Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

2 Fiawo 9:1-37

EMENYAWO ƑE TOTOƉEME

  • Wosi ami na Yehu wòzu Israel-fia (1-13)

  • Yehu wu Yehoram kple Ahaziya (14-29)

  • Wowu Izebel; avuwo ɖu eƒe ŋutilã (30-37)

9  Eye nyagblɔɖila Elisa yɔ nyagblɔɖilawo ƒe viwo dometɔ ɖeka gblɔ nɛ be: “Bla ali dzi, eye nàɖe abla atsɔ amigoe sia ɖe asi ayi Ramot-Gilead.+  Ne èɖo afi ma la, di Yehu,+ Yehosafat vi, si nye Nimsi vi, le afi ma; na wòatso le nɔviawo dome, eye kplɔe yi xɔ ememetɔ la me.  Tsɔ amigoe la nàkɔ ami ɖe tame nɛ agblɔ be, ‘Ale Yehowa gblɔe nye esi: “Mesi ami na wò be nànye fia ɖe Israel dzi.”’+ Emegbe nàʋu ʋɔa asi; mègalala o.”  Eya ta nyagblɔɖilaa ƒe subɔvi la dze mɔ yi Ramot-Gilead.  Esi wòɖo la, aʋakplɔlawo ɖi anyi. Eye wògblɔ be: “Amegã, mexɔ gbedeasi aɖe vɛ na wò.” Yehu biae be: “Mía dometɔ kae?” Eɖo eŋu be: “Amegã, wòe!”  Ale Yehu tso yi aƒea me; eye subɔvi la kɔ ami la ɖe tame nɛ gblɔ be, “Ale Yehowa, Israel ƒe Mawu la, gblɔe nye esi: ‘Mesi ami na wò be nànye fia ɖe Yehowa ƒe dukɔ, Israel dzi.+  Tsrɔ̃ wò aƒetɔ Ahab ƒe aƒe la, ne mabia hlɔ̃ ɖe nye subɔla nyagblɔɖilawo kple Yehowa subɔla siwo katã Izebel+ wu la ƒe ʋu ta.  Ahab ƒe aƒe blibo la katã atsrɔ̃; eye matsrɔ̃ Ahab ƒe me ŋutsuwo* katã kple wɔnamanɔŋutɔ kpakple ame beliwo gɔ̃ hã ɖa le Israel.+  Mawɔ Ahab ƒe aƒe la abe Yeroboam,+ Nebat vi, ƒe aƒe kple Baasa,+ Ahiya vi, ƒe aƒe ene. 10  Eye avuwo aɖu Izebel keŋkeŋ le Yezreel-nyigba dzi,+ eye ame aɖeke maɖii o.’” Eye wòʋu ʋɔa hesi dzo.+ 11  Esi Yehu trɔ va eƒe aƒetɔ ƒe subɔviwo gbɔ la, wobiae be: “Eme faa? Nu ka tae aɖaʋatɔ sia va gbɔwò ɖo?” Ke egblɔ na wo be: “Miawo ŋutɔwo mienya ŋutsu sia kple nya si ƒomevi wògblɔnae.” 12  Ke wogblɔ be: “Aʋatsoe! Gblɔe na mí dzro.” Eye wògblɔ be: “Ale kple ale wògblɔ nam ye nye esi, eye wògagblɔ be, ‘Ale Yehowa gblɔe nye esi: “Mesi ami na wò be nànye fia ɖe Israel dzi.”’”+ 13  Eye wo dometɔ ɖe sia ɖe wɔ kaba ɖe eƒe awu tsɔ da ɖe ete le atrakpuiawo dzi,+ eye wode asi kpẽkuku me hele gbɔgblɔm be: “Yehu zu fia!”+ 14  Ale Yehu,+ Yehosafat ƒe vi, Nimsi vi, ɖo nugbe ɖe Yehoram ŋu. Le ɣeyiɣi ma katã me la, Yehoram kple Israel blibo la le ŋudzɔ ɖe Siria-fia Hazael+ ŋu le Ramot-Gilead.+ 15  Emegbe Fia Yehoram gbugbɔ yi Yezreel+ be woakpɔ abi si Siriatɔwo de eŋu esime wòle aʋa wɔm kple Siria-fia Hazael la gbɔ nɛ.+ Eye Yehu gblɔ be: “Ne mielɔ̃* ɖe edzi la, ekema ame aɖeke megasi tso dua me ayi aɖagblɔe le Yezreel o.” 16  Eye Yehu ge ɖe eƒe tasiaɖam me hedze mɔ yina Yezreel, elabena Yehoram xɔ abi eye wòle aba dzi le afi ma, eye Yuda-fia Ahaziya va Yehoram kpɔ ge ɖa. 17  Esi gbetakpɔla tɔ ɖe mɔ́ sesẽ la tame le Yezreel la, ekpɔ Yehu ƒe ameha si gbɔna la, enumake egblɔ be: “Mele ameha aɖe kpɔm.” Eye Yehoram gblɔ be: “Ðe sɔdola ɖeka ɖo ɖa, ne wòayi aɖado go wo abia be: ‘Ŋutifafa yea?’” 18  Eya ta sɔdola ɖeka yi ɖado goe gblɔ be: “Ale fia la gblɔe nye esi, ‘Ŋutifafa yea?’” Ke Yehu gblɔ be: “‘Ŋutifafanya’ kae tsɔ gbɔwò? Va yi megbenye!” Eye gbetakpɔla la gagblɔ be: “Ame dɔdɔ la yi ɖaɖo wo gbɔ, ke metrɔ gbɔ o.” 19  Ale wòdɔ sɔdola evelia ɖa, eye esi wòɖo wo gbɔ la, egblɔ be: “Ale fia la gblɔe nye esi, ‘Ŋutifafa yea?’” Ke Yehu gblɔ be: “‘Ŋutifafanya’ kae tsɔ gbɔwò? Va yi megbenye!” 20  Eye gbetakpɔla la gagblɔ be: “Eyi ɖaɖo wo gbɔ, ke metrɔ gbɔ o; woƒe tasiaɖamdodo ɖi Yehu, Nimsi tɔgbuiyɔvi* la tɔ, elabena edoa tasiaɖam abe aɖaʋatɔ ene.” 21  Eye Yehoram gblɔ be: “Tsi sɔ ɖe tasiaɖam ŋu nam!” Ale wotsi sɔ ɖe eƒe aʋatasiaɖam la ŋu, eye Israel-fia Yehoram kple Yuda-fia Ahaziya+ dometɔ ɖe sia ɖe le eya ŋutɔ ƒe aʋatasiaɖam me, eye wodze mɔ yina Yehu kpe ge. Wotui le Yezreeltɔ Nabot+ ƒe agble me. 22  Esi Yehoram kpɔ Yehu ko la, ebiae be: “Yehu, ŋutifafa yea?” Ke eɖo eŋu be: “Aleke ŋutifafa awɔ anɔ anyi, zi ale si dawò Izebel+ ƒe ahasiwɔwɔ kple eƒe dzosasa+ gbogboawo li?” 23  Enumake Yehoram trɔ eƒe tasiaɖam be yeasi, eye wògblɔ na Ahaziya be: “Ahaziya, etrɔ mí to eme!” 24  Ke Yehu vu eƒe da me, eye wòté megbe na Yehoram, eye aŋutrɔ la ŋɔ eƒe dzi ɖi go, ale wòmu dze eƒe tasiaɖam la me. 25  Eye Yehu gblɔ na eƒe asrafomegã Bidkar be: “Kɔe ƒu gbe ɖe Nabot Yezreeltɔ la ƒe agble me.+ Ðo ŋku edzi be: Nye kpli wòe nɔ tasiaɖam dom le fofoa Ahab yome, esime Yehowa gblɔ nya sia ɖe eŋu be:+ 26  ‘“Esi mekpɔ Nabot ƒe ʋu+ kple viawo ƒe ʋu etsɔ ta la,” Yehowa ye gblɔe, “maɖo eteƒe+ na wò le agble sia me,” Yehowa ye gblɔe.’ Eya ta kɔe ƒu gbe ɖe agble la me le Yehowa ƒe nya la nu.”+ 27  Esi Yuda-fia Ahaziya+ kpɔ nu si nɔ dzɔdzɔm la, esi to mɔ si ɖo ta abɔmexɔ la gbɔ. (Emegbe Yehu ti eyome gblɔ be: “Mida nu eya hã!” Ale woda nui le tasiaɖam la me, le todzimɔ si yi Gur, si te ɖe Yibleam+ ŋu la dzi. Gake esi yi Megido eye wòku ɖe afi ma. 28  Eye eƒe dɔlawo va kɔe ɖe tasiaɖam me yi Yerusalem, eye woɖii ɖe eƒe yɔdo me le tɔgbuiawo gbɔ le David Ƒe Du la me.+ 29  Ahab vi Yehoram ƒe ƒe wuiɖekɛlia mee Ahaziya+ zu fia ɖe Yuda dzi.) 30  Esi Yehu va Yezreel+ la, Izebel+ see. Eya ta eɖo tu ɖe ŋku hedzra eƒe taɖa ɖo nyuie, eye wòdo mo ɖa to fesre nu kpɔ anyigba. 31  Esi Yehu to agboa nu ge ɖe eme la, Izebel bia be: “Eme nyo na Zimri, eƒe aƒetɔ wula laa?”+ 32  Eye Yehu fɔ kɔ dzi kpɔ fesrea nu gblɔ be: “Ame kae le dzinye? Ame kae?”+ Enumake fiaŋume eve alo etɔ̃ do mo ɖa kpɔe le anyigba. 33  Eye wògblɔ be: “Mitu asii ƒu anyi!” Ale wotu asii ƒu anyi, eye eƒe ʋu hlẽ ɖe glia kple sɔawo ŋu, eye Yehu do eƒe sɔwo to edzi fanyae. 34  Azɔ ege ɖe eme, ɖu nu no nu, emegbe egblɔ be: “Meɖe kuku, miyi ɖakpɔ nyɔnu fiƒodeme sia gbɔ, ne miaɖii, elabena fiavinyɔnue.”+ 35  Esi woyi be yewoaɖii la, womekpɔ eƒe afi aɖeke o, negbe eƒe takoli kple afɔbayawo kpakple eƒe asibayawo ko.+ 36  Esi wotrɔ va gblɔe nɛ la, egblɔ be: “Esiae nye Yehowa ƒe nya,+ si wògblɔ ɖi to eƒe subɔla Eliya Tisbitɔ la dzi be, ‘Avuwo aɖu Izebel+ ƒe lã le Yezreel gble me. 37  Eye Izebel ƒe kukua anɔ abe aɖu ene le Yezreel gble me, ale be womate ŋu agblɔ be: “Izebel ye nye esia” o.’”

Etenuŋɔŋlɔ

Egɔmeɖeɖe tẽe, “ame siwo ɖɔa aɖuɖɔ ɖe gli ŋu.” Enye Hebrigbe me nya si wozãna tsɔ ɖia gbɔ ŋutsuwo.
Alo, “Ne miaƒe luʋɔ lɔ̃.”
Egɔmeɖeɖe tẽe, “vi.”