Dzo kpo yi emenuwo dzi

Dzo kpo yi emenuawo dzi

1 Kronika 28:1-21

EMENYAWO ƑE TOTOƉEME

  • David ƒo nu tso gbedoxɔa tutu ŋu (1-8)

  • Mɔfiamewo na Salomo; wotsɔ xɔa ƒe nɔnɔmetata nɛ (9-21)

28  David ƒo Israel ƒe amegãwo katã nu ƒu ɖe Yerusalem: toawo ƒe amegãwo, ame siwo subɔa fia la ƒe hatsotsowo ƒe amegãwo,+ ame akpe ƒe tatɔwo kple ame alafa ƒe tatɔwo,+ kple tatɔ siwo kpɔa fia kple viawo+ ƒe nunɔamesiwo kple woƒe lãhawo katã dzi+ hekpe ɖe fiaŋumewo kple kalẽtɔwo kple ŋutsu veviedolawo katã ŋuti.+  Eye Fia David tso ɖe tsitrenu gblɔ be: “Nɔvinyewo kple nye dukɔ, miɖo tom. Medi vevie tso dzi me be matu xɔ si anye gbɔɖemeƒe na Yehowa ƒe nubablaɖaka la wòanye mía Mawu la ƒe afɔɖodzinu,+ eye medzra ɖo ɖe etutu ŋu hã.+  Ke Mawu vavã la gblɔ nam be: ‘Màtu xɔ na nye ŋkɔ o,+ elabena aʋame nènye, eye nèkɔ ʋu ɖi.’+  Yehowa, Israel ƒe Mawu la, tiam tso fofonye ƒe aƒe blibo la me be mazu fia ɖe Israel nu tegbee,+ elabena Yudae wòtia be wòanye kplɔla,+ eye wòtia fofonye ƒe aƒe+ le Yuda ƒe me, eye nye nue dze eŋu le fofonye ƒe viwo dome be wòtsɔm ɖo fiae ɖe Israel blibo la nu.+  Eye le vinyewo katã—elabena Yehowa na vi geɖem+—dome la, etia vinye Salomo+ be wòanɔ Yehowa ƒe fianyenye ɖe Israel dzi ƒe fiazikpui la dzi.+  “Egblɔ nam be: ‘Viwò Salomo ye atu nye xɔ kple nye xɔxɔnuwo, elabena metiae be wòanye vinye, eye mazu fofoa.+  Mali ke eƒe fiaɖuɖu tegbee+ nenye be eɖoe kplikpaa wɔ nye sededewo kple nye ʋɔnudrɔ̃ɖoɖowo+ dzi, abe ale si wòle ewɔm fifia ene.’  Eya ta mele egblɔm na mi le Israel blibo, si nye Yehowa ƒe ha la ŋkume, kple mía Mawu la ƒe to me be: Midi Yehowa mia Mawu la ƒe sededewo katã yome mɔ ne miawɔ wo dzi pɛpɛpɛ, be miaxɔ anyigba nyui la wòazu mia tɔ,+ ne miagblẽe ɖi na mia megbeviwo woatsɔ anyi dome tegbee.  “Eye wò, vinye Salomo, dze si fofowò ƒe Mawu la, eye nàsubɔe kple dzi blibo+ kpakple luʋɔ* kpɔdzidzɔ,* elabena Yehowa dzroa dziwo katã me kpɔna,+ eye wòdzea si tamesusuwo kple dzimedidiwo katã.+ Ne èdii la, ekema ana nàke ɖe eŋu,+ ke ne ègblẽe ɖi la, agbe wò tegbee.+ 10  Eya ta kpɔ ɖa, Yehowa tia wò be nàtu xɔ si anye kɔkɔeƒe. Lé dzi ɖe ƒo, eye nàwɔ dɔ la ade goe.” 11  Eye David tsɔ xɔ la ƒe akpata+ la, eŋu xɔwo, eme nudzraɖoƒexɔwo, eŋu xɔtaxɔwo, xɔ ememetɔwo kple avuléle ƒe nutunu la ƒe xɔ*+ ƒe nɔnɔmetata+ de asi na via Salomo. 12  Etsɔ nu siwo katã wòxɔ to gbɔgbɔ la dzi la ƒe nɔnɔmetata de asi nɛ: Yehowa ƒe aƒe la ƒe xɔxɔnuwo,+ nuɖuxɔawo katã godoo va kpe, kesinɔnudzraɖoƒe siwo le Mawu vavã la ƒe aƒe la me kple nu siwo ŋu wokɔ* la dzraɖoƒewo;+ 13  nunɔlawo kple Lewi viwo ƒe hatsotsoawo,+ Yehowa ƒe aƒe ŋuti subɔsubɔdɔ blibo la katã kple Yehowa ƒe aƒe la ƒe subɔsubɔdɔ la ŋu nuwo katã; 14  sika kpekpeme si nu woada, sika si woazã ɖe sikadɔwɔnu vovovo siwo ŋu dɔ woawɔ le subɔsubɔdɔa me ŋu, klosalo kpekpeme si nu woazã ɖe klosalodɔwɔnu vovovo siwo katã ŋu dɔ woawɔ le subɔsubɔdɔa me ŋu; 15  ɖe sikakaɖitiawo+ kple wo ŋu sikakaɖigbɛawo ƒe kpekpeme si nu woazã ŋu, ɖe sikakaɖiti vovovoawo kple wo ŋu akaɖigbɛawo ƒe kpekpeme nu, kple klosalokaɖitiawo ɖe akaɖiti ɖe sia ɖe kple eŋu akaɖigbɛawo ƒe kpekpeme nu, le ale si woawɔ akaɖiti vovovoawo ŋu dɔe nu; 16  kple sika kpekpeme si nu woazã ɖe kplɔ̃ siwo dzi woaɖo abolowo ɖe wo nɔewo dzi* ɖo la ŋu,+ ɖe kplɔ̃ ɖe sia ɖe ŋu, kple klosalo ɖe klosalokplɔ̃awo ŋu, 17  sika nyuitɔ si nu woatsɔ awɔ gafloawo, agba goboeawo kple zeawo, sikagba goboe+ suewo ɖe agba goboe sue ɖe sia ɖe ƒe kpekpeme nu, kple klosalogba goboe suewo ɖe agba goboe sue ɖe sia ɖe ƒe kpekpeme nu. 18  Azɔ hã etsɔ sika si ŋu wodza ƒe kpekpeme si nu woazã ɖe dzudzɔdomlekpui+ la kple nu si le tsitre ɖi na tasiaɖam+ la, si nye sikakerubi+ siwo akeke aʋala me wòatsyɔ Yehowa ƒe nubablaɖakaa dzi ŋu la nɛ. 19  David gblɔ be: “Yehowa ƒe asi si nɔ kplim, eye wòna gɔmesese detom be maŋlɔ+ ale si xɔ la ƒe akpa vovovoawo anɔ la ŋuti mɔfiamewo+ katã ɖi tsitotsito.” 20  Eye David gagblɔ na via Salomo be: “Lé dzi ɖe ƒo, sẽ ŋu, eye nàwɔ dɔ la. Mègavɔ̃ o, eye ŋɔ megadzi wò o, elabena Yehowa Mawu, nye Mawu, li kpli wò.+ Maɖe asi le ŋuwò loo alo agblẽ wò ɖi o,+ ke boŋ anɔ kpli wò va se ɖe esime Yehowa ƒe aƒe ŋuti dɔ blibo la katã wu enu. 21  Eye kpɔ ɖa, nunɔlawo+ kple Lewi+ viwo ƒe hatsotsowoe nye esi hena Mawu vavã la ƒe aƒe la ŋuti subɔsubɔdɔ blibo la katã wɔwɔ. Aɖaŋudɔwɔla siwo katã lɔ̃ faa na dɔ vovovoawo wɔwɔ+ hekpe ɖe amegãwo+ kple dukɔ blibo la katã ŋu le gbɔwò, ame siwo awɔ ɖe wò mɔfiamewo katã dzi.”

Etenuŋɔŋlɔ

Alo, “kpakple lɔlɔ̃nu faa.”
Alo, “avuléxɔ.”
Alo, “siwo wotsɔ na.”
Alo, “ŋkumeɖobolo.”