Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

1 Samuel 16:1-23

EMENYAWO ƑE TOTOƉEME

  • Samuel si ami na David be wòazu fia (1-13)

    • “Yehowa ya kpɔa keke dzi me ke” (7)

  • Mawu ƒe gbɔgbɔ dzo le Saul dzi (14-17)

  • David va zu Saul ƒe saŋkuƒola (18-23)

16  Mlɔeba Yehowa gblɔ na Samuel be: “Ɣekaɣi nànɔ konyi fam le Saul+ ta ase ɖo, evɔ wònye megbee be magaɖu fia ɖe Israel dzi o?+ De ami wò lãdzo la me,+ eye nàdze mɔ. Madɔ wò ɖe Betlehemtɔ Isai+ gbɔ, elabena metia fia na ɖokuinye le viawo dome.”+  Ke Samuel gblɔ be: “Aleke mawɔ ayi? Ne Saul see la, awum.”+ Eye Yehowa gblɔ nɛ be: “Kplɔ nyivi aɖe ɖe asi, eye nàgblɔ be: ‘Vɔ sa gee meva na Yehowa.’  Eye nàkpe Isai va vɔsaƒea; ekema mana nànya nu si nàwɔ. Si ami na ame si dzi matɔ asi na wò la nam.”+  Samuel wɔ nu si Yehowa gblɔ la. Esi wòva ɖo Betlehem+ eye dumemetsitsiawo kpɔe la, woɖi vo, eya ta wobiae be: “Ŋutifafae nèhe vɛa?”  Eɖo eŋu be: “Ŋutifafae. Vɔ sa gee meva na Yehowa. Mikɔ mia ɖokuiwo ŋu, ne miava vɔsaƒea kplim.” Eye wòkɔ Isai kple viawo ŋu hekpe wo va vɔsaƒea.  Esi woge ɖe eme, eye wòkpɔ Eliab+ la, egblɔ be: “Vavãe Yehowa ƒe amesiamina lae nye esi le eŋkume.”  Ke Yehowa gblɔ na Samuel be: “Mègakpɔ eƒe dzedzeme kple eƒe atsudzɔdzɔ o,+ elabena megbee. Elabena menye ale si amegbetɔ kpɔa nue nye ale si Mawu kpɔa nui o, elabena nu si le dzedzem koe amegbetɔ kpɔna, ke Yehowa ya kpɔa keke dzi me ke.”+  Eye Isai yɔ Abinadab+ wòva to Samuel ŋkume, ke egblɔ be: “Yehowa metia eya hã o.”  Emegbe Isai na Sama+ va yi, ke egblɔ be: “Yehowa metia eya hã o.” 10  Ale Isai na viawo dometɔ adre va to Samuel ŋkume, gake Samuel gblɔ na Isai be: “Yehowa metia wo dometɔ aɖeke o.” 11  Eye Samuel bia Isai be: “Viwò ŋutsuviawo katãe nye esia?” Eɖo eŋu be: “Ekpɔtɔ ɖevitɔ+ la, eye ele alẽwo kplɔm.”+ Eye Samuel gblɔ na Isai be: “Dɔ woayi aɖakplɔe vɛ, elabena míanɔ anyi aɖu nu o, va se ɖe esime wòva afi sia hafi.” 12  Eya ta edɔ woyi ɖakplɔe vɛ. Ðekakpuia biã, eƒe ŋkuwo nya kpɔ, eye wòdze ɖeka.+ Eye Yehowa gblɔ be: “Tso nàsi ami nɛ, elabena eyae!”+ 13  Eya ta Samuel tsɔ lãdzo si me ami le la,+ eye wòsi ami nɛ le nɔviawo ŋkume. Eye Yehowa ƒe gbɔgbɔ va David dzi tso gbe ma gbe.+ Emegbe Samuel tso hedze mɔ yi Rama.+ 14  Eye Yehowa ƒe gbɔgbɔ dzo le Saul dzi,+ eye gbɔgbɔ vɔ̃ɖi aɖe tso Yehowa gbɔ va le fu ɖem nɛ vevie.+ 15  Eye Saul ƒe subɔviwo gblɔ nɛ be: “Kpɔ ɖa, gbɔgbɔ vɔ̃ɖi aɖe tso Mawu gbɔ le fu ɖem na wò. 16  Mía aƒetɔ, míeɖe kuku, ɖe gbe na wò subɔvi siwo le ŋkuwòme, ne woadi ŋutsu aɖe si bi ɖe saŋkuƒoƒo me nyuie la vɛ.+ Eye ne gbɔgbɔ vɔ̃ɖi si tso Mawu gbɔ la va dziwò la, ekema wòaƒo saŋku, ne wòaka ɖe eme na wò.” 17  Eya ta Saul gblɔ na eƒe subɔviawo be: “Midi ŋutsu aɖe si nya saŋkuƒoƒo nyuie la nam, eye miakplɔe vɛ nam.” 18  Subɔviawo dometɔ ɖeka gblɔ nɛ be: “Kpɔ ɖa, mekpɔ Isai, Betlehemtɔ la ƒe viwo dometɔ ɖeka si bi ɖe saŋkuƒoƒo me, dzi le eƒo eye wònye aʋakalẽtɔ.+ Enya nuƒoƒo, eye wòdze ɖeka hã,+ eye Yehowa li kplii.”+ 19  Eye Saul dɔ ame ɖo ɖe Isai gbɔ be woagblɔ nɛ be: “Ðo viwò David, si le lãhawo gbɔ la ɖem.”+ 20  Ale Isai kplɔ tedzi ɖeka, eye wòtsɔ abolo kple wain lãgbalẽgolo ɖeka kpakple gbɔ̃vi ɖeka, eye wòtsɔ wo kpe ɖe via David ŋu ɖo ɖe Saul. 21  Ale David va Saul gbɔ, eye wòsubɔe.+ Saul va lɔ̃e ŋutɔ, eye wòzu eƒe adekplɔvi. 22  Eya ta Saul dɔ ame ɖo ɖe Isai gbɔ be woagblɔ nɛ be: “Meɖe kuku, na David nanɔ gbɔnye asubɔm, elabena eƒe nu nyo ŋunye.” 23  Eye ne Mawu ƒe gbɔgbɔ vɔ̃ɖi la va Saul dzi la, ekema David ƒoa saŋku, ale be Saul kpɔa gbɔdzɔe, eye wòkana ɖe eme nɛ, eye gbɔgbɔ vɔ̃ɖi la dzona le edzi.+

Etenuŋɔŋlɔ