Dzo kpo yi emenuwo dzi

Dzo kpo yi emenuawo dzi

2 Mose 20:1-26

EMENYAWO ƑE TOTOƉEME

  • Se Ewoawo (1-17)

  • Nukpɔkpɔ aɖe na dukɔ la dzo nyanyanya (18-21)

  • Subɔsubɔ ŋuti mɔfiamewo (22-26)

20  Eye Mawu gblɔ nya siawo katã be:+  “Nyee nye Yehowa wò Mawu, ame si kplɔ wò tso Egipte-nyigba dzi, afi si nye kluviƒe me.+  Mawu bubu aɖeke meganɔ asiwò kpe ɖe ŋunye o.+  “Mègawɔ legba alo nu siwo le dziƒo, alo anyigba dzi, alo nu siwo le tsi me le anyigba dzi la ƒe nɔnɔme na ɖokuiwò o.+  Mègade ta agu na wo o, eye mègasubɔ wo o,+ elabena nye Yehowa wò Mawu la, Mawu si biaa ɖokuitsɔtsɔna blibo+ ye menye, eye mehea fofo siwo léa fum la ƒe vodada ŋuti tohehe vaa viwo dzi, vaa dzidzime etɔ̃lia kple enelia dzi,  ke mevea ame siwo lɔ̃am heléa nye sededewo me ɖe asi la ƒe dzidzime akpe nanewo nu.+  “Mègayɔ Yehowa wò Mawu la ŋkɔ dzodzro o,+ elabena Yehowa magbe tohehe na ame si yɔa eŋkɔ dzodzro la o.*+  “Ðo ŋku Sabat ŋkeke la dzi, ne nàwɔe kɔkɔe.+  Ŋkeke ade nàwɔ dɔ, eye nàwɔ wò dɔwo katã,+ 10  ke ŋkeke adrelia nye sabat na Yehowa wò Mawu. Mègawɔ dɔ aɖeke o, eɖanye wò ŋutɔ alo viwòŋutsu alo viwònyɔnu, wò kluvi alo wò kosi alo wò lã alo wò amedzro si le mia nɔƒewo*+ o. 11  Elabena ŋkeke ade mee Yehowa wɔ dziƒowo kple anyigba, atsiaƒu kple wo me nuwo katã, eye wòte ɖiɖi ɖe eme le ŋkeke adrelia dzi.+ Esia tae Yehowa yra Sabat ŋkeke la, eye wòwɔe kɔkɔe ɖo. 12  “Bu fofowò kple dawò,+ be nànɔ agbe didi le anyigba si Yehowa wò Mawu le na wò ge la dzi.+ 13  “Mègawu ame o.+ 14  “Mègawɔ ahasi o.+ 15  “Mègafi fi o.+ 16  “Mègaɖi aʋatsoɖase ɖe hawòvi ŋu o.+ 17  “Mègabiã ŋu hawòvi ƒe aƒe o. Mègabiã ŋu hawòvi srɔ̃,+ eƒe kluvi alo eƒe kosi, eƒe nyi, eƒe tedzi alo nu siwo katã nye hawòvi tɔ la o.”+ 18  Dukɔ blibo la katã le dzikedzoa kple to la ƒe dzudzɔtutu kpɔm, wole dziɖegbea kple kpẽa ƒe ɖiɖi sem; eye wonɔ dzodzom nyanyanya hetɔ ɖe adzɔge.+ 19  Eye wogblɔ na Mose be: “Wò boŋ ƒo nu kpli mí, eye míaɖo to asee, gake mègana Mawu naƒo nu kpli mí o, be míagaku o.”+ 20  Eya ta Mose gblɔ na dukɔ la be: “Migavɔ̃ o, elabena ɖe Mawu vavã la va mia do ge kpɔ,+ ale be miavɔ̃e ne miagawɔ nu vɔ̃ o.”+ 21  Dukɔ la kpɔtɔ le tsitre ɖe adzɔge, ke Mose te ɖe alilikpo dodo si me Mawu vavã la le ŋu.+ 22  Eye Yehowa gblɔ na Mose be: “Ale nàgblɔ na Israel-viwoe nye esi: ‘Miawo ŋutɔwo miekpɔe be dziƒoe meƒo nu kpli mi tsoe.+ 23  Migawɔ klosalomawuwo kpe ɖe ŋunye o, eye migawɔ sikamawuwo na mia ɖokuiwo o.+ 24  Tsɔ anyi ɖi vɔsamlekpui nam, eya dzi nàsa wò numevɔwo kple wò ŋutifafavɔwo le, eye nàlé lã le wò alẽhawo kple wò nyihawo dome asa vɔ le edzi. Eye le teƒe sia teƒe si mana woaɖo ŋku nye ŋkɔ dzi le la,+ mava gbɔwò eye mayra wò. 25  Eye ne èbe yeatsɔ kpe aɖi vɔsamlekpui nam la, mègatsɔ kpe si wotsɔ dɔwɔnu aɖe kpa la* aɖii o.+ Ne ètsɔ pɛ fui la, ekema ègblẽ kɔ ɖo nɛ. 26  Eye mègaflɔ atrakpui ayi nye vɔsamlekpui la dzi o, ne wò ama nagadze le edzi o.’

Etenuŋɔŋlɔ

Alo, “Mègana Yehowa wò Mawu la ƒe ŋkɔ nanɔ ŋuwò dzodzro o, elabena Yehowa magbe tohehe na ame si ŋu eƒe ŋkɔ la le dzodzro o.”
Egɔmeɖeɖe tẽe, “míaƒe agbowo nu.”
Alo, “kpe fufu.”