Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

2 Mose 8:1-32

EMENYAWO ƑE TOTOƉEME

  • Fuwɔame 2: akpɔkplɔwo (1-15)

  • Fuwɔame 3: muwo (16-19)

  • Fuwɔame 4: togbatowo (20-32)

    • Togbato aɖeke menɔ Gosen-nyigba dzi o (22, 23)

8  Eye Yehowa gblɔ na Mose be: “Yi Farao gbɔ, nàgblɔ nɛ be: ‘Ale Yehowa gblɔe nye esi: “Ðe asi le nye dukɔ la ŋu ne woayi aɖasubɔm.+  Ne ègbe be yemaɖe asi le wo ŋu woadzo o la, matsɔ akpɔkplɔwo awɔ fu wò anyigba blibo la katã.+  Akpɔkplɔwo ayɔ Nil-tɔsisi la me taŋtaŋ, eye woado age ɖe wò aƒe me kple wò xɔgã me, woanɔ wò aba dzi kple wò subɔviwo ƒe xɔwo me, woava ƒo ɖe wò dukɔ la me tɔwo dzi, woage ɖe wò abolokpowo me, eye woanɔ wò amɔwɔbluzewo* me.+  Akpɔkplɔawo ava ƒo ɖe wò ŋutɔ kple wò dukɔ la me tɔwo kpakple wò subɔviwo katã dzi.”’”  Emegbe Yehowa gblɔ na Mose be: “Gblɔ na Aron be: ‘Do atikplɔ si le asiwò la ɖe tɔsisiwo, Nil-tɔʋuwo kple tsiteƒewo dzi, ne akpɔkplɔwo naxɔ Egipte-nyigba la dzi.’”  Ale Aron do eƒe asi ɖe Egipte tsiwo dzi, eye akpɔkplɔwo do va, eye woxɔ Egipte-nyigba la dzi keŋ.  Ke akunyawɔlawo tsɔ woƒe ayemeɖaŋuwo wɔ nenema ke, eye woawo hã wona akpɔkplɔwo do va Egipte-nyigba la dzi.+  Eye Farao yɔ Mose kple Aron gblɔ be: “Miɖe kuku na Yehowa, ne wòaɖe akpɔkplɔawo ɖa le nye kple nye dukɔ la dome,+ elabena medi be maɖe asi le dukɔ la ŋu woayi aɖasa vɔ na Yehowa.”  Eye Mose gblɔ na Farao be: “Megblẽe ɖe asiwò me be nàgblɔ ɣeyiɣi si me maɖe kuku woaɖe akpɔkplɔawo ɖa le wò kple wò subɔviwo kpakple wò dukɔ la ŋu, kple wò aƒewo me la nam. Negbe Nil-tɔsisia me koe woasusɔ ɖo.” 10  Eɖo eŋu be: “Etsɔ.” Eye wògblɔ be: “Ava eme abe ale si nègblɔe ene, ne nàdze sii be ame aɖeke mede Yehowa mía Mawu la nu o.+ 11  Akpɔkplɔawo adzo le wò ŋutɔ kple wò subɔviwo kpakple wò dukɔ la ŋu, kple wò aƒewo me siaa. Negbe Nil-tɔsisia me koe woasusɔ ɖo.”+ 12  Ale Mose kple Aron dzo le Farao gbɔ, eye Mose ƒo koko na Yehowa le akpɔkplɔ siwo wòkplɔ ƒu Farao la ŋuti.+ 13  Eya ta Yehowa wɔ abe ale si Mose gblɔe ene, eye akpɔkplɔawo ku le aƒewo me, le xɔxɔnuwo kple afi sia afi. 14  Eye woli kɔ wo ɖi gleglegle, eye anyigba la dzi de asi ʋeʋẽ me kũu. 15  Ke esi Farao kpɔ be gbɔdzɔe va aƒe la, egasẽ dzi me;+ egbe toɖoɖo wo, abe ale si tututu Yehowa gblɔe ene. 16  Eye Yehowa gblɔ na Mose be: “Gblɔ na Aron be: ‘Do wò atikplɔ la ɖa, eye nàƒo ke si le anyigba dzi, eye atrɔ azu muwo* ɖe Egipte-nyigba blibo la katã dzi.’” 17  Eye wowɔe nenema. Ale Aron do eƒe asi kple eƒe atikplɔ la ɖa, eye wòƒo ke si le anyigba dzi, eye muwo va ƒo ɖe amegbetɔwo kple lãwo dzi. Eye ke siwo katã le anyigba la zu muwo le Egipte-nyigba blibo la katã dzi.+ 18  Eye akunyawɔlawo hã dze agbagba be yewoatsɔ yewoƒe ayemeɖaŋuwo ana muwo nava nenema ke,+ gake womete ŋui o. Eye muwo va ƒo ɖe amegbetɔwo kple lãwo dzi. 19  Eya ta akunyawɔlaawo gblɔ na Farao be: “Esia la Mawu ƒe asibidɛ ye!”+ Ke Farao gasẽ dzi me kokoko, eye meɖo to wo o, abe ale si tututu Yehowa gblɔe ene. 20  Eye Yehowa gblɔ na Mose be: “Fɔ ŋdi kanya nàyi aɖatɔ ɖe Farao ŋkume. Kpɔ ɖa, egbɔna tɔ la nu! Eye nàgblɔ nɛ be: ‘Ale Yehowa gblɔe nye esi: “Ðe asi le nye dukɔ la ŋu woayi aɖasubɔm. 21  Ke ne mèɖe asi le nye dukɔ la ŋu o la, madɔ togbatowo woava ƒo ɖe wò ŋutɔ, wò subɔviwo kple wò dukɔ la dzi, eye woayɔ wò aƒewo me fũu; togbatowo ayɔ Egiptetɔwo ƒe aƒewo me kple anyigba si dzi wole la dzi fũu. 22  Gbe ma gbe maɖe Gosen-nyigba si dzi nye dukɔ le la ɖe vovo. Togbato aɖeke manɔ afi ma o,+ eye esia mee nàdze sii le be, nye Yehowa mele anyigba sia dzi.+ 23  Made vovototo nye dukɔ kple wò dukɔ la dome. Etsɔe dzesi sia ava eme.”’” 24  Eye Yehowa wɔe nenema, eye togbatowo ƒe ha gã aɖe va ƒo ɖe Farao ƒe aƒe kple eƒe subɔviwo ƒe aƒewo kple Egipte-nyigba blibo la katã dzi.+ Togbatoawo gblẽ anyigba la keŋkeŋ.+ 25  Mlɔeba Farao yɔ Mose kple Aron vɛ hegblɔ na wo be: “Miyi ɖasa vɔ na mia Mawu la le anyigba la dzi.” 26  Ke Mose gblɔ be: “Mesɔ be míawɔe nenema o, elabena nu si nyɔa ŋu na Egiptetɔwo la tsɔ ge míala asa vɔ na Yehowa mía Mawu la.+ Ne míetsɔ nu si nyɔa ŋu na Egiptetɔwo sa vɔ le wo ŋkume la, ɖe womaƒu kpe mí oa? 27  Míazɔ mɔ ŋkeke etɔ̃ ayi gbedzi, eye míasa vɔ na Yehowa mía Mawu la, abe ale si tututu wòde se na mí ene.”+ 28  Farao gblɔ azɔ be: “Maɖe asi le mia ŋu miayi aɖasa vɔ na Yehowa mia Mawu la le gbedzi. Negbe ɖeko migayi didiƒe akpa o. Miɖe kuku ɖe tanye.”+ 29  Eye Mose gblɔ be: “Ne menya dzo le gbɔwò ko la, maɖe kuku na Yehowa ɖe tawò, eye togbatoawo adzo le Farao, eƒe subɔviwo kple eƒe dukɔ la dome etsɔ. Ðeko Farao megable mí* ake ahagbe asiɖeɖe le dukɔ la ŋu be woayi aɖasa vɔ na Yehowa o.”+ 30  Emegbe Mose dzo le Farao gbɔ, eye wòɖe kuku na Yehowa.+ 31  Eye Yehowa wɔ abe ale si Mose gblɔ ene, eye togbatoawo dzo le Farao, eƒe subɔviwo, kple eƒe dukɔ la dome. Ðeka pɛ hã mesusɔ o. 32  Ke Farao gasẽ dzi me kokoko, eye meɖe asi le dukɔ la ŋu woyi o.

Etenuŋɔŋlɔ

Alo, “amɔwɔblugbawo.”
Wonye nudzodzoevi suesue aɖewo siwo le abe mu ene, eye wobɔ ɖe Egipte.
Alo, “megatrɔ mí to eme.”