Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

1 Kronika 15:1-29

EMENYAWO ƑE TOTOƉEME

  • Lewi viwo kɔ Nubablaɖaka la va Yerusalem (1-29)

    • Mikal do vlo David (29)

15  David tu xɔwo na eɖokui le David Ƒe Du la me, edzra teƒe ɖo na Mawu vavã la ƒe Aɖaka la, eye wòtu agbadɔ nɛ.+  Ɣemaɣie David gblɔ be: “Ame aɖeke mekpɔ mɔ akɔ Mawu vavã ƒe Aɖaka la o, negbe Lewi viwo ko, elabena woawoe Yehowa tia be woakɔ Yehowa ƒe Aɖaka la, eye woasubɔ eya amea ɖaa.”+  Eye David ƒo Israel blibo la nu ƒu ɖe Yerusalem be woakɔ Yehowa ƒe Aɖaka la va teƒe si wòdzra ɖo nɛ.+  David ƒo Aron ƒe dzidzimeviwo+ kple Lewi viwo+ nu ƒu:  Kohat viwo ƒe tatɔ Uriel kple nɔviaŋutsuwo le alafa ɖeka blaeve;  Merari viwo ƒe tatɔ Asaya+ kple nɔviaŋutsuwo le alafa eve blaeve;  Gersom viwo ƒe tatɔ Yoel+ kple nɔviaŋutsuwo le alafa ɖeka blaetɔ̃;  Elizafan+ ƒe dzidzimeviwo ƒe tatɔ Semaya kple nɔviaŋutsuwo le alafa eve;  Hebron ƒe dzidzimeviwo ƒe tatɔ Eliel kple nɔviaŋutsuwo le blaenyi; 10  Uziel+ ƒe dzidzimeviwo ƒe tatɔ Aminadab kple nɔviaŋutsuwo le alafa ɖeka wuieve. 11  Azɔ hã, David yɔ Zadok+ kple Abiatar,+ siwo nye nunɔlawo, kple Uriel, Asaya, Yoel, Semaya, Eliel kple Aminadab, siwo nye Lewi viwo, 12  eye wògblɔ na wo be: “Miawoe nye Lewi viwo ƒe tatɔwo le mia fofowo ƒe aƒekɔawo nu. Miawo kple mia nɔviwo mikɔ mia ɖokuiwo ŋu, ne miayi aɖakɔ Yehowa, Israel ƒe Mawu la, ƒe Aɖaka la ava teƒe si medzra ɖo nɛ la. 13  Esi miekɔe zi gbãtɔ o+ tae Yehowa mía Mawu la ƒe dziku fla ɖe mía ŋu ɖo,+ elabena míedi mɔ nyuitɔ si nu wòle be míakɔe le la o.”+ 14  Eya ta nunɔlawo kple Lewi viwo kɔ wo ɖokuiwo ŋu be woayi aɖakɔ Yehowa, Israel ƒe Mawu la, ƒe Aɖaka la avɛ. 15  Eye Lewi viwo tsɔ kpoawo+ kɔ Mawu vavã la ƒe Aɖaka la ɖe abɔta, abe ale si tututu Mose de se le Yehowa ƒe nya nu ene. 16  Eye David gblɔ na Lewi viwo ƒe tatɔwo be woana wo nɔvi hadzilawo nakɔ gbe dzi adzi ha dzidzɔtɔe, eye woadzii ɖe hadzinu siwo nye kasaŋkuwo, saŋkuwo+ kple gakogoewo+ dzi. 17  Eya ta Lewi viwo tia Heman,+ Yoel vi, hekpe ɖe Asaf,+ Berekiya vi, ŋu tso nɔviawo dome kple Etan,+ Kusaya vi, tso nɔvia Merari viwo dome. 18  Eye wo nɔvi siwo le hatsotso evelia+ me kpe ɖe wo ŋue nye: Zakariya, Ben, Yaaziel, Semiramot, Yehiel, Uni, Eliab, Benaya, Maaseya, Matitiya, Elifelehu kple Mikneya kple Obed-Edom kple Yeiel, siwo nye agbonudzɔlawo. 19  Heman,+ Asaf+ kple Etan, siwo nye hadzilawoe ƒoa akɔbligakogoewo;+ 20  eye Zakariya, Aziel, Semiramot, Yehiel, Uni, Eliab, Maaseya kple Benaya ƒoa kasaŋku siwo woaƒo ɖe Alamot*+ dzi la; 21  eye Matitiya,+ Elifelehu, Mikneya, Obed-Edom, Yeiel kple Azaziya, ƒoa saŋku siwo woaƒo ɖe Seminit*+ dzi la, eye wonye dzikpɔlawo. 22  Lewi viwo ƒe tatɔ Kenaniya+ ye kpɔa agbatsɔtsɔ dzi, elabena ebi ɖe eme, 23  Berekiya kple Elkana nye Aɖaka la ŋu dzɔlawo. 24  Sebaniya, Yosafat, Netanel, Amasai, Zakariya, Benaya kple Eliezer nye nunɔla siwo kua kpẽawo sesĩe le Mawu vavã la ƒe Aɖaka la ŋgɔ,+ eye Obed-Edom kple Yehia hã nye Aɖaka la ŋu dzɔlawo. 25  Eye David kple Israel ƒe ametsitsiwo kpakple ame akpe ƒe tatɔwo yi be woaɖakɔ Yehowa ƒe nubablaɖaka la kple dzidzɔ+ tso Obed-Edom+ ƒe me vɛ. 26  Esi Mawu vavã la kpe ɖe Lewi viwo ŋu wokɔ Yehowa ƒe nubablaɖakaa la, wotsɔ nyitsui adre kple agbo adre sa vɔe.+ 27  David kple Lewi vi siwo katã kɔ Aɖaka la, hadzilawo kple agbatsɔlawo ƒe tatɔ Kenaniya, siaa do aklala biɖibiɖi wu ʋlaya si ŋu abɔ mele o; David do aklalakɔmewu+ hã. 28  Eye Israel-viwo katã le aseye tsom,+ le lãdzo kple kpẽwo kum,+ le gakogoewo ƒom, eye wole kasaŋkuwo kple saŋkuwo ƒom sesĩe+ hekɔ Yehowa ƒe nubablaɖaka gbɔna. 29  Esi Yehowa ƒe nubablaɖaka la ɖo David Ƒe Du la me la,+ Saul vinyɔnu Mikal+ do mo ɖe fesre nu, eye wòkpɔ Fia David wòle kpo tim le aseye tsom; eye wòdo vloe le eƒe dzi me.+