Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

1 Kronika 22:1-19

EMENYAWO ƑE TOTOƉEME

  • David dzra ɖo na gbedoxɔa tutu (1-5)

  • David na mɔfiamewo Salomo (6-16)

  • Sedede na amegãwo be woakpe ɖe Salomo ŋu (17-19)

22  Azɔ David gblɔ be: “Esiae nye Yehowa, Mawu vavã la, ƒe aƒe, eye esiae nye vɔsamlekpui ɖe Israel ƒe numevɔsa ŋu.”+  David de se be woaƒo amedzro siwo le Israel-nyigba dzi la nu ƒu,+ eye wòɖo wo kpekpalawo, ne woakpa kpewo woatsɔ atu Mawu vavã la ƒe xɔ la.+  David dzra gayibɔ gbogbo aɖe ɖo ɖe agboawo kple ʋɔtruwo ƒe gatagbadzɛwo kple nulégawo wɔwɔ ŋuti, edzra akɔbli gbogbo aɖe si mele dada me o hã ɖo+  kple sederti+ siwo mele xexlẽ me o hã ɖo, elabena Sidontɔwo+ kple Tirotɔwo+ tsɔ sederti gbogbo aɖe vɛ na David.  Eye David gblɔ be: “Ðekakpui dzaa makpɔnuteƒe koe vinye Salomo nye,+ evɔ xɔ si woatu na Yehowa la lolo ale gbegbe+ eye eƒe nyonyo+ ƒo ɖe sia ɖe ta sãsãsã le anyigba blibo la dzi.+ Eya ta madzra nuwo ɖo ɖi nɛ.” Ale David dzra nu gbogbo aɖewo ɖo ɖi hafi ku.  Azɔ hã, eyɔ via Salomo, eye wòna mɔfiamee be wòatu xɔ na Yehowa, Israel ƒe Mawu la.  David gblɔ na via Salomo be: “Nye la, medi vevie tso dzi me be matu xɔ na Yehowa nye Mawu ƒe ŋkɔ.+  Ke Yehowa ƒe gbe va nam be, ‘Èkɔ ʋu gbogbo aɖe ɖi, eye èwɔ aʋa geɖe. Màtu xɔ na nye ŋkɔ o,+ elabena èkɔ ʋu gbogbo aɖe ɖe anyi le ŋkunyeme.  Kpɔ ɖa! Wole ŋutsuvi aɖe dzi ge na wò.+ Eya anye ŋutifafame,* eye mana gbɔdzɔe tso eƒe futɔwo katã si me godoo,+ elabena Salomo*+ anye eƒe ŋkɔ, eye mana ŋutifafa kple tomefafa nanɔ Israel le eƒe ŋkekewo me.+ 10  Eyae atu xɔ na nye ŋkɔ;+ azu vinye, eye nye la mazu fofoa.+ Eye mana eƒe fiaɖuƒe ƒe fiazikpui nali ke ɖe Israel dzi ɖaa.’+ 11  “Eya ta vinye, Yehowa nenɔ kpli wò, ne wòadze edzi na wò, ale be nàtu Yehowa wò Mawu ƒe xɔ la, abe ale si tututu wògblɔ le ŋuwò ene.+ 12  Yehowa nena aɖaŋudzedze kple nugɔmesese wò,+ ale be ne etsɔ wò ɖo Israel nu la, nàlé Yehowa wò Mawu ƒe se la me ɖe asi.+ 13  Ne èwɔ se kple ʋɔnudrɔ̃ɖoɖo+ siwo Yehowa tsɔ na Mose ku ɖe Israel ŋu dzi pɛpɛpɛ la, ekema nu adze edzi na wò.+ Lé dzi ɖe ƒo, eye nàsẽ ŋu. Mègavɔ̃ o, eye ŋɔ megadzi wò o.+ 14  Kpɔ ɖa, meku kutri dzra sika talento akpe* alafa ɖeka kple klosalo talento miliɔn ɖeka ɖo ɖe Yehowa ƒe xɔ la ŋu, hekpe ɖe akɔbli kpakple gayibɔ+ si mele dada me o la ŋu, eye medzra atiwo kple kpewo ɖo,+ ke nàdi bubuwo akpe ɖe wo ŋu. 15  Dɔwɔla gbogbo aɖewo le gbɔwò, kpekpalawo, gliɖolawo,+ atikpalawo kple aɖaŋudɔ ƒomevi vovovo wɔlawo.+ 16  Sika, klosalo, akɔbli kple gayibɔ mele dada me o.+ Eya ta tso ɖe dɔ la ŋu, eye Yehowa nenɔ kpli wò.”+ 17  Eye David de se na Israel ƒe amegãwo katã be woakpe ɖe ye vi Salomo ŋu hegblɔ be: 18  “Ðe Yehowa mia Mawu la meli kpli mi oa, eye ɖe mena gbɔdzɔe mi godoo oa? Elabena etsɔ anyigba la dzi nɔlawo de asi nam, eye wobɔbɔ ɖe Yehowa kple eƒe dukɔ la te. 19  Eya ta miɖoe kplikpaa tso dzi me be miadi Yehowa mia Mawu la kple miaƒe dzi kple miaƒe luʋɔ* blibo,+ eye mitu Yehowa, Mawu vavã la, ƒe kɔkɔeƒe la,+ ne miatsɔ Yehowa ƒe nubablaɖaka la kple Mawu vavã la ƒe nu kɔkɔeawo+ ava xɔ si woatu na Yehowa ƒe ŋkɔ la me.”+

Etenuŋɔŋlɔ

Egɔmeɖeɖe tẽe, “ahe gbɔdzɔe vɛ.”
Woɖee tso Hebrigbe me nya si fia “Ŋutifafa” me.
Talento ɖeka le kilogram 34.2. Kpɔ Megbenyawo B14.