Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

2 Mose 30:1-38

EMENYAWO ƑE TOTOƉEME

  • Dzudzɔdovɔsamlekpui la (1-10)

  • Israel-viwo xexlẽ kple ga si woatsɔ alé avu ɖe wo ta (11-16)

  • Akɔblize hena asi kple afɔ kɔklɔ (17-21)

  • Ami kɔkɔe la wɔwɔ (22-33)

  • Dzudzɔdonu ʋeʋĩ kɔkɔe la wɔwɔ (34-38)

30  “Tsɔ akasiati+ wɔ vɔsamlekpui si dzi woado dzudzɔ ʋeʋĩ ɖo.+  Nenɔ dzogoe ene me, wòadidi abɔklugui* ɖeka, wòakeke abɔklugui ɖeka, eye wòakɔ abɔklugui eve. Eye vɔsamlekpuia kple eƒe dzowo nanye nu blibo ɖeka.+  Fa sika nyuitɔ ɖe eŋu: ɖe etame kple eƒe axawo dzi godoo va kpe, eye nàfae ɖe eƒe dzowo hã ŋu; eye nàtsɔ sika aɖo to nɛ kpe ɖo.  Tsɔ sika wɔ asigɛ eve ɖe to la te le eƒe axawo kple eve dzi, ale be woaƒo kpowo ɖe wo me atsɔ akɔe.  Tsɔ akasiati kpa kpoawo eye nàfa sika ɖe wo ŋu.  Eye nàtsɔe ada ɖe xɔmetsovɔ si le Ðaseɖiɖiɖakaa+ gbɔ la ŋgɔ, le Ðaseɖinu la ƒe nutunu la ŋgɔ, afi si maɖe ɖokuinye afia wò le.+  “Aron+ natsɔ atike ʋeʋĩ ado dzudzɔ+ le edzi+ ŋdi sia ŋdi ne ele akaɖigbɛawo gbɔ kpɔm.+  Azɔ hã, Aron nado dzudzɔ le edzi ne wòva be yeasi akaɖigbɛawo le anyinutsyɔɣi.* Esia anye dzudzɔ ʋeʋĩ si woado ɖaa le Yehowa ŋkume le miaƒe dzidzimewo katã me.  Migado dzudzɔ ʋeʋĩ bubu+ aɖeke si ŋu womeɖe mɔ ɖo o la le edzi loo alo asa numevɔ alo nuɖuvɔ le edzi o, eye migakɔ nunovɔsa aɖeke hã ɖe edzi o. 10  Aron natsɔ nuvɔ̃vɔsalã si wotsɔ lé avu+ la ƒe ʋu asisi ɖe vɔsamlekpuia ƒe dzowo ŋu atsɔ alé avu ɖe eta zi ɖeka le ƒe me.+ Woawɔ esia le miaƒe dzidzimewo katã me elabena nu kɔkɔewo ƒe nu kɔkɔe wònye na Yehowa.” 11  Eye Yehowa gagblɔ na Mose be: 12  “Ɣesiaɣi si nàxlẽ Israel-viwo+ be yeanya woƒe xexlẽme la, ele be wo dometɔ ɖe sia ɖe naxe fe ɖe eƒe agbe* ta na Yehowa ne wole wo xlẽm, ale be dɔvɔ̃ aɖeke nagaɖo wo dome ne wole wo xlẽm o. 13  Nu si ame siwo katã woxlẽ la anae nye esi: sekel* afã, le teƒe kɔkɔe+ la ƒe sekel la nu. Gera* blaeve le sekel ɖeka. Sekel afãe woadzɔ na Yehowa.+ 14  Ame siwo katã xɔ ƒe blaeve kple edzivɔ, siwo ƒe ŋkɔ woaŋlɔ la, adzɔ nu na Yehowa.+ 15  Kesinɔtɔ megana wu o, eye ame dahe hã megana wòanɔ ʋɛe wu sekel* afã la o; woadzɔe na Yehowa be woalé avu ɖe miaƒe agbewo* ta. 16  Xɔ ga si Israel-viwo atsɔ alé avu la le wo si nàtsɔ ana be woatsɔ akpɔ takpegbadɔ la ƒe subɔsubɔdɔwo gbɔ, ne wòanye ŋkuɖodzi le Yehowa ŋkume na Israel-viwo, be woalé avu ɖe miaƒe agbewo* ta.” 17  Yehowa gagblɔ na Mose be: 18  “Tsɔ akɔbli wɔ ze kple eƒe zɔ;+ eye nàtsɔe ada ɖe takpegbadɔ la kple vɔsamlekpui la dome ahakɔ tsi ɖe eme+ na asi kple afɔ kɔklɔ. 19  Afi mae Aron kple viaŋutsuwo aklɔ woƒe asi kple afɔ le.+ 20  Hafi woayi takpegbadɔa me alo ate ɖe vɔsamlekpuia ŋu awɔ subɔsubɔdɔ alo asa dzovɔ loo alo ado dzudzɔ na Yehowa la, ele be woaklɔ asi kple afɔ, be woagaku o. 21  Woakpɔ egbɔ be yewoklɔ asi kple afɔ, be woagaku o. Esia anye ɖoɖo na eya ŋutɔ kple eƒe dzidzimeviwo tegbee.”+ 22  Yehowa gagblɔ na Mose be: 23  “Tsɔ atike ʋeʋĩ nyuitɔwo: mire babla dzidze alafa atɔ̃, sinamɔn ʋeʋĩ dzidze alafa eve kple blaatɔ̃, si nye ekemɛa ƒe afã, gbekee ʋeʋĩ dzidze alafa eve blaatɔ̃, 24  kasia dzidze alafa atɔ̃, le teƒe kɔkɔe la ƒe sekel* la nu,+ kple amititsetse ƒe ami hin* ɖeka. 25  Tsɔ wo wɔ ameɖomi kɔkɔe; woatsaka wo nyuie.+ Ameɖomi kɔkɔe wòanye. 26  “Eye nàsi ami na takpegbadɔ+ la kple Ðaseɖiɖiɖaka la, 27  kplɔ̃ la kple eŋu nuwo katã, akaɖiti la kple eŋu nuwo, dzudzɔdomlekpui la, 28  numevɔsamlekpui la kple eŋu nuwo katã, kpakple ze la kple eƒe zɔ. 29  Eye nàkɔ wo ŋu, ne woazu nu kɔkɔewo ƒe nu kɔkɔe.+ Ame sia ame si aka asi wo ŋu la nanɔ kɔkɔe.+ 30  Eye nàsi ami na Aron+ kple viaŋutsuwo+ ahakɔ wo ŋu be woazu nunɔlawo asubɔm.+ 31  “Gblɔ na Israel-viwo be: ‘Ameɖomi kɔkɔe wòanye le ŋkunyeme le miaƒe dzidzimewo katã me.+ 32  Ame aɖeke megasii ɖe ŋuti o, eye migawɔ etɔgbi aɖeke hã o. Nu kɔkɔe wònye. Nenye nu kɔkɔe na mi ɖaa. 33  Ame sia ame si awɔ ami ʋeʋĩ sia tɔgbi, eye wòasii na ame tutɔ aɖe la, woatsrɔ̃e ɖa le eƒe dukɔ la dome.’”+ 34  Eye Yehowa gagblɔ na Mose be: “Tsɔ atike ʋeʋĩ+ siwo nye nataf, onitsa, galbano ʋeʋĩ kple lifi nyuitɔ; wo katã ƒe dzidzeme nasɔ. 35  Eye nàtsaka wo nyuie,* ade dze eme,+ atsɔ wo awɔ dzudzɔdonu ʋeʋĩ,+ wòadza eye wòanɔ kɔkɔe. 36  Eyome nàto eƒe ɖe memie, eye nàtsɔ ɖe ada ɖe Ðaseɖinu la ŋgɔ le takpegbadɔa me, afi si maɖe ɖokuinye afia wò le. Nu kɔkɔewo ƒe nu kɔkɔe wòanye na mi. 37  Migawɔ dzudzɔdonu ʋeʋĩ sia tɔgbi na mia ɖokui o.+ Mibui nu kɔkɔe na Yehowa ɣeawokatãɣi. 38  Ame sia ame si awɔ etɔgbi be wòaʋẽ ɖe ye lilili la, woatsrɔ̃e ɖa le eƒe dukɔ la dome.”

Etenuŋɔŋlɔ

Abɔklugui ɖeka le sentimeta 44.5. Kpɔ Megbenyawo B14.
Egɔmeɖeɖe tẽe, “le fiẽ eveawo dome.”
Alo, “luʋɔ.”
Sekel ɖeka le gram 11.4. Kpɔ Megbenyawo B14.
Gera ɖeka le gram 0.57. Kpɔ Megbenyawo B14.
Sekel ɖeka le gram 11.4. Kpɔ Megbenyawo B14.
Alo, “luʋɔwo.”
Alo, “luʋɔwo.”
Alo, “sekel kɔkɔe.”
Hin ɖeka le lita 3.67. Kpɔ Megbenyawo B14.
Alo, “abe ale si atike ʋeʋĩ wɔla wɔnɛ ene.”