Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

2 Mose 35:1-35

EMENYAWO ƑE TOTOƉEME

  • Sabat ŋuti mɔfiamewo (1-3)

  • Nudzɔdzɔ hena avɔgbadɔ la (4-29)

  • Mawu ƒe gbɔgbɔ yɔ Bezalel kple Oholiab (30-35)

35  Emegbe Mose yɔ Israel ƒe ha blibo la katã ƒo ƒu eye wògblɔ na wo be: “Se siwo Yehowa de be miawɔ wo dzi lae nye esi:+  Ŋkeke ade miawɔ dɔ, ke ŋkeke adrelia nanɔ kɔkɔe na mi, dzudzɔ blibo ƒe sabat wònye na Yehowa.+ Ame sia ame si awɔ dɔ le edzi la, woawui.+  Migado dzo le mia nɔƒewo le Sabat ŋkeke la dzi o.”  Mose gagblɔ na Israel ƒe ha blibo la be: “Se si Yehowa de lae nye esi:  ‘Midzɔ nu na Yehowa.+ Ame sia ame si ƒe dzi ʋãe+ la, nadzɔ nu siawo na Yehowa: sika, klosalo, akɔbli,  ka blɔtɔ, alẽfuka si wode ama aɖabɛ dzĩtɔe, ka dzĩ, ɖeti ɣi biɖibiɖi, gbɔ̃fu,+  agbogbalẽ si wode ama dzĩi, nyogbalẽ kple akasiati,  ami si woade akaɖigbɛ la me, balsam-mi si woatsɔ awɔ ami kɔkɔe la kple atike ʋeʋĩ+ la,  oniks-kpe kple kpe xɔasi bubu siwo woaɖo ɖe kɔmewu+ la kple akɔtaɖonu+ la ŋu. 10  “Ame siwo katã aɖaŋu le tagbɔ na+ le mia dome la, nava wɔ dɔ siwo katã Yehowa ɖo la; 11  woawoe nye: avɔgbadɔ la kple eƒe agbadɔvɔ kpakple etamegbavɔ la, eƒe gaviwo, eƒe ʋuƒowo, eƒe xɔblatiwo, eƒe sɔtiwo kple eƒe anyinɔwo; 12  Aɖaka+ la kple eŋu kpowo,+ nutunu+ la kple xɔmetsovɔ+ la; 13  kplɔ̃+ la, eŋu kpowo kple eŋu nuwo katã, kple ŋkumeɖobolo+ la; 14  akaɖiti+ la kple eŋu nuwo kpakple eƒe akaɖigbɛwo, kple akaɖigbɛmemi la;+ 15  dzudzɔdomlekpui+ la kple eŋu kpowo; ami kɔkɔe la kple atike ʋeʋĩ+ la; avɔgbadɔ la ƒe mɔnuvɔ; 16  numevɔsamlekpui+ la kple eŋu akɔbligaɖɔ la, eŋu kpowo kple eŋu nuwo katã; ze la kple eƒe zɔ;+ 17  avɔ si woatsɔ atɔ kpɔ ɖe xɔxɔnu+ la ŋu, eƒe kpɔtiwo kple eƒe anyinɔwo; xɔxɔnu la ƒe mɔnuvɔ la; 18  avɔgbadɔ la ƒe tsyotiwo kple xɔxɔnu la ƒe tsyotiwo kple wo ŋu kawo;+ 19  awu siwo woalɔ̃ nyuie+ be woatsɔ awɔ subɔsubɔdɔ le kɔkɔeƒe la, awu kɔkɔeawo na nunɔla Aron,+ kple viaŋutsuwo ƒe awu siwo woado awɔ nunɔladɔwo.’” 20  Azɔ Israel ƒe ha blibo la dzo le Mose ŋkume. 21  Azɔ ame sia ame si ƒe dzi kple eƒe gbɔgbɔ ʋãe+ la, va dzɔ nu na Yehowa, be woatsɔ awɔ takpegbadɔ la ƒe dɔ kple eŋu nuwo katã kpakple awu kɔkɔeawo. 22  Eye ŋutsuwo kple nyɔnuwo, ame sia ame si lɔ̃ tso dzi me faa la va. Wotsɔ atsyɔ̃ɖogɛwo, togɛwo, asigɛwo, nyɔnuwo ƒe atsyɔ̃ɖonuwo kple sikanuwo katã ƒomevi vɛ. Ɛ̃, ame sia ame dzɔ sika* na Yehowa.+ 23  Eye ame siwo katã si ka blɔtɔ, alẽfuka si wode ama aɖabɛ dzĩtɔe, ka dzĩ, ɖeti ɣi biɖibiɖi, gbɔ̃fu, agbogbalẽ siwo wode ama dzĩi kple nyogbalẽ le la, tsɔ wo vɛ. 24  Ame siwo katã di be yewoadzɔ klosalo kple akɔbli la, dzɔ wo na Yehowa, eye ame siwo katã si akasiati le la tsɔe vɛ be woatsɔ awɔ nuawo ŋuti dɔ la. 25  Eye nyɔnu siwo katã aɖaŋu le tagbɔ na+ la tsɔ woƒe asiwo tre ɖeti, ka blɔtɔ, alẽfuka si wode ama aɖabɛ dzĩtɔe, ka dzĩ kple ɖeti ɣi eye wotsɔ wo vɛ. 26  Eye nyɔnu siwo katã nya gbɔ̃fu tetre nyuie eye woƒe dzi ʋã wo la, tre gbɔ̃fu. 27  Eye tatɔwo tsɔ oniks-kpewo kple kpe xɔasi siwo woaɖo ɖe kɔmewua kple akɔtaɖonu la ŋu vɛ,+ 28  hekpe ɖe balsam-mi, akaɖigbɛmemi, ami si woatsɔ awɔ ami kɔkɔe+ la kple atike ʋeʋĩ+ la ŋu. 29  Ŋutsu kple nyɔnu siwo katã ƒe dzi ʋã wo be woatsɔ nane avɛ hena dɔ blibo si Yehowa ɖo be woawɔ to Mose dzi la, tsɔ wo vɛ; Israel-viwo va na lɔlɔ̃nu faa nunanawo Yehowa.+ 30  Eye Mose gblɔ na Israel-viwo be: “Kpɔ ɖa, Yehowa tia Bezalel, si nye Uri vi, Hur vi, tso Yuda-to la me.+ 31  Mawu tsɔ eƒe gbɔgbɔ yɔe fũu eye wòna nunya, gɔmesese, sidzedze kple aɖaŋudɔwo katã ƒomevi wɔwɔ ƒe ŋutetee, 32  ne wòanya ale si wowɔa aɖaŋudɔ vovovowo, ale si wowɔa sika, klosalo kple akɔbli ŋu dɔe, 33  ale si woakpa kpe atsɔ ado atsyã na nuwo, kple ale si woakpa ati hena aɖaŋunu ɖe sia ɖe ƒomevi wɔwɔ. 34  Eye wòdee dzi me na eya kple Oholiab,+ si nye Ahisamak si tso Dan-to la me ƒe vi, be woafia nu. 35  Ede nunya woƒe dzi me fũu,+ be woanya aɖaŋudɔwo wɔwɔ, aɖaŋuvɔlɔlɔ̃, be woanya ale si woatsɔ ka blɔtɔ, alẽfuka si wode ama aɖabɛ dzĩtɔe, ka dzĩ kple ɖeti ɣi biɖibiɖi alɔ̃ nui. Ŋutsu siawo awɔ dɔ ɖe sia ɖe ƒomevi, eye woawɔ aɖaŋudɔwɔnu vovovoawo.

Etenuŋɔŋlɔ

Egɔmeɖeɖe tẽe: “dzɔ sika be wòanye nunyèvɔsa.”