Dzo kpo yi emenuwo dzi

Dzo kpo yi emenuawo dzi

1 Mose 15:1-21

EMENYAWO ƑE TOTOƉEME

  • Mawu bla nu kple Abram (1-21)

    • Wogblɔ ƒe alafa ene ƒe fukpekpe ɖi (13)

    • Mawu gbugbɔ do ŋugbe na Abram (18-21)

15  Le esia megbe la, Yehowa ƒe gbe va na Abram le ŋutega me be: “Abram, mègavɔ̃ o.+ Nyee nye wò akpoxɔnu.+ Wò fetu asɔ gbɔ ŋutɔ.”+  Abram ɖo eŋu be: “Aƒetɔ Dziɖulagã Yehowa, esi vi mele asinye o, eye Eliezer,+ Damaskotɔ lae ava nyi nye dome ɖe, ke nu ka na ge nèlem?”  Eye Abram gblɔ kpee be: “Mèna vi aɖekem o,+ eye aƒenyemetɔ aɖee ava nyi nye dome.”  Yehowa ɖo eŋu nɛ be, “Ame sia manyi wò dome o, ke boŋ wò ŋutɔ viwòe* anyi wò dome.”+  Eye wòkplɔe do goe gblɔ nɛ be: “Meɖe kuku, fɔ mo dzi nàkpɔ dziƒo, eye ne àte ŋu axlẽ ɣletiviwo la, ekema xlẽ wo.” Eye wògagblɔ nɛ be: “Aleae wò dzidzimeviwo ava nɔ.”+  Abram xɔ Yehowa dzi se,+ eye Mawu bui dzɔdzɔenyenye nɛ.+  Eye wògblɔ kpee be: “Nyee nye Yehowa, ame si kplɔ wò tso Ur, le Kaldea-nyigba dzi, be matsɔ anyigba sia ana wò wòazu tɔwò.”+  Eye wòbia be: “Aƒetɔ Dziɖulagã Yehowa, aleke mawɔ anya be ava zu tɔnye?”  Eɖo eŋu nɛ be: “Tsɔ nyinɔ si xɔ ƒe etɔ̃, gbɔ̃nɔ si xɔ ƒe etɔ̃, agbo si xɔ ƒe etɔ̃, akpakpa* ɖeka kple ahɔnɛvi ɖeka vɛ nam.” 10  Eye wòtsɔ lã siawo katã hefe wo me ɖe eve, eye wòtsɔ ɖe sia ɖe ƒe akpa ɖeka ɖo evelia ŋu wòsɔ ɖe enu, ke mefe xeawo ya me o. 11  Eye xe ƒonuwo va le dzedzem ɖe lã kukuawo dzi, ke Abram nɔ wo nyam. 12  Esi wòsusɔ vie ɣe naɖo to la, Abram dɔ alɔ̃ yi eme ʋĩi, eye viviti tsiɖitsiɖi dziŋɔ aɖe do ɖee. 13  Eye Mawu gblɔ na Abram be: “Nyae kɔtɛe be, wò dzidzimeviwo ava zu amedzrowo le dzronyigba dzi, anyigba ma dzi tɔwo awɔ wo kluviwoe eye woawɔ fu wo ƒe alafa ene sɔŋ.+ 14  Gake madrɔ̃ ʋɔnu dukɔ si woasubɔ la,+ eye emegbe woatsɔ nunɔamesi geɖewo adzoe.+ 15  Ke wò la, ànɔ agbe atsi nyuie, àku le ŋutifafa me, eye woatsɔ wò akpe ɖe tɔgbuiwòwo ŋu.+ 16  Ke ne eɖo dzidzime enelia dzi la, woagatrɔ ava afi sia,+ elabena Amoritɔwo ƒe vodadawo mesɔ gbɔ haɖe na tohehe o.”+ 17  Azɔ esi ɣe ɖo to, eye viviti tsiɖitsiɖi aɖe do la, kpo si me dzudzɔ le tutum le kɔlikɔli kple akakati si le bibim la va to lã fefeawo dome. 18  Gbe ma gbee Yehowa bla nu kple Abram+ gblɔ be: “Wò dzidzimeviwoe matsɔ anyigba sia ana,+ tso Egipte-tɔsisi la nu va ɖo tɔsisi gã, si nye Frat-tɔsisi la nu:+ 19  Kenitɔwo,+ Kenizitɔwo, Kadmonitɔwo, 20  Hititɔwo,+ Perizitɔwo,+ Refaimtɔwo,+ 21  Amoritɔwo, Kanaantɔwo, Girgasitɔwo kple Yebusitɔwo+ ƒe anyigba.”

Etenuŋɔŋlɔ

Egɔmeɖeɖe tẽe, “wò alimevie.”
Alo, “ƒeƒlelu.”