi ɖokuiwò o.+ 21  “‘Mègatsɔ viwò sa vɔe na Molek o.+ Mègawɔ esia be nàƒo ɖi wò Mawu ƒe ŋkɔ o.+ Nyee nye Yehowa. 22  “‘Mègadɔ ŋutsu gbɔ abe nyɔnu gbɔ ene o.+ Ŋunyɔnu wònye. 23  “‘Ŋutsu aɖeke megadɔ kple lã aɖeke atsɔ aƒo ɖi eɖokui o, eye nyɔnu aɖeke megatsɔ eɖokui na lã aɖeke wòayɔ asii o.+ Mesɔ le dzɔdzɔme nu o. 24  “‘Migatsɔ nuwɔna siawo dometɔ aɖeke ƒo ɖi mia ɖokuiwo o, elabena nu siawo katãe dukɔ siwo nyam mele ɖa le mia ŋgɔ la tsɔ ƒo ɖi wo ɖokuiwoe.+ 25  Ale woƒe anyigba la ƒo ɖi, eya ta maɖo woƒe vodada teƒe na wo, eye anyigba la atu edzinɔlawo aƒu gbe.+ 26  Ke miawo la, milé nye sewo kple nye ʋɔnudrɔ̃ɖoɖowo+ me ɖe asi. Migawɔ ŋunyɔnu siawo ƒe ɖeke o, eɖanye dumevi alo amedzrovi si le mia dome o.+ 27  Elabena ŋunyɔnu siawo katãe anyigba si dzi yim miele la dzi nɔlawo wɔna,+ ale be anyigba la gblẽ. 28  Migagblẽ kɔ ɖo na anyigba la ne wòatu mi aƒu gbe abe ale si tututu wòle dukɔ siwo le mia ŋgɔ la tu ge aƒu gbe ene o. 29  Ne ame aɖe wɔ ŋunyɔnu siawo dometɔ aɖe la, woatsrɔ̃ ame* ma ɖa le eƒe dukɔ la dome. 30  Miwɔ nu siwo meɖo na mi la, eye migawɔ kɔnu nyɔŋu siwo wowɔ le mia ŋgɔ la dometɔ aɖeke+ atsɔ aƒo ɖi mia ɖokuiwo o. Nyee nye Yehowa mia Mawu.’”

Etenuŋɔŋlɔ

Egɔmeɖeɖe tẽe, “elabena fofowò ƒe amae.”
Egɔmeɖeɖe tẽe, “Mègaɖe ama fofowò nɔviŋutsu o.”
Egɔmeɖeɖe tẽe, “enye nɔviwòŋutsu ƒe ama.”
Alo, “ŋukpenanu; gbɔdɔnuwɔna vɔ̃ɖi.”
Alo, “luʋɔ.”