Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

1 Mose 6:1-22

EMENYAWO ƑE TOTOƉEME

  • Mawu viwo ɖe nyɔnuwo le anyigba dzi (1-3)

  • Wodzi Nefilimwo (4)

  • Amegbetɔwo ƒe nu vɔ̃ɖi wɔwɔ te ɖe Yehowa dzi (5-8)

  • Wode dɔ asi na Noa be wòakpa aɖakaʋu (9-16)

  • Mawu gblɔ be yeahe tsiɖɔɖɔ vɛ (17-22)

6  Esi amegbetɔwo de asi agbɔsɔsɔ me le anyigba dzi, eye wodzi nyɔnuwo na wo la,  Mawu vavã la ƒe viwo*+ kpɔ be amegbetɔwo ƒe vinyɔnuwo dze tugbe ŋutɔ. Ale woɖe wo dometɔ siwo katã dze wo ŋu.  Emegbe Yehowa gblɔ be: “Nye gbɔgbɔ magayi edzi aɖe mɔ ɖe amegbetɔ ƒe nuwɔna ŋu ɖaa o,+ elabena ŋutilã ko wònye.* Eya ta eƒe agbemeŋkekewo anye ƒe alafa ɖeka blaeve.”+  Nefilimwo* nɔ anyigbaa dzi le ŋkeke mawo me kple emegbe. Ɣemaɣi la, Mawu vavã la ƒe viwo gadɔna kple amegbetɔwo ƒe vinyɔnuwo, eye wodzi viŋutsuwo na wo. Woawoe nye ame kakowo, ame xɔŋkɔ siwo nɔ anyi le blema.  Eya ta Yehowa kpɔ ale si gbegbe amegbetɔ ƒe nu vɔ̃ɖi wɔwɔ do agbogbo ɖe anyigba la dzii, eye wòkpɔ be eƒe dzimesusuwo katã le vɔ̃wɔwɔ ko ŋu ɖaa.+  Ete ɖe Yehowa dzi* be yewɔ amegbetɔ ɖe anyigba la dzi, eye wògbã dzi nɛ.*+  Eya ta Yehowa gblɔ be: “Mele amegbetɔ siwo mewɔ la tsrɔ̃ ge ɖa le anyigba la dzi, amegbetɔwo kple aƒemelãwo kple lã siwo katã tana kpakple dziƒoxe dzodzoewo siaa, elabena evem be mewɔ wo.”  Ke Yehowa ve Noa ya nu.  Esiae nye Noa ƒe ŋutinya. Noa nye ame dzɔdzɔe.+ Enye ame maɖifɔ le eŋɔlimetɔwo* dome. Noa zɔ kple Mawu vavã la.+ 10  Noa dzi viŋutsu etɔ̃: Sem, Ham kple Yafet.+ 11  Ke anyigba la gblẽ le Mawu vavã la ŋkume, eye ŋutasesẽ yɔ anyigba la dzi. 12  Ɛ̃, Mawu kpɔ anyigba la, eye wòkpɔ be wogblẽe;+ amegbetɔwo* katã ƒe zɔzɔme gblẽ le anyigba la dzi.+ 13  Emegbe Mawu gblɔ na Noa be: “Meɖoe be matsrɔ̃ ŋutilãwo katã, elabena wona ŋutasesẽ yɔ anyigba la dzi fũu; eya ta matsrɔ̃ wo kple anyigba la siaa.+ 14  Tsɔ gofer-ti kpa aɖakaʋu* na ɖokuiwò,+ eye nàtso aɖakaʋu la me keŋ, eye nàtsɔ aŋɔ+ atre eme kple ekɔgo. 15  Ale nàwɔe nye esi: aɖakaʋu la nadidi abɔklugui* alafa etɔ̃, wòakeke abɔklugui blaatɔ̃, eye wòakɔ abɔklugui blaetɔ̃. 16  Dzidze abɔklugui ɖeka tso aɖakaʋu la tame nàtsɔ aɖe fesre* ɖe eŋu be kekeli naɖo eme. Ðe mɔnu ɖe aɖakaʋu la ŋu le eƒe axa dzi,+ eye nàwɔ aɖakaʋu la wòanye dzisasrã etɔ̃: etetɔ, titinatɔ, kple etametɔ. 17  “Mahe tsiɖɔɖɔ+ ava anyigba la dzi, ne matsrɔ̃ ŋutilã ɖe sia ɖe si me agbegbɔgbɔ le la ɖa le dziƒoa te. Nu sia nu si le anyigba dzi la atsrɔ̃.+ 18  Ke mele nu blam kpli wò, be wò ŋutɔ kple viwòŋutsuwo, kple srɔ̃wò kpakple viwòŋutsuawo srɔ̃wo miayi ɖe aɖakaʋu la me.+ 19  Kplɔ nu gbagbewo katã ƒomevi eveeve,+ atsu kple nɔe, yi aɖakaʋua me, ne woatsi agbe kpli wò;+ 20  xe dzodzoewo le wo ƒomeviwo nu, aƒemelãwo le wo ƒomeviwo nu, kple anyigbadzilã siwo katã tana le wo ƒomeviwo nu; kplɔ wo dometɔ ɖe sia ɖe eveeve yi eme le gbɔwò, ne woatsi agbe.+ 21  Ke wò la, ƒo nuɖuɖu ɖe sia ɖe ƒomevi si miaɖu la nu ƒu+ na mia kple lãawo.” 22  Eye Noa wɔ nu siwo katã ƒe se Mawu de nɛ la. Ewɔ wo pɛpɛpɛ.+

Etenuŋɔŋlɔ

Enye Hebrigbe me nya si fia mawudɔlawo.
Agate ŋu afia, “elabena ŋutilã nue wòwɔa nu ɖo.”
Agate ŋu afia, “Ameƒuanyilawo,” efia ame siwo naa ame bubuwo dzea anyi. Kpɔ Nya Tɔxɛwo Gɔmeɖeƒea.
Alo, “Eve Yehowa.”
Alo, “wòɖu dzi nɛ.”
Egɔmeɖeɖe tẽe, “eƒe dzidzimeawo.”
Alo, “ŋutilãwo.”
Egɔmeɖeɖe tẽe, “aɖakaʋu gã.”
Abɔklugui ɖeka le sentimeta 44.5. Kpɔ Megbenyawo B14.
Hebrigbe tsohar. Ame aɖewo susu be tsohar nye dzisasrã si viã abɔkluglui ɖeka, ke menye teƒe si wotsò ɖi na kekeli, alo fesre si woɖe o.