Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

1 Yohanes 5:1-21

EMENYAWO ƑE TOTOƉEME

  • Yesu dzi xɔxɔ se ɖua xexea dzi (1-12)

    • Nu si lɔlɔ̃ na Mawu fia (3)

  • Ka ɖe gbedodoɖa ƒe ŋusẽ dzi (13-17)

  • Mikpɔ mia ɖokui dzi le xexe vɔ̃ɖi la me (18-21)

    • Xexe blibo la katã le vɔ̃ɖitɔ la ƒe ŋusẽ te (19)

5  Ame sia ame si xɔna sena be Yesue nye Kristo la, Mawu ƒe vi wònye,+ eye ame sia ame si lɔ̃a ame si na agbe la, elɔ̃a Mawu ƒe Vi la hã.  Esia me míedzea sii le be míelɔ̃a Mawu ƒe viwo,+ ne míelɔ̃a Mawu hewɔa eƒe sewo dzi.  Elabena nu si lɔlɔ̃ na Mawu fiae nye esi, be míalé eƒe seawo me ɖe asi;+ eye eƒe seawo menye agba o,+  elabena ame sia ame* si Mawu dzi la ɖua xexea dzi.+ Eye nu si míetsɔ ɖua xexea dzi dzidzedzetɔe lae nye míaƒe xɔse.+  Ame kae ate ŋu aɖu xexea dzi?+ Menye ame si xɔe se be Yesue nye Mawu ƒe Vi lae oa?+  Yesu Kristo siae nye ame si va to tsi kple ʋu me, menye to tsi ɖeɖe ko me o,+ ke boŋ to tsi kple ʋu me.+ Eye gbɔgbɔ lae le ɖase ɖim,+ elabena gbɔgbɔ lae nye nyateƒe la.  Elabena ɖaseɖila etɔ̃e li:  gbɔgbɔ la,+ tsi la,+ kple ʋu la;+ eye nu etɔ̃ siawo wɔ ɖeka.  Ne míexɔa amegbetɔwo ƒe ɖaseɖiɖi la, ekema Mawu ƒe ɖaseɖiɖi la lolo wu. Elabena Mawu ŋutɔ le ɖase ɖim le Via ŋu. 10  Ame si xɔa Mawu ƒe Vi la dzi sena la kpɔa ɖaseɖiɖi le eɖokui me. Ame si mexɔa Mawu dzi sena o la doe aʋatsokala,+ elabena mexɔ ɖase si Mawu ɖi le Via ŋu la dzi se o. 11  Eye ɖase si woɖi lae nye esi be, Mawu na agbe mavɔ mí,+ eye agbe sia le Via me.+ 12  Ame si xɔ Vi sia la, agbe sia le esi; ame si mexɔ Mawu ƒe Vi sia o la, agbe sia mele esi o.+ 13  Mele nya siawo ŋlɔm na mi, ne miadze sii be agbe mavɔ+ le mi ame siwo xɔa Mawu ƒe Vi la ƒe ŋkɔa dzi sena la si.+ 14  Eye kakaɖedzi sia le mía si le eya amea me be,+ nu sia nu si míabia wòawɔ ɖeka kple eƒe lɔlɔ̃nu la, aɖo to mí.+ 15  Eye ne míenya be eɖoa to mí le nu sia nu si biam míele me la, ekema míenya be míakpɔ nu siwo míebia la, elabena eya si mee míebia wo le.+ 16  Ne ame aɖe kpɔ nɔvia wòle nu vɔ̃ si mekplɔa ame yia ku me o wɔm la, nedo gbe ɖa ɖe eta, eye Mawu ana agbee,+ ɛ̃, ana agbe ame siwo mele nu vɔ̃ si kplɔa ame yia ku me o wɔm la. Nu vɔ̃ aɖe li si kplɔa ame yia ku me.+ Nyemegblɔ be wòaɖe kuku ɖe nu vɔ̃ ma ya ta o. 17  Nu madzɔmadzɔ ɖe sia ɖe wɔwɔ nye nu vɔ̃,+ gake nu vɔ̃ aɖe li, si mekplɔa ame yia ku me o. 18  Míenyae be ame si nye Mawu ƒe vi la metsɔa nu vɔ̃ wɔwɔ ɖoa dɔe o, ke boŋ Mawu ƒe vi* la dzɔa eŋu, eye vɔ̃ɖitɔ la mekpɔa ŋusẽ ɖe edzi o.+ 19  Míenyae be Mawu me míetso, ke xexe blibo la katã le vɔ̃ɖitɔ la ƒe ŋusẽ te.+ 20  Ke míenyae be Mawu ƒe Vi la va,+ eye wòna nugɔmesese deto mí be míadze si nyateƒetɔ la. Eye míele ɖekawɔwɔ me kple nyateƒetɔ la,+ to Via Yesu Kristo dzi. Nyateƒetɔ lae nye Mawu vavã la kple agbe mavɔ dzɔtsoƒe la.+ 21  Vinye lɔlɔ̃awo, mikpɔ mia ɖokui dzi le trɔ̃wo ŋu.+

Etenuŋɔŋlɔ

Egɔmeɖeɖe tẽe, “nu sia nu.”
Efia, Yesu Kristo.