Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

1 Mose 16:1-16

EMENYAWO ƑE TOTOƉEME

  • Hagar kple Ismael (1-16)

16  Ke Abram srɔ̃ Sarai medzi vi aɖeke nɛ o,+ gake kosi aɖe le Sarai si, si nye Egiptetɔ, eŋkɔe nye Hagar.+  Eya ta Sarai gblɔ na Abram be: “Yehowa xe nye vidzidɔ. Meɖe kuku, dɔ kple nye kosi la. Ðewohĩ adzi viwo nam.”+ Eya ta Abram ɖo to Sarai ƒe gbe.  Esi Abram nɔ Kanaan-nyigba dzi ƒe ewo megbe la, Abram srɔ̃ Sarai tsɔ eƒe kosi Egiptetɔ Hagar na srɔ̃a wòɖe.  Ale Abram dɔ kple Hagar eye wòfɔ fu. Ke esi wòkpɔ be yefɔ fu ko la, megabua eƒe aƒenɔ ɖe ɖeke me o.  Eye Sarai gblɔ na Abram be: “Vevesese si dom wole nam la tso gbɔwò. Nye ŋutɔe ɖe asi le nye kosi la ŋu na wò,* ke esi wòkpɔ be yefɔ fu ko la, megabuam ɖe ɖeke me o. Yehowa nadrɔ̃e le nye kpli wò dome.”  Eye Abram gblɔ na Sarai be: “Kpɔ ɖa! Wò kosi la le asiwò me. Wɔ nu si nyo ŋuwò la ɖe eŋu.” Ale Sarai bɔbɔe ɖe anyi, eye kosi la si le egbɔ.  Emegbe Yehowa ƒe dɔla kpɔe le vudo aɖe si le gbedzi le Sur+ mɔ dzi la to.  Eye wòbiae be: “Sarai ƒe kosi Hagar, afi kae nètso, eye afi ka yim nèle?” Eɖo eŋu be: “Nye aƒenɔ Sarai nue mele sisim le.”  Eye Yehowa ƒe dɔla la gblɔ nɛ be: “Trɔ yi wò aƒenɔ la gbɔ, eye nàbɔbɔ ɖokuiwò ɖe ete.” 10  Yehowa ƒe dɔla la gagblɔ nɛ be: “Mana wò dzidzimeviwo nasɔ gbɔ kpaŋkpaŋ, woasɔ gbɔ ale gbegbe be womate ŋu axlẽ wo o.”+ 11  Yehowa ƒe dɔla la gblɔ kpee be: “Kpɔ ɖa! Èfɔ fu, àdzi ŋutsuvi, eye nàna ŋkɔe be Ismael;* elabena Yehowa se konyi si fam nèle le wò fukpekpe la ŋuti. 12  Ŋutsuvi la anɔ abe gbetedzi* ene. Akɔ asi dzi ɖe ame sia ame ŋu, eye ame sia ame akɔ asi dzi ɖe eya hã ŋu; eye wòanɔ teƒe si dze ŋgɔ nɔviawo katã.”* 13  Eye wòyɔ Yehowa, Ame si le nu ƒom nɛ la, ƒe ŋkɔ gblɔ be: “Mawu si kpɔa nue nènye,”+ elabena egblɔ be: “Ame si le kpɔyem lae mekpɔ le afi sia?” 14  Esia tae woyɔ vudo la be Beer-Lahai-Roi.* (Ele Kades kple Bered dome.) 15  Eye Hagar dzi ŋutsuvi na Abram, eye Abram na ŋkɔ vi si Hagar dzi la be Ismael.+ 16  Abram xɔ ƒe blaenyi vɔ ade esime Hagar dzi Ismael nɛ.

Etenuŋɔŋlɔ

Egɔmeɖeɖe tẽe, “Nye ŋutɔe tsɔ nye kosi la ɖo wò akɔnu.”
Egɔmee nye “Mawu See.”
Ðewohĩ efia ɖokuisinɔnɔ ƒe nɔnɔme.
Agate ŋu afia, “eye wòalé fu nɔviawo katã.”
Egɔmee nye “Ame Si Le Agbe Si Le Kpɔyem Ƒe Vudo.”