Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

3 Mose 16:1-34

EMENYAWO ƑE TOTOƉEME

  • Avuléŋkeke (1-34)

16  Yehowa ƒo nu kple Mose le Aron viŋutsu eve siwo ku le esi wote va Yehowa ŋkume madzemadzee megbe.+  Yehowa gblɔ na Mose be: “Gblɔ na nɔviwò Aron be wòagava kɔkɔeƒe+ la le xɔmetsovɔ+ la godo le nutunu si le Aɖakaa nu la ŋgɔ ɣesiaɣi ko o, ne wòagaku o,+ elabena maɖe ɖokuinye afia le alilikpo me+ le nutunu la tame.+  “Nu siwo Aron atsɔ ɖe asi ne egbɔna kɔkɔeƒe lae nye esi: nyitsui ɖeka si woatsɔ asa nuvɔ̃vɔ+ kple agbo ɖeka si woatsɔ asa numevɔ.+  Nedo aklalawu ʋlaya kɔkɔe+ la kple aklalatakpui*+ eye wòatsɔ alidziblanu+ la abla ali dzi ahatsɔ aklalatablanu+ la aɖɔ ɖe ta. Awu kɔkɔewoe wonye.+ Wòale tsi+ hafi ado wo.  “Eye wòaxɔ gbɔ̃tsui eve le Israel ƒe ha+ la si atsɔ asa nuvɔ̃vɔ kple agbo ɖeka atsɔ asa numevɔ.  “Aron natsɔ eƒe nuvɔ̃vɔsa ƒe nyitsu la avɛ ne wòatsɔ alé avu ɖe eɖokui+ kple eƒe aƒe la ta.  “Eyome wòakplɔ gbɔ̃ eveawo ava Yehowa ŋkume le takpegbadɔa nu.  Eye Aron nadzidze nu ɖe gbɔ̃ eveawo dzi; ɖeka nanye Yehowa tɔ, eye evelia nanye Azazel* tɔ.  Aron natsɔ gbɔ̃ si dzi nudzidzea dze+ na Yehowa la asa nuvɔ̃vɔ. 10  Ke wòakplɔ gbɔ̃ si dzi nudzidzea dze na Azazel la ava Yehowa ŋkume agbagbee, ne woalé avu ɖe eta, ale be woaɖoe ɖe Azazel le gbedzi.+ 11  “Eyome Aron natsɔ eƒe nuvɔ̃vɔsanyitsu si wòtsɔ vɛ la alé avu ɖe eya ŋutɔ kple eƒe aƒe la ta; eye wòawu nuvɔ̃vɔsanyitsu si nye eya ŋutɔ tɔ+ la. 12  “Eye wòatsɔ dzudzɔdosonu+ aɖe dzoka xɔxɔwo le vɔsamlekpuia dzi+ le Yehowa ŋkume ɖe eme wòayɔ, eye wòaku dzudzɔdonu ʋeʋĩ+ si woto memie la asiʋlo eve atsɔ ava xɔmetsovɔ+ la godo. 13  Azɔ wòakɔ dzudzɔdonu ʋeʋĩ la ɖe dzoa me le Yehowa ŋkume,+ eye dzudzɔdonu ʋeʋĩ la ƒe dzudzɔ naxɔ Aɖaka la ƒe nutunu+ si le Ðaseɖinua+ dzi la dzi, ne wòagaku o. 14  “Atsɔ eƒe asibidɛ ade nyitsua ƒe ʋu+ la ƒe ɖe me agee ɖe nutunu la ŋgɔ le ɣedzeƒekpa dzi, eye wòatsɔ eƒe asibidɛ age ʋu la ƒe ɖe ɖe nutunu la ŋgɔ zi adre.+ 15  “Eyome wòawu nuvɔ̃vɔsagbɔ̃ si nye dukɔa tɔ+ la atsɔ eƒe ʋu la ava xɔmetsovɔ la godo,+ eye wòawɔ eƒe ʋu+ la abe ale si wòwɔ nyitsua ƒe ʋu ene; wòagee ɖe nutunu la ŋgɔ. 16  “Eye wòalé avu ɖe kɔkɔeƒea ta le Israel-viwo ƒe nu makɔmakɔ wɔwɔwo kpakple woƒe vodadawo kple woƒe nu vɔ̃wo katã ta.+ Alea kee wòawɔ na takpegbadɔ si le wo dome la hã le woƒe nu makɔmakɔ wɔwɔwo ta. 17  “Ne eyi takpegbadɔ la me be wòalé avu le kɔkɔeƒea la, ame bubu aɖeke megayi ɖe eme o va se ɖe esime wòado go. Alé avu ɖe eya ŋutɔ ɖokui kple eƒe aƒe+ la kpakple Israel ƒe ha blibo la katã+ ta. 18  “Eye wòado go ava vɔsamlekpui+ si le Yehowa ŋkume la gbɔ ahalé avu ɖe eta, eye wòatsɔ nyitsua ƒe ʋua ƒe ɖe kple gbɔ̃ la ƒe ʋua ƒe ɖe asisi ɖe vɔsamlekpuia ƒe dzowo ŋu keŋ. 19  Azɔ hã wòatsɔ eƒe asibidɛ ahlẽ ʋu la ƒe ɖe zi adre, eye wòakɔ eŋu tso Israel-viwo ƒe nu makɔmakɔ wɔwɔwo me ahawɔe kɔkɔe. 20  “Ne elé avu+ ɖe kɔkɔeƒe la kple takpegbadɔ la kpakple vɔsamlekpui+ la ta vɔ la, ekema wòatsɔ gbɔ̃ gbagbe+ la hã avɛ. 21  Eye Aron natsɔ eƒe asi eveawo aɖo gbɔ̃ gbagbe la ƒe tame, eye wòaʋu Israel-viwo ƒe vodada, dzidada, kple nu vɔ̃wo katã me akɔ ɖe gbɔ̃ la ƒe ta dzi,+ eye wòana ŋutsu si wotia da ɖi la nakplɔe aɖo ɖe gbedzi. 22  Eye wòaɖe asi le gbɔ̃ la ŋu ɖo ɖe gbedzi+ be wòatsɔ woƒe vodadawo+ katã ayi gbedadaƒo.+ 23  “Emegbe Aron nava takpegbadɔa me aɖe aklalawu siwo wòdo yi kɔkɔeƒea la ɖi, eye wòagblẽ wo ɖe afi ma. 24  Wòale tsi+ le teƒe kɔkɔe, eye wòado eƒe awuwo;+ eyome wòado go asa numevɔ+ ɖe eɖokui ta, eye wòasa numevɔ+ ɖe dukɔ la hã ta ahalé avu ɖe eya ŋutɔ kple dukɔ la ta.+ 25  Eyome wòatsɔ nuvɔ̃vɔsalã la ƒe ami ado dzudzɔ le vɔsamlekpuia dzi. 26  “Ke ame si kplɔ gbɔ̃ la ɖo ɖe Azazel+ la nanya eƒe awuwo ahale tsi; emegbe ate ŋu ava asaɖa la me. 27  “Atsɔ nuvɔ̃vɔsanyitsu kple nuvɔ̃vɔsagbɔ̃ siwo ƒe ʋu wotsɔ lé avu le kɔkɔeƒe la ayi asaɖa la godo, eye woatɔ dzo woƒe agbalẽ kple woƒe lã kpakple woƒe mĩ.+ 28  Ame si tɔ dzo wo la nanya eƒe awuwo ahale tsi; emegbe ate ŋu ava asaɖa la me. 29  “Esia anye se na mi ɖaa: Le ɣleti adrelia ƒe ŋkeke ewolia dzi la, miawɔ fu mia ɖokui,* eɖanye dumevi alo amedzrovi si le mia dome o, migawɔ dɔ aɖeke o.+ 30  Gbe ma gbe woalé avu+ ɖe mia ta ne mia ŋu nakɔ. Mia ŋu akɔ le Yehowa ŋkume tso miaƒe nu vɔ̃wo katã me.+ 31  Dzudzɔ blibo ƒe sabat wònye na mi, eye miawɔ fu mia ɖokui.*+ Se wònye na mi ɖaa. 32  “Ame si woasi ami na+ aɖoe nunɔlae*+ be wòaxɔ ɖe fofoa teƒe+ la nasa avulévɔ, eye wòado aklalawu+ siwo nye awu kɔkɔeawo.+ 33  Alé avu ɖe kɔkɔeƒe+ la, takpegbadɔ+ la, kple vɔsamlekpui+ la ta, eye wòalé avu ɖe nunɔlawo kple ha blibo la katã ta.+ 34  Esia nanye se na mi ɖaa,+ ne woalé avu ɖe Israel-viwo katã ƒe nu vɔ̃wo ta zi ɖeka le ƒe me.”+ Eye wòwɔ abe ale si tututu Yehowa de se na Mose ene.

Etenuŋɔŋlɔ

Alo, “agbotɛ siwo wodona ɖe awu te.”
Ðewohĩ efia “Gbɔ Si Bú.”
Alo, “miaƒe luʋɔ.” Zi geɖe la, be “woawɔ fu ame ɖokui” fia nutete ame ɖokui le mɔ vovovowo nu, nutsitsidɔ hã le eme.
Alo, “miaƒe luʋɔ.”
Egɔmeɖeɖe tẽe, “ade ŋusẽ esi.”