Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

2 Mose 14:1-31

EMENYAWO ƑE TOTOƉEME

  • Israel-viwo ɖo atsiaƒu la gbɔ (1-4)

  • Farao ti Israel-viwo yome (5-14)

  • Israel-viwo tso Ƒudzĩ la (15-25)

  • Ƒu la nyè tsyɔ Egiptetɔwo dzi (26-28)

  • Israel-viwo xɔ Yehowa dzi se (29-31)

14  Eye Yehowa gblɔ na Mose be:  “Gblɔ na Israel-viwo be woatrɔ ava ƒu asaɖa anyi ɖe Pihahirot ŋgɔ le Migdol kple atsiaƒu la dome, adze ŋgɔ Baal-Zefon. Miƒu asaɖa anyi ɖe atsiaƒu la nu eye miadze ŋgɔ Baal-Zefon.+  Ekema Farao agblɔ le Israel-viwo ŋu be: ‘Wotɔtɔ hele tsaglãla tsam le anyigba la dzi. Gbea dzi xaxa wo ɖo.’  Maɖe mɔ Farao ƒe dzi me nasẽ+ wòati wo yome, eye mato Farao kple eƒe aʋakɔwo katã dzi akɔ ɖokuinye ŋu;+ ne Egiptetɔwo nadze sii be nyee nye Yehowa.”+ Eye Israel-viwo wɔ nenema.  Eye wova gblɔ na Egipte-fia la be dukɔ la si dzo. Enumake Farao kple eƒe subɔviwo trɔ tame le dukɔ la ŋuti,+ eye wogblɔ be: “Nu kae nye esi míewɔ be míeɖe asi le Israel-viwo ŋu wodzo be woagasubɔ mí abe kluviwo ene azɔ o?”  Ale wòna wodzra eƒe aʋatasiaɖamwo ɖo, eye wòkplɔ eƒe aʋawɔlawo kpe ɖe eɖokui ŋu.+  Eye wòtsɔ tasiaɖam tɔxɛ alafa ade hekpe ɖe Egipte ƒe tasiaɖam bubuawo katã ŋu, eye aʋawɔlawo le wo dometɔ ɖe sia ɖe me.  Ale Yehowa ɖe mɔ Egipte-fia Farao ƒe dzi me sẽ, eye wòti Israel-viwo yome, esime Israel-viwo nɔ azɔli dzi le dziɖeɖi me.*+  Egiptetɔwo ti wo yome,+ eye Farao kple eƒe sɔdolawo kpakple eƒe aʋakɔwo ƒe tasiaɖamwo le wo gogom esime woƒu asaɖa anyi ɖe atsiaƒu la nu, le Pihahirot gbɔ le Baal-Zefon ŋgɔ. 10  Esi Farao gogo wo, eye Israel-viwo fɔ kɔ dzi kpɔ Egiptetɔwo le wo yome gbɔna la, dzidzi ƒo Israel-viwo, eye wodo ɣli yɔ Yehowa.+ 11  Eye wobia Mose be: “Esi ameɖiƒe aɖeke mele Egipte o tae nèkplɔ mí va afi sia be míaku ɖe gbe sia dzia?+ Nu kae nye esi nèwɔ ɖe mía ŋu be nèkplɔ mí tso Egipte? 12  Alo menye nya sia koe míegblɔ na wò le Egipte be, ‘Ðe asi le mía ŋu kpoo ne míasubɔ Egiptetɔwo’ oa? Elabena enyo na mí be míasubɔ Egiptetɔwo wu be míaku ɖe gbedzi.”+ 13  Eye Mose gblɔ na dukɔ la bena: “Migavɔ̃ o.+ Minɔ te sesĩe, eye miakpɔ ale si Yehowa le xɔxɔ ge na mi egbe.+ Elabena Egiptetɔ siwo kpɔm miele egbea la, miegale wo kpɔ ge akpɔ gbeɖegbeɖe o.+ 14  Yehowa ŋutɔ awɔ aʋa na mi,+ ke miawo la miatɔ ɖi kpoo.” 15  Eye Yehowa gblɔ na Mose be: “Nu ka ŋuti nèle ɣli dom nam? Gblɔ na Israel-viwo be woaho. 16  Ke wò la, tsɔ wò atikplɔ la, eye nàdo wò asi ɖe atsiaƒu la dzi ne wòama ɖe eve, ale be Israel-viwo nazɔ to ƒuƒuiƒe le atsiaƒu la me. 17  Nyee ɖe mɔ Egiptetɔwo ƒe dzi me sẽ, ne woadze wo yome age ɖe eme, ale be mato Farao kple eƒe aʋakɔwo katã, eƒe aʋatasiaɖamwo kple eƒe sɔdolawo dzi, akɔ ɖokuinye ŋu.+ 18  Eye Egiptetɔwo adze sii be nyee nye Yehowa ne meto Farao, eƒe aʋatasiaɖamwo kple eƒe sɔdolawo dzi kɔ ɖokuinye ŋu.”+ 19  Eye Mawu vavã la ƒe dɔla+ si le Israel-viwo ŋgɔ la dzo yi wo megbe, eye alilikpo dodo* si le wo ŋgɔ la dzo yi wo megbe.+ 20  Eye wòva le Egiptetɔwo ƒe aʋakɔwo kple Israel-viwo dome.+ Eye alilikpo la na viviti do ɖe akpa ɖeka. Ke le akpa kemɛ la, ena zã la me kɔ.+ Eye wo dometɔ aɖeke mete ɖe nɔvia ŋu zã blibo la katã o. 21  Azɔ Mose do eƒe asi ɖe atsiaƒu la dzi;+ ale Yehowa na ɣedzeƒeya sesẽ ƒo zã blibo la katã hetutu atsiaƒu la ɖe megbe, eye wòna atsiaƒu la gɔme zu ƒuƒuiƒe,+ eye tsi la me ma ɖe akpa eve.+ 22  Eye Israel-viwo zɔ to ƒuƒuiƒe le atsiaƒu la me,+ esime tsia zu abe gli ene le woƒe ɖusime kple miame.+ 23  Egiptetɔwo ti wo yome, eye Farao ƒe sɔwo, eƒe aʋatasiaɖamwo kple eƒe sɔdolawo katã dze wo yome ge ɖe atsiaƒu la me.+ 24  Eye le ŋdiŋudzɔɣi* la, Yehowa le dzobibi kple alilikpo dodo la me kpɔ Egiptetɔwo ƒe aʋakɔwo,+ eye wòde tɔtɔ Egiptetɔwo ƒe aʋakɔwo me. 25  Eye wòna woƒe tasiaɖamfɔtiwo gli, ale be wo kuku zu dɔ na wo, eye Egiptetɔwo gblɔ be: “Mina míasi le Israel nu, elabena Yehowa le aʋa wɔm na wo ɖe Egiptetɔwo ŋu.”+ 26  Eye Yehowa gblɔ na Mose be: “Do asi ɖe atsiaƒu la dzi, ne tsia natrɔ ava ahatsyɔ Egiptetɔwo, woƒe aʋatasiaɖamwo kple woƒe sɔdolawo dzi.” 27  Enumake Mose do asi ɖe atsiaƒu la dzi, eye esi ŋu de asi keke me la, atsiaƒu la gaɖo eƒe nɔnɔme me. Esi Egiptetɔwo le sisim le enu la, Yehowa tutu wo ƒu atsiaƒu la me.+ 28  Eye tsia nyè tsyɔ aʋatasiaɖamwo, sɔdolawo kple Farao ƒe aʋakɔ blibo, siwo ti wo yome va atsiaƒua me la dzi.+ Wo dometɔ ɖeka hɔ̃ hã metsi agbe o.+ 29  Ke Israel-viwo ya zɔ ƒuƒuiƒe to atsiaƒu la me,+ eye tsia zu abe gli ene le woƒe ɖusime kple miame.+ 30  Ale Yehowa ɖe Israel tso Egiptetɔwo si me gbe ma gbe,+ eye Israel-viwo kpɔ Egiptetɔwo ƒe kukuawo le ƒua ta. 31  Esi Israel-viwo kpɔ ŋusẽ gã si Yehowa ɖe fia ɖe Egiptetɔwo ŋu la, dukɔ la de asi Yehowa vɔvɔ̃ me, eye woxɔ Yehowa kple eƒe subɔla Mose dzi se.+

Etenuŋɔŋlɔ

Egɔmeɖeɖe tẽe, “kple alɔ si de dzi.”
Egɔmeɖeɖe tẽe, “alilikpo dodo tsrala.”
Efia, tso ga 2 va se ɖe ŋdi ga 6 lɔƒo.