2 Mose 19:1-25

  • Le Sinai To la gbɔ (1-25)

    • Israel-viwo nazu nunɔlawo ƒe fiaɖuƒe (5, 6)

    • Dukɔ la kɔ wo ɖokui ŋu be yewoakpe kple Mawu (14, 15)

19  Le Israel-viwo ƒe ʋuʋu tso Egipte-nyigba dzi ƒe ɣleti etɔ̃lia megbe, le ŋkeke ma dzi tututu, wova ɖo Sinai gbedzi.  Woho tso Refidim+ va Sinai gbedzi heƒu asaɖa anyi ɖe gbea dzi. Israel ƒu asaɖa anyi ɖe afi ma le to la ŋgɔ.+  Eye Mose lia to la yi Mawu vavã la gbɔ, eye Yehowa yɔe tso to la dzi+ gblɔ be: “Ale nàgblɔ na Yakob ƒe aƒe la, si nye Israel-viwoe nye esi:  ‘Miawo ŋutɔwo miekpɔ nu si mewɔ Egiptetɔwo+ ne matsɔ mi ɖe hɔ̃ ƒe aʋalawo dzi ava ɖokuinye gbɔe.+  Azɔ ne mieɖo to nye gbe pɛpɛpɛ, eye mielé nye nubabla la me ɖe asi la, miazu nye nunɔamesi tɔxɛ* le dukɔ bubuwo katã dome,+ elabena anyigba bliboa katã tɔnyee.+  Miazu nunɔlawo ƒe fiaɖuƒe kple dukɔ kɔkɔe nam.’+ Nya siawoe nàgblɔ na Israel-viwo.”  Eya ta Mose yi ɖayɔ dukɔ la ƒe ametsitsiwo hegblɔ nya siwo katã Yehowa gblɔ nɛ la na wo.+  Emegbe dukɔ blibo la ɖo eŋu kple nu sɔsɔe be: “Nya siwo katã Yehowa gblɔ la, míawɔ wo dzi.”+ Enumake Mose trɔ yi ɖagblɔ dukɔ la ƒe nyawo na Yehowa.  Eye Yehowa gblɔ na Mose be: “Kpɔ ɖa, megbɔna gbɔwò le alilikpo dodo me, ale be ne mele nu ƒom kpli wò la, dukɔ la nasee, ne woaxɔ wò hã dziwò ase ɣesiaɣi.” Eye Mose gblɔ dukɔ la ƒe nyawo na Yehowa. 10  Eye Yehowa gblɔ na Mose be: “Yi dukɔ la gbɔ, eye nàkɔ wo ŋu egbe kple etsɔ, eye woanya woƒe awuwo. 11  Woanɔ klalo le ŋkeke etɔ̃a gbe, elabena Yehowa aɖi va Sinai To la dzi le ŋkeke etɔ̃a gbe le dukɔ blibo la katã ŋkume. 12  Ðo liƒo ɖe to la ŋu godoo va kpe na dukɔ la, eye nàgblɔ na wo be, ‘Mikpɔ nyuie be miagalia to la, alo agogoe aka asi eŋu o. Ame si ka asi toa ŋu la, ku kee wòaku. 13  Ame aɖeke maka asi ame ma ŋu o, ke boŋ woaƒu kpee alo woaƒo nu ɖee.* Eɖanye amegbetɔ alo lã o, mele be woanɔ agbe o.’+ Gake ne wose kpẽ+ ƒe ɖiɖi ko hafi woate ŋu ava to la gbɔ.” 14  Eye Mose ɖi tso toa dzi va dukɔa gbɔ hekɔ wo ŋu, eye wonya woƒe awuwo.+ 15  Eye wògblɔ na dukɔ la be: “Minɔ klalo le ŋkeke etɔ̃a gbe. Migadɔ nyɔnu gbɔ o.”* 16  Le ŋkeke etɔ̃a gbe ƒe ŋdi la, dzi le gbe ɖem hele dzo kem, alilikpo+ dodo aɖe va tsyɔ to la tame, eye kpẽ aɖe le ɖiɖim sesĩe, ale be dukɔ blibo si le asaɖaa me la le dzodzom nyanyanya.+ 17  Eye Mose kplɔ dukɔ la do goe le asaɖa la me be woaɖado go Mawu vavã la, eye wotɔ ɖe to la gɔme. 18  Eye Sinai To blibo la katã le dzudzɔ tum, elabena Yehowa ɖi va edzi le dzo me;+ eye eƒe dzudzɔ le dzi dem abe dzokpomedzudzɔ babla ene, eye to blibo la katã le ʋuʋum kpekpekpe.+ 19  Esi kpẽa ƒe ɖiɖi nu le sesẽm ɖe edzi la, Mose ƒo nu, eye Mawu vavã la ɖo eŋu kple gbe sesẽ aɖe. 20  Ale Yehowa ɖi va Sinai To la dzi. Eye Yehowa yɔ Mose be wòava toa tame, eye Mose liae yi.+ 21  Eye Yehowa gblɔ na Mose be: “Ði yi ɖaxlɔ̃ nu dukɔ la, be woagate kpɔ be yewoava kpɔ Yehowa o. Ne menye nenema o la, wo dometɔ geɖe aku. 22  Eye na nunɔlawo, ame siwo tena vaa Yehowa gbɔ edziedzi la, nakɔ wo ɖokuiwo ŋu, ale be Yehowa nagahe to na wo o.”*+ 23  Eye Mose gblɔ na Yehowa be: “Dukɔ la mate ŋu alia Sinai To la o, elabena wò ŋutɔ èxlɔ̃ nu mí esi nègblɔ nam be: ‘Ðo liƒo ɖe to la ŋu, eye nàwɔe kɔkɔe.’”+ 24  Gake Yehowa gblɔ nɛ be: “Ði yi, eye wò kple Aron miatrɔ va, ke nunɔlawo kple dukɔa ya megagbɔ liƒo la ŋu be yewoalia toa ava Yehowa gbɔ o, be magatu nu kpli wo o.”+ 25  Ale Mose ɖi yi dukɔ la gbɔ hegblɔe na wo.

Etenuŋɔŋlɔ

Alo, “nunɔamesi vevi.”
Ðewohĩ woatée kple da.
Egɔmeɖeɖe tẽe, “Migate ɖe nyɔnu ŋu o.”
Egɔmeɖeɖe tẽe, “ƒe dziku nagafla ɖe wo ŋu o.”