Dzo kpo yi emenuwo dzi

Dzo kpo yi emenuawo dzi

2 Fiawo 14:1-29

EMENYAWO ƑE TOTOƉEME

  • Yuda-fia Amaziya (1-6)

  • Wowɔ aʋa kple Edom kpakple Israel (7-14)

  • Israel-fia Yehoas ƒe ku (15, 16)

  • Amaziya ƒe ku (17-22)

  • Israel-fia Yeroboam II (23-29)

14  Le Israel-fia Yehoas,+ Yehoahaz vi, ƒe ƒe evelia me la, Yuda-fia Yehoas vi Amaziya zu fia.  Exɔ ƒe blaeve vɔ atɔ̃ esime wòzu fia, eye wòɖu fia ƒe blaeve vɔ asieke le Yerusalem. Dadaa ŋkɔe nye Yehoadin, tso Yerusalem.+  Ewɔ nu si le dzɔdzɔe le Yehowa ŋkume, negbe ɖeko mede tɔgbuia David+ tɔ nu o. Ewɔ pɛpɛpɛ abe ale si fofoa Yehoas wɔ ene.+  Gake womeɖe nuxeƒewo ɖa o,+ eye dukɔ la gasaa vɔ hedoa dzudzɔ le nuxeƒeawo kokoko.+  Esi fiaɖuƒe la nya li ke ɖe esi me ko la, ewu eƒe dɔla siwo wu fofoa fia la.+  Ke mewu amewulaawo ƒe viwo ya o, le se si Yehowa de woŋlɔ ɖe Mose ƒe Segbalẽa me la nu, be: “Womawu fofowo ɖe viwo ta o, eye womawu viwo hã ɖe fofowo ta o; ke boŋ woawu ame sia ame ɖe eya ŋutɔ ƒe nu vɔ̃ ta.”+  Ewu Edomtɔ+ akpe ewo le Dzebali+ la me, eye wòxɔ Sela le aʋa la me,+ eye wona ŋkɔe be Yokteel va se ɖe egbe sia.  Emegbe Amaziya dɔ amewo ɖo ɖe Yehoas, Yehoahaz vi, Yehu vi, si nye Israel-fia gbɔ be: “Va ne míakpe aʋa.”*+  Eye Israel-fia Yehoas ɖo du ɖe Yuda-fia Amaziya be: “Ŋuve si le Lebanon la ɖo du ɖe sederti si le Lebanon be, ‘Tsɔ viwònyɔnu na vinyeŋutsu wòaɖe.’ Ke lã wɔadã aɖe si le Lebanon la va nya avuzi le ŋuve la dzi. 10  Esi nèsi Edom ta la,+ wò dzi de asi dada me. Wò bubu nenɔ ŋuwò, gake nɔ aƒewò me* kpoo. Nu ka tae nàdɔ avu adze anyi, ahana Yuda hã nadze anyi kpli wò?” 11  Gake Amaziya+ meɖo toe o. Eya ta Israel-fia Yehoas ho yi, eye eya kple Yuda-fia Amaziya wokpe aʋa le Bet-Semes,+ si le Yuda.+ 12  Israel ɖu Yuda dzi, eye wo dometɔ ɖe sia ɖe si yi aƒe* me. 13  Israel-fia Yehoas lé Yuda-fia Amaziya, Yehoas vi, Ahaziya vi, le Bet-Semes. Emegbe wova Yerusalem, eye wògbã Yerusalem glia, tso Efrayim-gbo+ la nu va se ɖe Dzogoedzigbo+ la gbɔ, ele abɔklugui alafa ene.* 14  Eye wòlɔ sikawo katã kple klosalo kpakple nu siwo katã le Yehowa ƒe aƒe la ƒe kesinɔnudzraɖoƒe kple fia ƒe aƒe* la me hekpe ɖe ame siwo wòɖe aboyoe la ŋu. Eye wòtrɔ yi Samaria. 15  Yehoas ŋutinya susɔeawo kple nu siwo wòwɔ, eƒe kalẽwɔwɔwo kple ale si wòwɔ aʋa kple Yuda-fia Amaziya la, woŋlɔ wo ɖe Israel-fiawo ƒe ŋutinyagbalẽ me. 16  Eye wotsɔ Yehoas mlɔ tɔgbuiawo gbɔ, woɖii ɖe Israel-fiawo gbɔ le Samaria,+ eye via Yeroboam*+ zu fia ɖe eteƒe. 17  Amaziya,+ Yehoas vi, si nye Yuda-fia, nɔ agbe ƒe wuiatɔ̃ le Yehoas,+ Yehoahaz vi, si nye Israel-fia ƒe ku megbe.+ 18  Ke Amaziya ŋutinya susɔeawo la, woŋlɔ wo ɖe Yuda-fiawo ƒe ŋutinyagbalẽ me. 19  Emegbe woɖo nugbe ɖe eŋu+ le Yerusalem, eye wòsi yi Lakis, gake wodɔ amewo woyi Lakis ɖawui le afi ma. 20  Eye wokɔe ɖe sɔwo dzi va ɖi ɖe tɔgbuiawo gbɔ le Yerusalem le David Ƒe Du la me.+ 21  Eye Yuda dukɔ blibo la katã tsɔ Azariya,*+ si xɔ ƒe wuiade+ la ɖo fiae ɖe fofoa Amaziya teƒe.+ 22  Eyae gbugbɔ tso Elat+ dua, eye wògazu Yuda tɔ esi wotsɔ fia* la mlɔ tɔgbuiawo gbɔ megbe.+ 23  Le Amaziya, Yehoas vi, si nye Yuda-fia ƒe ƒe wuiatɔ̃lia me la, Israel-fia Yeroboam,+ Yehoas vi, zu fia le Samaria, eye wòɖu fia ƒe blaene vɔ ɖekɛ. 24  Ewɔ nu si nye vɔ̃ le Yehowa ŋkume. Meɖe asi le Yeroboam, Nebat vi ƒe nu vɔ̃ siwo katã wòtsɔ he Israel de nu vɔ̃ me la ŋu o.+ 25  Eyae gbugbɔ Israel ƒe liƒowo xɔ, tso Lebo-Hamat*+ va se ɖe Araba*+ ƒu la nu, le nya si Yehowa, Israel ƒe Mawu, gblɔ to eƒe subɔvi Yona,+ Amitai vi, si nye nyagblɔɖila tso Gat-Hefer+ dzi la nu. 26  Elabena Yehowa kpɔ be Israel ɖo xaxa gã aɖe me;+ ame aɖeke megali axɔ na Israel o, eɖanye wɔnamanɔŋutɔ alo ame gblɔe o. 27  Ke Yehowa do ŋugbe be yematsrɔ̃ Israel ƒe ŋkɔ ɖa le dziƒoa te o.+ Eya ta eɖe wo to Yeroboam, Yehoas vi, ƒe asi dzi.+ 28  Ke Yeroboam ŋutinya susɔeawo kple nu siwo katã wòwɔ kpakple eƒe kalẽwɔwɔwo, ale si wòwɔ aʋa kple ale si wògaxɔ Damasko+ kple Hamat+ na Yuda le Israel la, woŋlɔ wo ɖe Israel-fiawo ƒe ŋutinyagbalẽ me. 29  Eye wotsɔ Yeroboam mlɔ tɔgbuia Israel-fiawo gbɔ; eye via Zakariya+ zu fia ɖe eteƒe.

Etenuŋɔŋlɔ

Egɔmeɖeɖe tẽe, “míakpe ŋkume kple ŋkume.”
Alo, “fiasã me.”
Egɔmeɖeɖe tẽe, “agbadɔ.”
Anɔ meta 178. Kpɔ Megbenyawo B14.
Alo, “fiasã.”
Efia, Yeroboam II.
Egɔmee nye, “Yehowae Na Kpekpeɖeŋu.” Woyɔe be Uziya le 2Fi 15:13; 2Kr 26:1-23; Yes 6:1; Zak 14:5.
Efia, fofoa Amaziya.
Alo, “Hamat ƒe dodonu.”
Efia, Dzeƒu, alo Ƒukuku la.