Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

2 Kronika 34:1-33

EMENYAWO ƑE TOTOƉEME

  • Yuda-fia Yosiya (1, 2)

  • Yosiya ƒe ɖɔɖɔɖodɔwo (3-13)

  • Wofɔ Segbalẽ la (14-21)

  • Hulda gblɔ tsɔtsrɔ̃ ŋu nya ɖi (22-28)

  • Yosiya xlẽ Segbalẽ la na dukɔa (29-33)

34  Yosiya+ xɔ ƒe enyi esime wòzu fia, eye wòɖu fia ƒe blaetɔ̃ vɔ ɖekɛ le Yerusalem.+  Ewɔ nu si nyo le Yehowa ŋkume, eye wòto tɔgbuia David ƒe ʋe me, medze ɖe ɖusime alo miame o.  Le eƒe fiaɖuɖu ƒe ƒe enyilia me, esi wògakpɔtɔ nye ŋutsuvi dzaa ko la, ede asi tɔgbuia David ƒe Mawu la didi me;+ eye le ƒe wuievelia me la, ede asi nuxeƒewo,+ Aserawo,* legbawo kple galegbawo*+ ɖeɖe ɖa me, ne wòakɔ Yuda kple Yerusalem+ ŋu.  Wogbã Baal ƒe vɔsamlekpuiwo ƒu anyi le eŋkume, eye wòɖe dzudzɔdonu siwo le wo tame la ɖa. Emu Aserawo* hegbã legbawo kple galegbawo,* eye wòtu wo memie helɔe wu ɖe ame siwo saa vɔ na wo tsã la ƒe yɔdowo dzi.+  Etɔ dzo nunɔlawo ƒe ƒuwo ɖe woƒe vɔsamlekpuiwo dzi.+ Ale wòkɔ Yuda kple Yerusalem ŋu.  Ewɔ esia le Manase, Efrayim,+ kple Simeon ƒe duwo me va se ɖe keke Naftali ke, eye le woƒe nuto siwo zu aƒedo ƒo xlã wo me la,  emu woƒe vɔsamlekpuiwo kple Aserawo* hã ƒu anyi, eye wògbã woƒe legbawo+ hetu wo memie; egbã nu siwo katã dzi wodoa dzudzɔ ɖo la le Israel-nyigba blibo la katã dzi;+ emegbe etrɔ va Yerusalem.  Le eƒe fiaɖuɖu ƒe ƒe wuienyilia me, esi wòkɔ anyigba la kple gbedoxɔ* la ŋu vɔ la, edɔ Safan,+ Azaliya vi, kple dumegã Maaseya kpakple Yoak, Yoahaz vi, si nye nuŋlɔla, be woaɖɔ Yehowa eƒe Mawu ƒe aƒe la ɖo.+  Eye wova nunɔlagã Hilkiya gbɔ hetsɔ ga si wotsɔ va Mawu ƒe aƒe la me, si Lewi vi agbonudzɔlawo xɔ le Manase kple Efrayim kpakple Israel ƒe ame susɔeawo katã+ kple Yuda kple Benyamin kpakple Yerusalem nɔlawo si la nɛ. 10  Eye wotsɔe de asi na dɔnunɔla siwo le Yehowa ƒe aƒe la ƒe dɔwo dzi kpɔm la si. Dɔwɔla siwo nɔ dɔa wɔm le Yehowa ƒe aƒe la me hã zãe ɖe aƒe la ɖɔɖɔɖo kple edzadzraɖo ŋu. 11  Wotsɔ ga la na aɖaŋudɔwɔlawo kple xɔtulawo be woaƒle kpe fufuwo kple atiwo, ne woatsɔ alée ɖe te, eye woatsɔ xɔtutiwo aɖɔ xɔ siwo Yuda-fiawo gblẽ ɖi wògbã la ɖo.+ 12  Eye ŋutsuawo wɔ dɔa nuteƒewɔwɔtɔe.+ Woɖo Yahat kple Obadiya, siwo nye Lewi viwo, tso Merari viwo dome,+ kpakple Zakariya kple Mesulam, siwo tso Kohat viwo+ dome la wo nu be woanye dzikpɔlawo. Lewi vi siwo katã bi ɖe haƒonuwo ƒoƒo me la+ 13  nɔ agbatedɔwɔlawo* nu, eye woawoe nye ame siwo nɔ dɔ vovovoawo wɔm la ƒe dzikpɔlawo; eye Lewi viawo dometɔ aɖewo nye agbalẽŋlɔlawo, dzikpɔlawo kple agbonudzɔlawo.+ 14  Esi wonɔ ga si wotsɔ va Yehowa ƒe aƒe la me ɖem la,+ nunɔla Hilkiya fɔ Yehowa ƒe Segbalẽ+ si wòna to Mose dzi* la.+ 15  Eya ta Hilkiya gblɔ na agbalẽŋlɔla Safan be: “Mefɔ Segbalẽ la le Yehowa ƒe aƒe la me.” Eye Hilkiya tsɔ agbalẽ la na Safan. 16  Eye Safan tsɔ agbalẽ la vɛ na fia la, eye wògblɔ nɛ be: “Wò dɔlawo le nu siwo katã wode wo si la wɔm. 17  Wotrɔa ga si wokpɔ le Yehowa ƒe aƒe la me, eye wotsɔnɛ naa dɔnunɔlawo kple dɔwɔlaawo.” 18  Eye agbalẽŋlɔla Safan gagblɔ na fia la be: “Nunɔla Hilkiya tsɔ agbalẽ aɖe nam.”+ Eye Safan te emenyawo xexlẽ le fia la ŋkume.+ 19  Esi fia la se Segbalẽ la me nyawo ko la, edze eƒe awuwo.+ 20  Eye fia la de se sia na Hilkiya, Ahikam,+ Safan vi, kple Abdon, Mika vi kple agbalẽŋlɔla Safan kpakple fia ƒe dɔla Asaya be: 21  “Miyi ɖabia gbe Yehowa ɖe nye kple ame siwo susɔ ɖe Israel kple Yuda la nu le agbalẽ si ŋu woke ɖo la me nyawo ŋuti; elabena Yehowa ƒe dziku si wòhe gbɔna mía dzi la nu sẽ, le esi mía tɔgbuiwo melé Yehowa ƒe nya la me ɖe asi hewɔ ɖe nu siwo katã woŋlɔ ɖe agbalẽ sia me la dzi o ta.”+ 22  Eya ta Hilkiya kple ame siwo fia la dɔ la yi nyɔnunyagblɔɖila+ Hulda gbɔ. Hulda nye awudzikpɔla Salum, Tikva vi, Harha vi srɔ̃, eye wònɔ Yerusalem ƒe du evelia me ɣemaɣi; eye woƒo nu kplii le afi ma.+ 23  Eye wògblɔ na wo be: “Ale Yehowa, Israel ƒe Mawu la, gblɔe nye esi, ‘Migblɔ na ame si dɔ mi ɖe gbɔnye la be: 24  “Ale Yehowa gblɔe nye esi, ‘Kpɔ ɖa, mehe vɔ̃ gbɔna, ɛ̃, fiƒode siwo katã woŋlɔ ɖe agbalẽ+ si woxlẽ le Yuda-fia ŋkume la me ava teƒe sia kple emenɔlawo dzi.+ 25  Elabena wogblẽm ɖi,+ eye woyi ɖado dzudzɔ na mawu bubuwo, ne woatsɔ woƒe asinudɔwɔwɔwo katã ado dziku nam.+ Eya ta nye dɔmedzoe akɔ ɖe teƒe sia dzi, eye womatsii o.’”+ 26  Ke ale miagblɔ na Yuda-fia si dɔ mi ɖa be miabia gbe Yehowa lae nye esi, “Ale Yehowa, Israel ƒe Mawu la, gblɔe nye esi: ‘Le nya siwo nèse ŋu la,+ 27  esi mèsẽ dzi me o, ke nèbɔbɔ ɖokuiwò le Mawu ŋkume esi nèse nya siwo wògblɔ ɖe teƒe sia kple emenɔlawo ŋu, eye nèbɔbɔ ɖokuiwò le ŋkunyeme, eye nèdze wò awuwo hefa avi le ŋkunyeme ta la, nye hã mesee,+ Yehowa ye gblɔe. 28  Eya ta matsɔ wò akpe ɖe tɔgbuiwòwo ŋu,* woatsɔ wò amlɔ ɖiwòƒe le ŋutifafa me, eye wò ŋku makpɔ vɔ̃ siwo katã he ge mala ava teƒe sia kple emenɔlawo dzi la o.’”’”+ Eye wotsɔ ŋuɖoɖoa vɛ na fia la. 29  Eya ta fia la dɔ woyi ɖayɔ Yuda kple Yerusalem ƒe ametsitsiwo katã vɛ.+ 30  Emegbe fia la yi Yehowa ƒe aƒe la me, eye Yuda ŋutsuwo, Yerusalem nɔlawo, nunɔlawo kple Lewi viwo—dukɔ blibo la, ɖeviwo kple tsitsiawo siaa. Eye wòxlẽ nubabla ƒe agbalẽ si ŋu woke ɖo le Yehowa ƒe aƒea me+ la me nyawo katã wose. 31  Eye fia la tɔ ɖe enɔƒe, eye wòbla nu*+ le Yehowa ŋkume, be yeadze Yehowa yome ahalé eƒe sededewo, ŋkuɖodzinyawo kple eƒe ɖoɖowo me ɖe asi tso dzi blibo kple luʋɔ* blibo+ me ahawɔ ɖe nubabla la me nya siwo woŋlɔ ɖe agbalẽ sia me la dzi.+ 32  Azɔ hã, ena ame siwo katã le Yerusalem kple Benyamin la lɔ̃ ɖe nubabla la dzi. Eye Yerusalem nɔlawo zɔ ɖe Mawu, wo tɔgbuiwo ƒe Mawu la, ƒe nubabla la nu.+ 33  Emegbe Yosiya ɖe ŋunyɔnuwo* katã ɖa le Israel-viwo ƒe anyigbawo katã dzi,+ eye wòna ame sia ame si le Israel la subɔ Yehowa woƒe Mawu la. Le eƒe agbenɔɣi katã* la, womete ɖa le Yehowa wo tɔgbuiwo ƒe Mawu la ŋu o.

Etenuŋɔŋlɔ

Alo, “legba siwo wolólo ga kɔ̀.”
Alo, “legba siwo wolólo ga kɔ̀.”
Egɔmeɖeɖe tẽe, “aƒe.”
Alo, “agbatsɔlawo.”
Egɔmeɖeɖe tẽe, “to Mose ƒe asi dzi.”
Esia nye nya si wozãna ne wole nu ƒom tso ku ŋu.
Alo, “wògbugbɔ bla nu.”
Alo, “legbawo.”
Egɔmeɖeɖe tẽe, “Le eƒe ŋkekewo katã me.”