2 Mose 34:1-35

  • Wokpa kpe gbadzɛ bubuwo (1-4)

  • Mose kpɔ Yehowa ƒe ŋutikɔkɔe (5-9)

  • Wogbugbɔ nubabla la me nyawo gblɔ (10-28)

  • Mose ƒe mo klẽ (29-35)

34  Eye Yehowa gblɔ na Mose be: “Kpa kpe gbadzɛ eve abe gbãtɔawo ene,+ ne maŋlɔ nya siwo le kpe gbadzɛ gbãtɔ+ siwo nègbã+ dzi la, ɖe wo dzi.  Dzra ɖo na etsɔ ŋdi, elabena àlia Sinai To la le ŋdi me ava gbɔnye le toa tame.+  Ke ame aɖeke megayi kpli wò o. Azɔ hã, ame aɖeke meganɔ to bliboa ƒe afi aɖeke o. Eye alẽ alo nyi aɖeke hã megava ɖu gbe le to ma gbɔ o.”+  Ale Mose kpa kpe gbadzɛ eve abe gbãtɔawo ene, eye wòfɔ ŋdi kanya helia Sinai To la, abe ale si tututu Yehowa de se nɛ ene, eye wòtsɔ kpe gbadzɛ eveawo ɖe asi.  Eye Yehowa ɖi va+ le alilikpo la me henɔ egbɔ le afi ma, eye wòɖe gbeƒã eƒe ŋkɔ Yehowa.+  Eye Yehowa va to eŋu yi hele gbeƒã ɖem be: “Yehowa, Yehowa, Mawu nublanuikpɔla+ kple veveseɖeamenula,*+ ame si medoa dziku kabakaba o,+ eye eƒe lɔlɔ̃ si nu metsina o+ kple eƒe nuteƒewɔwɔ sɔ gbɔ,+  ame si ɖea lɔlɔ̃ si nu metsina o fiaa ame akpeakpewo,+ eye wòtsɔa vodada, dzidada kple nu vɔ̃ kena,+ ke megbea tohehe na fɔɖila o;+ ame si hea fofowo ƒe vodada ŋuti tohehe vaa viwo kple tɔgbuiyɔviwo dzi, vaa dzidzime etɔ̃lia kple dzidzime enelia dzi.”+  Enumake Mose bɔbɔ hetsyɔ mo anyi.  Eye wògblɔ be: “Oo Yehowa, azɔ ne ève nunye la, ekema Yehowa, togbɔ be míenye dukɔ sẽdzime*+ hã, meɖe kuku, nɔ mía dome míayi,+ eye nàtsɔ míaƒe vodada kple míaƒe nu vɔ̃ ake+ ahaxɔ mí míazu tɔwò.” 10  Eɖo eŋu be: “Kpɔ ɖa, mele nu blam kpli mi. Mawɔ nukunu siwo tɔgbi womewɔ le anyigba blibo la dzi alo dukɔwo katã dome kpɔ o+ la le wò dukɔ blibo la ŋkume, eye dukɔ si dome nèle la katã akpɔ Yehowa ƒe dɔwɔwɔ, elabena nu si wɔ ge mala la adzi ŋɔ na mi.+ 11  “Lé se si dem mele na wò egbea la me ɖe asi.+ Kpɔ ɖa, manya Amoritɔwo, Kanaantɔwo, Hititɔwo, Perizitɔwo, Hivitɔwo kple Yebusitɔwo ɖa le ŋgɔwò.+ 12  Kpɔ nyuie be nàgabla nu kple anyigba si dzi yim nèle la dzi nɔlawo o,+ ne wòagazu mɔ̃ na mi o.+ 13  Ke boŋ mikaka woƒe vɔsamlekpuiwo, mimu woƒe trɔ̃sɔtiwo, eye milã woƒe Asera-tiwo* ƒu anyi.+ 14  Mègade ta agu na mawu bubu+ aɖeke o, elabena Yehowa nye ame si* biaa ɖokuitsɔtsɔna blibo. Ɛ̃, enye Mawu si biaa ɖokuitsɔtsɔna blibo.*+ 15  Mègabla nu kple anyigba la dzi nɔlawo o, elabena ne wole ahasi wɔm kple woƒe mawuwo hele vɔ sam na woƒe mawuwo la,+ woakpe wò, eye nàva ɖu woƒe vɔsanu la ƒe ɖe.+ 16  Ekema àva ɖe wo vinyɔnuwo na viwòŋutsuwo,+ eye wo vinyɔnuawo awɔ ahasi kple woƒe mawuwo ahana viwòŋutsuwo hã nava wɔ ahasi kple woƒe mawuawo.+ 17  “Mègalólo ga tsɔ wɔ legba o.+ 18  “Nɔ Amɔwɔ Maʋamaʋã Bolo Ŋkekenyui+ la ɖum. Ŋkeke adre nàɖu amɔwɔ maʋamaʋã bolo la le ɣeyiɣi si woɖo la dzi le ɣleti si nye Abib*+ me, abe ale si tututu mede se na wòe ene, elabena ɣleti si nye Abib mee nèʋu dzo le Egipte. 19  “Viŋutsu sia viŋutsu si ʋu dɔ nu la, tɔnyee,+ eye nyi kple alẽ ƒe vi gbãtɔ siwo nye atsu le wò lãha la katã me la, tɔnyee.+ 20  Tsɔ alẽ ɖɔli tedzi ƒe ŋgɔgbevi. Ke ne màɖɔlii o la, ekema nàŋe kɔ le enu. Gake ele be nàxe fe ɖe wò ŋgɔgbeviŋutsuwo katã ya ta.+ Mia dometɔ aɖeke nagava ŋkunyeme asi gbɔlo o. 21  “Ŋkeke ade nàwɔ dɔ, ke le ŋkeke adrelia dzi la, nàdzudzɔ.+ Eɖanye agbleŋlɔɣi alo nuŋeɣi o, ele be nàɖi ɖe eme. 22  “Ðu Kwasiɖawo Ƒe Ŋkekenyui la eye nàtsɔ luŋeŋe gbãtɔwo vɛ le eɖuɣi, eye nàɖu Nukuƒoƒoƒu Ŋkekenyui* la hã le ƒea ƒe nuwuwu lɔƒo.+ 23  “Wò ŋutsuwo katã nava Aƒetɔ vavã Yehowa, Israel ƒe Mawu la, ŋkume zi etɔ̃ le ƒea me.+ 24  Elabena manya dukɔwo ɖa le ŋgɔwò,+ eye makeke wò liƒowo ɖe enu, ne èyi be yeado ɖe Yehowa wò Mawu ŋkume zi etɔ̃ le ƒea me la, wò anyigba mabiã ŋu na ame aɖeke o. 25  “Mègatsɔ nu ʋaʋã aɖeke kpe ɖe nye vɔsalã ƒe ʋu ŋu atsɔ asa vɔe o.+ Eye Ŋutitotoŋkekenyui ƒe vɔsalã la megatsi anyi ŋu nake ɖe edzi o.+ 26  “Tsɔ wò anyigbadzikutsetse gbãtɔwo ƒe nyuitɔwo va Yehowa wò Mawu ƒe aƒe me.+ “Mègaɖa gbɔ̃vi le dadaa ƒe notsi me o.”+ 27  Yehowa gagblɔ na Mose be: “Ŋlɔ nya siawo ɖi,+ elabena nya siawo dzie nu, si blam mele kpli wò kpakple Israel la, nɔ te ɖo.”+ 28  Eye wònɔ Yehowa gbɔ le afi ma ŋkeke blaene kple zã blaene sɔŋ. Meɖu nu o, eye meno tsi hã o.+ Eye wòŋlɔ nubabla la me nyawo, siwo nye Se Ewoawo,* ɖe kpe gbadzɛawo dzi.+ 29  Azɔ Mose ɖi tso Sinai Toa dzi, eye wòlé Ðaseɖiɖikpe gbadzɛ eveawo ɖe asi.+ Ke esi Mose ɖi tso toa dzi la, menya be esi yeƒo nu kple Mawu ta la, yeƒe mo nɔ keklẽm o. 30  Esi Aron kple Israel-viwo katã kpɔ Mose la, wokpɔ be eƒe mo nɔ keklẽm, eye wonɔ vɔvɔ̃m be yewoate ɖe eŋu.+ 31  Mose yɔ wo, eye Aron kple ha la ƒe tatɔwo katã trɔ va egbɔ, eye Mose ƒo nu kpli wo. 32  Ema megbe la, Israel-viwo katã te ɖe eŋu, eye wògblɔ se siwo katã Yehowa de le Sinai Toa dzi la na wo.+ 33  Ne Mose ƒo nu kpli wo vɔ la, etsɔa motsyɔnu tsyɔa mo.+ 34  Gake ne Mose yina Yehowa ŋkume be yeaƒo nu kplii la, eɖea motsyɔnu la ɖa, va se ɖe esime wògado go.+ Eye wòva gblɔa se si wode nɛ la na Israel-viwo.+ 35  Israel-viwo kpɔnɛ be Mose ƒe mo nɔa keklẽm; eye Mose gbugbɔa motsyɔnu la tsyɔa mo, va se ɖe esime wògage ɖe eme be yeaƒo nu kple Mawu.+

Etenuŋɔŋlɔ

Alo, “ameŋubula.”
Egɔmeɖeɖe tẽe, “kɔlialiatɔwo.”
Egɔmeɖeɖe tẽe, “Yehowa, eƒe ŋkɔ.”
Alo, “di be woasubɔ ye ɖeka ko.”
Wogayɔnɛ be Agbadɔŋkekenyui (Avɔgbadɔwo).
Egɔmeɖeɖe tẽe, “Nya Ewoawo.”