Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

1 Mose 20:1-18

EMENYAWO ƑE TOTOƉEME

  • Woxɔ na Sara tso Abimelek si me (1-18)

20  Eye Abraham ʋu tso afi ma+ yi Negeb, eva nɔ Kades+ kple Sur+ dome, eye wònɔ Gerar+ hã vie.  Abraham gblɔna tso srɔ̃a Sara ŋu enuenu be: “Nɔvinyee.”+ Esia ta Gerar-fia Abimelek dɔ woyi ɖakplɔ Sara vɛ nɛ.+  Emegbe Mawu va Abimelek gbɔ le drɔ̃eƒe le zã me hegblɔ nɛ be: “Kpɔ ɖa, èku vɔ, le nyɔnu si nèxɔ la ta,+ elabena ame srɔ̃e wònye.”+  Ke Abimelek mede asi eŋu o. Eye wògblɔ be: “Yehowa, dukɔ maɖifɔ* hãe nàtsrɔ̃a?  Menye ɖe wògblɔ nam be, ‘Nɔvinyenyɔnue’ oa? Eye ɖe nyɔnua ŋutɔ hã megblɔ be, ‘Nɔvinyeŋutsue’ oa? Nye dzi me kɔ, eye nye asi me dza le nya sia me.”  Eye Mawu vavã la gblɔ nɛ le drɔ̃e me be: “Menyae be wò dzi me kɔ le nu sia wɔwɔ me, eya tae mexe mɔ na wò be nàgawɔ nu vɔ̃ ɖe ŋunye o. Esia tae nyemeɖe mɔ na wò nèka asi eŋu o ɖo.  Azɔ gbugbɔ ŋutsua srɔ̃ ɖo ɖee, elabena nyagblɔɖila+ wònye, ne wòaƒo koko ɖe tawò+ be nàtsi agbe. Ke ne mègbugbɔ nyɔnua ɖo ɖee o la, nyae be ku kee nàku, wò ŋutɔ kple wò amewo katã.”  Abimelek fɔ ŋdi kanya, yɔ eƒe subɔviwo katã, eye wògblɔ nya siawo katã na wo. Eye ameawo vɔ̃ ŋutɔ.  Eyome Abimelek yɔ Abraham biae be: “Nu kae nye esi nèwɔ ɖe mía ŋu? Nu vɔ̃ kae mewɔ ɖe ŋuwò be nèhe vɔ̃ gã sia va nye kple nye fiaɖuƒe la dzi? Mèwɔ nu ɖe ŋunye nyuie kura o.” 10  Eye Abimelek gabia Abraham be: “Nu kae nèɖo ɖe tame hafi wɔ nu sia?”+ 11  Abraham gblɔ be: “Esi mebu be, ‘Ame aɖeke mevɔ̃a Mawu le afi sia o, eye woawum axɔ srɔ̃nye’ tae.+ 12  Gake nɔvinyee wònye vavã, fofonye ƒe vie wònye meɖe,+ gake menye danye ƒe vie o. 13  Esi Mawu na míeʋu tso fofonye ƒe me hele tsatsam la,+ megblɔ nɛ be, ‘Ale si nàve nunyee nye esi: Afi sia afi si míayi la, gblɔ tso ŋunye be: “Nɔvinyee.”’”+ 14  Eye Abimelek tsɔ alẽwo, nyiwo, subɔviŋutsuwo kple subɔvinyɔnuwo na Abraham, eye wòɖe asi le srɔ̃a Sara hã ŋu nɛ. 15  Eye Abimelek gblɔ be: “Kpɔ ɖa, nye anyigbae nye esi. Nɔ afi sia afi si nyo ŋuwò.” 16  Eye wògblɔ na Sara be: “Kpɔ ɖa, metsɔ klosalo akpe ɖeka na nɔviwòa.+ Esiae metsɔ kpata wò* le ame siwo katã le ŋuwò kpakple ame bubuwo katã ŋkume be, ŋutiwò kɔ tso vlododo me.” 17  Ale Abraham ƒo koko na Mawu vavã la; eye Mawu yɔ dɔ Abimelek kple srɔ̃a kpakple eƒe kosiwo, ale be wote ŋu dzi vi, 18  elabena Yehowa xe nyɔnu siwo katã le Abimelek ƒe aƒe me la ƒe vidzidɔ keŋkeŋ le Abraham srɔ̃ Sara ta.+

Etenuŋɔŋlɔ

Egɔmeɖeɖe tẽe, “dzɔdzɔe.”
Egɔmeɖeɖe tẽe, “Esiae nye ŋkudzitsyɔnu na wò.” Enye Hebritɔwo ƒe adagana aɖe si fia be woɖo kpe edzi le se nu be womeklo bubu le nyɔnu ƒe ŋkɔ ŋu o, ne amewo nanyae be amea meɖi fɔ o.