Dzo kpo yi emenuwo dzi

Dzo kpo yi emenuawo dzi

2 Samuel 12:1-31

EMENYAWO ƑE TOTOƉEME

  • Natan ka mo na David (1-15a)

  • Ðevi si Bat-Seba dzi la ku (15b-23)

  • Bat-Seba dzi Salomo (24, 25)

  • Woxɔ Amon du Raba (26-31)

12  Yehowa dɔ Natan+ ɖe David gbɔ. Eye wòva egbɔ+ va gblɔ nɛ be: “Ŋutsu eve le du ɖeka me, ɖeka nye kesinɔtɔ, eye evelia nye ame dahe.  Alẽ kple nyi gbogbo aɖe ŋutɔ le kesinɔtɔ la si;+  ke naneke mele ame dahe la ya si o, negbe alẽnɔe ɖeka si wòƒle la ko.+ Eye ŋutsua nyii wòtsi le eya kple viawo gbɔ. Nu sue si wòkpɔ la ƒe ɖee alẽnɔe la ɖuna, eƒe kplu nue wònoa nu le, eƒe akɔnue wòmlɔna. Eye wòva le nɛ abe vianyɔnu ene.  Emegbe amedzro aɖe va dze kesinɔtɔ la, ke melé eya ŋutɔ ƒe alẽwo kple nyiwo dometɔ aɖeke wu na amedzro si va dze egbɔ la o. Ke boŋ eyi ɖalé ame dahe la ƒe alẽnɔe la, eye wòwui na ŋutsu si va dze egbɔ la.”+  Enumake dzi ku David ɖe ŋutsu la ŋu vevie, eye wògblɔ na Natan be: “Zi ale si Yehowa le agbe la,+ ŋutsu si wɔ nu sia la dze ku!  Ele be wòaɖo alẽnɔe la teƒe zi ene,+ le esi wòwɔ nu sia, eye ame ƒe nu mewɔ nublanui nɛ o ta.”  Eye Natan gblɔ na David be: “Wòe nye ŋutsu la! Ale Yehowa, Israel ƒe Mawu la, gblɔe nye esi: ‘Nyee si ami na wò nèzu fia ɖe Israel dzi,+ eye nyee ɖe wò tso Saul si me.+  Melɔ̃ be matsɔ wò aƒetɔ ƒe aƒe ana wò,+ eye be matsɔ wò aƒetɔ srɔ̃wo+ aɖo wò akɔnu, eye metsɔ Israel kple Yuda ƒe aƒe na wò.+ Eye ne ema mesɔ gbɔ o la, malɔ̃ faa atsɔ nu bubuwo akpee na wò.+  Nu ka tae nèdo vlo Yehowa ƒe nya hewɔ nu si nye vɔ̃ le eŋkume? Ètsɔ yi wu Uriya,+ Hititɔ la, eye nèxɔ srɔ̃a ɖe+ esi nèna wòtsi Amonitɔwo ƒe yi nu.+ 10  Eya ta yi madzo le aƒewò me o tegbee,+ le esi nèdo vlom, eye nèxɔ Uriya, Hititɔ la, srɔ̃ ɖe ta.’ 11  Ale Yehowa gblɔe nye esi: ‘Kpɔ ɖa, mana vɔ̃ natso wò ŋutɔ aƒewò me ava dziwò;+ maxɔ srɔ̃wòwo le wò ŋutɔ ŋkuwòme atsɔ ana hawòvi,+ eye wòadɔ srɔ̃wòwo gbɔ le ŋdɔkutsu dzatsɛ.*+ 12  Togbɔ be wò ya nèwɔe le bebe me hã la,+ nye la mawɔ nu sia le Israel blibo la katã ŋkume le ŋdɔkutsu dzatsɛ.’”* 13  Eye David gblɔ na Natan be: “Mewɔ nu vɔ̃ ɖe Yehowa ŋu.”+ Natan ɖo eŋu na David be: “Yehowa hã tsɔ wò nu vɔ̃ la ke wò.*+ Mèle kuku ge o.+ 14  Ke esi mèbu Yehowa kura o, eye nèwɔ nu alea ta la, vi si wodzi na wò la aku godoo.” 15  Emegbe Natan dzo yi aƒe me. Yehowa na ɖevi si Uriya srɔ̃ dzi na David la dze dɔ. 16  Eye David ƒo koko na Mawu vavã la le ɖevi la ta. David tsi nu dɔ, eye wòtsia anyigba dɔna le zã me.+ 17  Eya ta eƒe me ametsitsiwo va bɔbɔ ɖe egbɔ be yewoafɔe tso anyigba, ke melɔ̃ o, eye meɖu nu kpli wo o. 18  Le ŋkeke adrea gbe la, ɖevi la ku, gake David ŋumewo vɔ̃ be yewoagblɔ nɛ be ɖevi la ku. Elabena wogblɔ be: “Esi ɖevi la le agbe la, míeƒo nu nɛ, ke mese míaƒe gbe o. Ekema aleke míawɔ agblɔ nɛ be, ɖevi la ku? Ava wɔ nu gbegblẽ aɖe.” 19  Esi David kpɔ be yeƒe dɔlawo le dalĩ dom na wo nɔewo la, edze sii be, ɖevi la ku. Eya ta David bia eƒe dɔlawo be: “Ðe ɖevi la kua?” Woɖo eŋu be: “Eku.” 20  Eya ta David fɔ le anyigba, le tsi, si ami+ heɖɔli eƒe awuwo, eye wòyi Yehowa ƒe me+ ɖade ta agu. Emegbe etrɔ va aƒe* me hebia be woatsɔ nuɖuɖu aɖo ye kɔme, eye wòɖu nu. 21  Eye eƒe dɔlawo biae be: “Wò nuwɔna sia gɔme ɖe? Ètsi nu dɔ henɔ avi fam le ɖevi la ta esime wòle agbe; ke esi ɖevia nya ku ko la, ètso, eye nèɖu nu.” 22  Eɖo eŋu be: “Esi ɖevia gale agbe la, metsi nu dɔ,+ eye menɔ avi fam, elabena mebu be, ‘Ðewohĩ Yehowa ave nunye, ale be ɖevi la natsi agbe.’+ 23  Ke azɔ esi wòku la, nu ka tae magatsi nu adɔ? Ðe mate ŋu ana wòagbɔ agbea?+ Nyee ayi egbɔ,+ ke eya matrɔ ava gbɔnye o.”+ 24  David fa akɔ na srɔ̃a Bat-Seba.+ Emegbe David dɔ egbɔ, eye wòdzi ŋutsuvi, eye wona ŋkɔe be Salomo.*+ Eye Yehowa lɔ̃ ɖevi la,+ 25  eye wòdɔ nyagblɔɖila Natan+ ɖa be wòana ŋkɔe be Yedidiya* le esi Yehowa lɔ̃e ta. 26  Ke Yoab nɔ aʋa la dzi kple Amonitɔwo+ ƒe Raba,+ eye wòxɔ fiadu la.+ 27  Eye Yoab dɔ amewo ɖo ɖe David gblɔ be: “Mewɔ aʋa kple Raba,+ eye mexɔ tsidu la.* 28  Eya ta ƒo aʋawɔla susɔeawo nu ƒu, eye nàƒu asaɖa anyi ɖe du la ŋu axɔe. Ne wòaganye be nyee xɔ du la, eye woayɔ nye ŋkɔ ɖe eŋu o.” 29  Ale David ƒo aʋawɔlawo katã nu ƒu yi Raba, eye wòwɔ aʋa kplii hexɔe. 30  Eye wòɖe Malkam* ƒe fiakuku le eta. Eƒe kpekpeme nye sika talento* ɖeka, eye kpe xɔasiwo le eŋu; eye wotsɔe ɖɔ na David. Elɔ aboyonu+ gbogbo aɖewo hã tso dua me.+ 31  Ekplɔ dua me tɔwo dzoe, eye wòna wowɔ kpekpakpadɔwo eye wòɖo gadɔwɔnu ɖaɖɛ kple fía dɔwo na wo, eye wòna womè anyikpewo. Aleae wòwɔ Amonitɔwo ƒe duwo katã. Mlɔeba David kple aʋakɔ blibo la gbugbɔ va Yerusalem.

Etenuŋɔŋlɔ

Egɔmeɖeɖe tẽe, “ɣea nu.”
Egɔmeɖeɖe tẽe, “ɣea nu.”
Alo, “na wò nu vɔ̃ la nu yi.”
Alo, “fiasã.”
Hebrigbe me nya si me woɖe ŋkɔ sia tsoe la gɔmee nye “Ŋutifafa.”
Egɔmee nye, “Ame Si Ƒe Nya Yah Lɔ̃.”
Ate ŋu afia, tsitsoƒe siwo le dua me.
Talento ɖeka le kilogram 34.2. Kpɔ Megbenyawo B14.