Dzo kpo yi emenuwo dzi

Dzo kpo yi emenuawo dzi

1 Samuel 30:1-31

EMENYAWO ƑE TOTOƉEME

  • Amalektɔwo dze Ziklag dzi hetɔ dzoe (1-6)

    • David tsɔ Mawu do ŋusẽ eɖokui (6)

  • David ɖu Amalektɔwo dzi (7-31)

    • David gbugbɔ xɔ aboyomeawo (18, 19)

    • David ƒe ɖoɖo ku ɖe aboyonuawo mama ŋu (23, 24)

30  Esime David kple eƒe amewo gbɔ va Ziklag+ le ŋkeke etɔ̃a gbe la, wokpɔe be Amalektɔwo+ va dze anyiehe* gome kple Ziklag dua dzi, eye wosi Ziklag hetɔ dzoe.  Eye woɖe aboyo nyɔnuwo+ kple ame siwo katã le dua me, ɖeviwo kple tsitsiawo siaa. Womewu ame aɖeke o, ke boŋ wokplɔ wo dzoe.  Esi David kple eƒe amewo va dua me la, wokpɔ be wotɔ dzoe, eye woɖe aboyo wo srɔ̃wo kple wo viŋutsuwo kpakple wo vinyɔnuwo.  Eya ta David kple ame siwo le eŋu la fa avi kple ɣli, va se ɖe esime avia meganya le fafam na wo o.  Woɖe aboyo David srɔ̃ eve siwo nye Ahinoam si tso Yezreel, kple Abigail, si nye Karmeltɔ Nabal ƒe ahosi.+  Nya la te ɖe David dzi ŋutɔ, elabena ameawo gblɔ be yewoaƒu kpee, elabena ŋutsuawo* do dziku vevie le wo viŋutsu kple wo vinyɔnu siwo wokplɔ dzoe ta. Eya ta David tsɔ Yehowa eƒe Mawu la do ŋusẽ eɖokui.+  Eye David gblɔ na nunɔla Abiatar,+ Ahimelek vi la be: “Meɖe kuku, tsɔ kɔmewu+ la va afii nam.” Eye Abiatar tsɔ kɔmewu la vɛ na David.  Eye David bia gbe Yehowa+ be: “Mati adzoha sia yomea? Matu woa?” Eɖo eŋu nɛ be: “Ti wo yome, elabena àtu wo godoo, eye àxɔ miaƒe nu sia nu si wotsɔ dzoe la le wo si.”+  Enumake David dze mɔ kple ŋutsu alafa ade+ siwo le eŋu la, eye wova ɖo Besor-tɔʋu* la gbɔ, eye ame aɖewo tsi afi ma. 10  Eye David kple ŋutsu alafa ene la ti wo yome, ke ŋutsu alafa eve, siwo ŋu ɖeɖi te belibeli ale gbegbe be womate ŋu atso Besor-tɔʋua o la, tsi anyi.+ 11  Wova ke ɖe Egipte ŋutsu aɖe ŋu le gbe me. Eye wokplɔe va David gbɔ hena aboloe be wòaɖu, eye wona tsii be wòano. 12  Wona gbotsetsebolo kakɛ ɖeka kple waintsetse ƒuƒu bolo eve hãe. Eye wòɖui, eye ŋusẽ gaɖo eŋu,* elabena ŋkeke etɔ̃ kple zã etɔ̃e nye ema meɖu abolo alo no tsi o. 13  Eye David biae be: “Ame ka ƒe amee nènye, eye afi kae nètso?” Eɖo eŋu be: “Egiptetɔe menye, eye menye Amalektɔ aɖe ƒe kluvi, ke nye aƒetɔ gblẽm ɖi ŋkeke etɔ̃e nye esia elabena medze dɔ. 14  Míeyi ɖadze Keretitɔwo+ ƒe anyiehe* kple Yuda-nyigba kpakple Kaleb+ ƒe anyiehe* nyigbawo dzi, eye míetɔ dzo Ziklag.” 15  Eye David biae be: “Àkplɔm ayi adzoha sia gbɔa?” Eɖo eŋu be: “Tà Mawu nam be, màwum o, eye màtsɔm ade asi na nye aƒetɔ o; ekema makplɔ wò ayi adzoha sia gbɔ.” 16  Eya ta ekplɔe yi afi si wokaka ɖe anyigba la katã dzi, le nu ɖum le nu nom hele aglo tum le aboyonu gbogbo siwo katã woha tso Filistitɔwo ƒe anyigba kple Yuda-nyigba dzi la ta. 17  Eye David si wo tso fɔŋli va se ɖe fiẽ, eye wòtsrɔ̃ wo; wo dometɔ aɖeke mesi o,+ negbe ɖekakpui alafa ene siwo do kposɔ la koe si. 18  Eye David xɔ nu siwo katã Amalektɔwo ha la,+ eye David xɔ srɔ̃a eveawo hã. 19  Naneke mebu o, woxɔ ɖeviwo kple ame tsitsiwo, wo viŋutsuwo kple wo vinyɔnuwo kpakple nu sia nu,+ si woha. David xɔ nu sia nu gbɔe. 20  David kplɔ alẽhawo kple nyihawo, eye wokplɔ wo dze woawo ŋutɔwo ƒe lãhawo ŋgɔ. Eye wogblɔ be: “David ƒe aboyonue nye esia.” 21  Emegbe David va ɖo ŋutsu alafa eve, siwo ŋu ɖeɖi te belibeli ale gbegbe be womete ŋu kplɔ David ɖo o, eye wona wotsi Besor-tɔʋua+ nu la gbɔ, eye woyi ɖakpe David kple ame siwo le eŋu la. Esi David gogo ameawo la, ebia woƒe agbe ta se. 22  Ke ame vlowo kple yakame siwo le ŋutsu siwo kplɔ David ɖo yi dome la gblɔ be: “Esi womeyi kpli mí o ta la, míana aboyonu si míexɔ la ƒe ɖeke wo o, ke boŋ wo dometɔ ɖe sia ɖe nekplɔ srɔ̃a kple viawo ko ne wòadzo.” 23  Ke David gblɔ be: “Nɔvinyewo, migawɔ alea o! Yehowae tsɔ nu siawo na mí, ekpɔ mía ta, eye wòtsɔ adzoha si va dze mía dzi la de asi na mí.+ 24  Eye ame kae aɖo to mi le nya sia me? Ke ame si de aʋa la ƒe gome nasɔ kple ame si tsi agbawo gbɔ la ƒe gome.+ Ame sia ame naxɔe sɔsɔe.”+ 25  Eye tso gbe ma gbe dzi la, nya si David gblɔ la zu se kple ɖoɖo le Israel va se ɖe egbe sia. 26  Esi David va ɖo Ziklag la, eɖo aboyonu la ƒe ɖe ɖe Yuda ƒe ametsitsi siwo nye exɔlɔ̃wo hegblɔ be: “Mixɔ nunana* sia tso Yehowa ƒe futɔwo ƒe aboyonuwo me.” 27  Eɖoe ɖe ame siwo le Betel,+ ame siwo le Ramot le Negeb* kple ame siwo le Yatir,+ 28  ame siwo le Aroer, ame siwo le Sifmot kple ame siwo le Estemoa,+ 29  ame siwo le Rakal, ame siwo le Yerameltɔwo+ ƒe duwo me kple ame siwo le Kenitɔwo+ ƒe duwo me, 30  ame siwo le Horma,+ ame siwo le Borasan kple ame siwo le Atak, 31  ame siwo le Hebron+ kple teƒe siwo katã David kple eƒe amewo to.

Etenuŋɔŋlɔ

Alo, “Yuda ƒe anyiehe.”
Alo, “elabena luʋɔawo.”
Kpɔ Nya Tɔxɛwo Gɔmeɖeƒea, “Tɔʋu.”
Egɔmeɖeɖe tẽe, “eƒe gbɔgbɔ gaɖo eme.”
Alo, “Negeb.”
Alo, “Negeb.”
Egɔmeɖeɖe tẽe, “yayra.”
Alo, “anyiehe.”