Dzo kpo yi emenuwo dzi

Dzo kpo yi emenuawo dzi

2 Mose 13:1-22

EMENYAWO ƑE TOTOƉEME

  • Ŋgɔgbeviŋutsuwo kple lãwo ƒe atsu gbãtɔwo nye Yehowa tɔ (1, 2)

  • Amɔwɔ Maʋamaʋã Bolo Ŋkekenyui (3-10)

  • Woatsɔ ŋgɔgbeviŋutsuwo kple lãwo ƒe atsu gbãtɔwo ana Mawu (11-16)

  • Wokplɔ Israel-viwo ɖo ta Ƒudzĩ la gbɔ (17-20)

  • Alilikpo dodo si gaklẽna abe dzobibi ene (21, 22)

13  Eye Yehowa gagblɔ na Mose be:  “Kɔ Israel-viwo ƒe ŋgɔgbeviŋutsu ɖe sia ɖe ŋu nam. Amegbetɔwo ƒe ŋgɔgbeviŋutsuwo kple lãwo ƒe vi gbãtɔ siwo nye atsu la nye tɔnye.”+  Eye Mose gblɔ na dukɔ la be: “Miɖo ŋku gbe si gbe mieʋu dzo le Egipte,+ afi si nye kluviwo ƒe me, la dzi, elabena asi sesẽe Yehowa tsɔ kplɔ mi tso afi sia.+ Eya ta migaɖu naneke si me amɔwɔʋãnu le o.  Miele ʋuʋu ge egbe, le ɣleti si nye Abib*+ me.  Eye ne Yehowa kplɔ mi yi Kanaantɔwo, Hititɔwo, Amoritɔwo, Hivitɔwo kple Yebusitɔwo+ ƒe anyigba, si ŋu wòka atam ɖo na mia tɔgbuiwo be yeatsɔ ana mi,+ si nye anyigba si dzi notsi kple anyitsi le sisim le dzi la,+ ekema miaɖu azã sia le ɣleti sia me.  Ŋkeke adre sɔŋ miaɖu amɔwɔ maʋamaʋã bolo,+ eye ŋkeke adrelia nanye ŋkekenyui na Yehowa.  Amɔwɔ maʋamaʋã bolo nàɖu ŋkeke adreawo;+ womakpɔ nu ʋaʋã aɖeke le gbɔwò o,+ eye womakpɔ amɔwɔ ʋaʋã aɖeke le gbɔwò le wò anyigba* katã dzi o.  Gbe ma gbe nàgblɔ na viwò be: ‘Nu si Yehowa wɔ nam esime meʋu dzo le Egipte la tae.’+  Ŋkekenyui sia anɔ na wò abe dzesi le wò asi ŋu kple ŋkuɖodzinu le wò ŋgonu*+ ene, ne Yehowa ƒe se la nanɔ wò nu me; elabena asi sesẽ Yehowa tsɔ kplɔ wò tso Egipte. 10  Eye nànɔ ɖoɖo sia dzi wɔm le eƒe ɣeyiɣi ɖoɖi dzi ƒe sia ƒe.+ 11  “Ne Yehowa kplɔ wò yi Kanaantɔwo ƒe anyigba, si ŋu wòka atam na wò kple tɔgbuiwòwo be yeatsɔ ana mi dzi la,+ 12  ekema nàtsɔ ŋgɔgbeviŋutsu* ɖe sia ɖe kple lãwo ƒe vi gbãtɔ siwo nye atsu siwo katã ava su asiwò la ana Yehowa. Ŋgɔgbeviŋutsuwo kple lãwo ƒe ŋgɔgbevi siwo nye atsu la nye Yehowa tɔ.+ 13  Tsɔ alẽ xe fe ɖe tedzi ƒe vi gbãtɔ ɖe sia ɖe ta, eye ne màxe fe ɖe eta o la, ekema nàŋe kɔ le enu. Xe fe ɖe wò ŋgɔgbeviŋutsuwo katã ta.+ 14  “Eye ne viwò va bia wò emegbe be, ‘Nu sia gɔme ɖe?’ hã la, ekema nàɖo eŋu nɛ be: ‘Asi sesẽe Yehowa tsɔ kplɔ mí tso Egipte, afi si nye kluviwo ƒe me.+ 15  Esi Farao gbe dzimesesẽtɔe be yemaɖe asi le mía ŋu míadzo o la,+ Yehowa wu ŋgɔgbeviwo katã le Egipte-nyigba dzi, amewo ƒe ŋgɔgbeviwo kple lãwo ƒe vi gbãtɔwo siaa.+ Esia tae metsɔa lãwo ƒe vi gbãtɔ* siwo nye atsu la katã saa vɔ na Yehowa, eye mexea fe ɖe nye ŋgɔgbeviŋutsuwo katã ta ɖo.’ 16  Esia nanɔ abe dzesi le wò asi ŋu kple ŋgoblanu le wò ŋgonu* ene,+ elabena asi sesẽe Yehowa tsɔ kplɔ mí tso Egipte.” 17  Ke esi Farao ɖe asi le dukɔ la ŋu wodzo la, Mawu mekplɔ wo to mɔ si to Filistitɔwo ƒe anyigba dzi o, evɔ wònye mɔ mae nye kpuitɔ hafi. Elabena Mawu gblɔ be: “Dukɔ la ava trɔ susu ne wokpe aʋa kpli wo, eye woatrɔ ayi Egipte.” 18  Eya ta Mawu na dukɔ la gɔdɔ̃ mɔ to Ƒudzĩ la ƒe gbedzimɔ.+ Ke Israel-viwo dzo le Egipte-nyigba dzi le ɖoɖo nu abe asrafohawo ene. 19  Azɔ hã Mose tsɔ Yosef ƒe ƒuwo ɖe asi, elabena Yosef na Israel-viwo ka atam nɛ, eye wògblɔ be: “Mawu atrɔ susu ɖe mia ŋu godoo, eye mitsɔ nye ƒuwo tso afi sia yii.”+ 20  Eye woho tso Sukot heva ƒu asaɖa anyi ɖe Etam, le gbegbe la nu. 21  Le ŋkeke me la, Yehowa nɔa wo ŋgɔ le alilikpo dodo* aɖe me hekplɔa wo le mɔa dzi,+ eye le zã me la, eklẽna na wo le dzobibi aɖe me, ale wotea ŋu zɔa mɔ le ŋkeke me kple zã me siaa.+ 22  Alilikpo dodo la medzona le dukɔ la ŋgɔ le ŋkeke me o, eye dzobibi la medzona le zã me o.+

Etenuŋɔŋlɔ

Egɔmeɖeɖe tẽe, “liƒowo.”
Egɔmeɖeɖe tẽe, “ŋugbladome.”
Egɔmeɖeɖe tẽe, “ame sia ame si ʋu dɔ nu.”
Egɔmeɖeɖe tẽe, “nu sia nu si ʋu dɔ nu.”
Egɔmeɖeɖe tẽe, “ŋugbladome.”
Egɔmeɖeɖe tẽe, “alilikpo dodo tsrala.”