Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

1 Fiawo 8:1-66

EMENYAWO ƑE TOTOƉEME

  • Wokɔ Nubablaɖaka la va gbedoxɔa me (1-13)

  • Salomo ƒo nu na dukɔa (14-21)

  • Gbedoxɔa ŋu kɔkɔ ƒe gbe si Salomo do ɖa (22-53)

  • Salomo yra dukɔa (54-61)

  • Vɔsawo kple xɔŋukɔkɔŋkekenyui (62-66)

8  Ɣemaɣi la, Salomo ƒo+ Israel ƒe ametsitsiwo, toawo ƒe tatɔwo katã, Israel-viwo ƒe tatɔ siwo le wo fofowo ƒe aƒekɔwo nu la nu ƒu.+ Wova Fia Salomo gbɔ le Yerusalem, ne woayi aɖakɔ Yehowa ƒe nubablaɖaka la tso David Ƒe Du+ si woyɔna be Zion+ la me vɛ.  Israel ŋutsuwo katã va ƒo ƒu ɖe Fia Salomo gbɔ le dzinu Etanim* me, le ŋkekenyui* si woɖuna le ɣleti adrelia me la ɖuɣi.+  Israel ƒe ametsitsiwo katã va, eye nunɔlawo kɔ Aɖaka la.+  Wokɔ Yehowa ƒe Aɖaka la kple takpegbadɔ+ la kpakple nu kɔkɔe siwo katã le agbadɔa me vɛ. Nunɔlawo kple Lewi viwoe kɔ wo vɛ.  Fia Salomo kple Israel ƒe ha blibo si woyɔ wova kpe ta ɖe egbɔ la tɔ ɖe Aɖaka la ŋgɔ. Wotsɔ alẽ kple nyi gbogbo, siwo womate ŋu abu alo axlẽ o la, sa vɔe.+  Ale nunɔlawo kɔ Yehowa ƒe nubablaɖaka la va da ɖe enɔƒe,+ le xɔ ememetɔ, si nye Kɔkɔeƒewo Ƒe Kɔkɔeƒe la me, le kerubiawo ƒe aʋalawo te.+  Kerubiawo keke woƒe aʋalawo ɖe Aɖaka la nɔƒe, ale be kerubiawo tsyɔ Aɖaka la kple eŋu kpoawo dzi le dzi gome.+  Kpoawo+ didi, ale be woate ŋu akpɔ woƒe nugbɔ tso Kɔkɔeƒe si le xɔ ememetɔ ŋgɔ la me, gake womate ŋu akpɔ wo tso gota o. Eye wole afi ma va se ɖe egbe sia.  Naneke mele Aɖaka la me o, negbe kpe gbadzɛ eve,+ siwo Mose tsɔ de eme+ le Horeb, esi Yehowa bla nu+ kple Israel-viwo esime wotso Egipte-nyigba+ dzi gbɔna la ko. 10  Esi nunɔlawo do le kɔkɔeƒea la, alilikpo+ yɔ Yehowa ƒe xɔ la taŋ.+ 11  Eye nunɔlawo mete ŋu nɔ te be woasubɔ o le alilikpo la ta, elabena Yehowa ƒe ŋutikɔkɔe yɔ Yehowa ƒe xɔ la taŋ.+ 12  Ɣemaɣi Salomo gblɔ be: “Yehowa gblɔ be yeanɔ blukɔ tsiɖitsiɖi me.+ 13  Mete ŋu tu xɔ be wòanye nɔƒe nyui na wò, teƒe si nànɔ ɖaa.”+ 14  Azɔ fia la trɔ dze ŋgɔ Israel ƒe ha blibo la katã heyra wo esime Israel ƒe ha bliboa le tsitrenu.+ 15  Eye wògblɔ be: “Woakafu Yehowa, Israel ƒe Mawu, ame si ŋutɔ ke nu do ŋugbe na fofonye David, eye wòto eya ŋutɔ ƒe asi dzi na wòva eme, gblɔ be, 16  ‘Tso gbe si gbe mekplɔ nye dukɔ Israel tso Egipte la, nyemetia du aɖeke le Israel-toawo katã me be woatu xɔ, si ŋu nye ŋkɔ anɔ le afi ma o,+ ke metia David be wòanɔ nye dukɔ Israel nu.’ 17  Eye fofonye David di vevie tso dzi me be yeatu xɔ na Yehowa, Israel ƒe Mawu la, ƒe ŋkɔ.+ 18  Ke Yehowa gblɔ na fofonye David be, ‘Èdi vevie tso dzi me be yeatu xɔ na nye ŋkɔ la, eye enyo ŋutɔ be nèdi tso dzi me be yeawɔ esia. 19  Ðeko wò ŋutɔ màtu xɔ la o, ke boŋ vi si woadzi na wò* lae atu xɔ na nye ŋkɔ.’+ 20  Yehowa wɔ ŋugbe si wòdo la dzi, elabe mexɔ ɖe fofonye David teƒe hebɔbɔ nɔ Israel ƒe fiazikpui la dzi, abe ale si Yehowa do ŋugbee ene. Metu xɔ na Yehowa, Israel ƒe Mawu la, ƒe ŋkɔ,+ 21  eye mewɔ teƒe na Aɖaka, si me Yehowa ƒe nu, si wòbla+ kple mía tɔgbuiwo esime wòkplɔ wo tso Egipte-nyigba dzi gbɔnae le la, ɖe afi ma.” 22  Eye Salomo tɔ ɖe Yehowa ƒe vɔsamlekpui la ŋgɔ le Israel ƒe ha blibo la ŋkume, eke eƒe abɔwo me ɖo ɖe dziƒo,+ 23  eye wògblɔ be: “Oo Yehowa, Israel ƒe Mawu, Mawu aɖeke mele abe wò ene+ le dziƒo afi mɛ alo anyigba dzi afii o, èwɔna ɖe wò nubabla dzi eye nèvea wò subɔla siwo zɔna le ŋkuwòme kple woƒe dzi blibo+ la nu.+ 24  Èwɔ ŋugbe si nèdo na wò subɔla fofonye David la dzi. Ètsɔ wò nu do ŋugbe, eye nèto wò asi dzi na wòva eme egbe sia.+ 25  Azɔ Oo Yehowa, Israel ƒe Mawu, wɔ ŋugbe si nèdo na wò subɔla fofonye David la dzi, esi nègblɔ be, ‘Ne viwòwo kpɔ woƒe zɔzɔme dzi eye wozɔ le ŋkunyeme abe ale si nèzɔ le ŋkunyemee ene la, ekema wò ƒomea me tɔ siwo abɔbɔ nɔ Israel ƒe fiazikpui dzi la nu matso le ŋkunyeme o.’+ 26  Eya ta Oo Israel ƒe Mawu, meɖe kuku, na ŋugbe si nèdo na wò subɔla fofonye David la nava eme. 27  “Ke ɖe Mawu ate ŋu anɔ anyigba dzi nyateƒea?+ Kpɔ ɖa! Dziƒowo, ɛ̃, dziƒowo ƒe dziƒo gɔ̃ hã melolo na wò o;+ ʋuu keke wòahanye xɔ sia, si metu la?+ 28  Azɔ, Oo Yehowa, nye Mawu, trɔ ɖe wò subɔla ƒe gbedodoɖa ŋu, eye nàwɔ eƒe biabia be nàve ye nu la dzi, ne nàse kokoƒoƒo kple gbe si dom wò subɔla le ɖa le ŋkuwòme egbea. 29  Na wò ŋkuwo nanɔ ʋuʋu ɖe xɔ sia ŋu zã kple keli, ɖe teƒe si ŋu nègblɔ le be, ‘Nye ŋkɔ anɔ afi ma’ la ŋu,+ ne nàɖo to gbe si wò subɔla atrɔ mo ɖe teƒe sia ado ɖa.+ 30  Eye ne wò subɔla kple wò dukɔ Israel trɔ mo ɖe teƒe sia do gbe ɖa bia be nàve yewo nu la, nàɖo to wo, eye nàsee le nɔwòƒe le dziƒo;+ ɛ̃, ne nàsee ahatsɔe ake.+ 31  “Ne ame aɖe wɔ nu vɔ̃ ɖe ehavi ŋu, eye wobia tso esi be wòaka atam* ƒu edzi, eye wòka atam tsɔ bla eɖokui,* eye wòva wò vɔsamlekpui la ŋgɔ le aƒe sia me esime atam si wòka* la le edzi la,+ 32  ekema nàsee le dziƒo, eye nàde nu nya la me ahadrɔ̃e na wò subɔlawo, eye nàbu fɔ ame vɔ̃ɖi la be eɖi fɔ,* ne nàna nu si wòwɔ la nava eya ŋutɔ ƒe ta dzi, eye nàtso afia na ame dzɔdzɔe la, ne nàɖo eteƒe nɛ ɖe eƒe dzɔdzɔenyenye nu.+ 33  “Ne wò dukɔ Israel ƒe futɔwo si wo, le esi wole nu vɔ̃ wɔm ɖe ŋuwò atraɖii ta,+ eye wotrɔ va gbɔwò, eye wokafu wò ŋkɔ,+ do gbe ɖa bia be nàve yewo nu le aƒe sia me la,+ 34  ekema nàsee le dziƒo, eye nàtsɔ wò dukɔ Israel ƒe nu vɔ̃ la ake, eye nàkplɔ wo agbɔe va anyigba si nètsɔ na wo tɔgbuiwo la dzi.+ 35  “Ne dziƒowo nu tu, ale be tsi megale dzadzam o,+ le esi wole nu vɔ̃ wɔm ɖe ŋuwò atraɖii ta,+ eye wotrɔ mo ɖe teƒe sia do gbe ɖa hekafu wò ŋkɔ, eye wotrɔ tso woƒe nu vɔ̃wo me le esi nèbɔbɔ wo ɖe anyi* ta la,+ 36  ekema nàsee le dziƒo, eye nàtsɔ wò subɔlawo, wò dukɔ Israel, ƒe nu vɔ̃ ake, elabena àfia mɔ+ nyui si dzi woato la wo; eye nàna tsi nadza ɖe wò anyigba+ si nètsɔ na wò dukɔ wòzu woƒe domenyinu la dzi. 37  “Ne dɔ to le anyigba la dzi,+ dɔvɔ̃ va, nukuwo hlɔ̃ alo dze heteku,+ ʋetsuviwo alo ʋetsuvi gblẽnuwo do; ne woƒe futɔwo ɖe to ɖe wo le woƒe du aɖe me le anyigba la dzi,* alo ne dɔvɔ̃ bubu ɖe sia ɖe ƒomevi alo dɔléle aɖe ɖe fu na wo la,+ 38  gbe ka kee ame aɖe alo wò dukɔ Israel blibo la ado ɖa o, amenuveve+ ka kee woabia o, (elabena wo dometɔ ɖe sia ɖe nya vevesese si le dzi me nɛ)+ ne woke woƒe abɔwo me ɖo ɖe xɔ sia gbɔ la, 39  ekema nàsee le nɔwòƒe le dziƒo,+ eye nàtsɔ ake,+ eye nàwɔ edzi; nàɖo eteƒe na ame sia ame ɖe eƒe zɔzɔme nu,+ elabena ènya eƒe dzi (wò ɖeka koe nya amegbetɔviwo katã ƒe dzi),+ 40  ne woavɔ̃ wò le ŋkeke siwo katã wole agbe le anyigba si nètsɔ na mía tɔgbuiwo la dzi. 41  “Eye ne amedzro aɖe hã, ame si metso wò dukɔ Israel me o, ke boŋ etso anyigba didi aɖe dzi va le wò ŋkɔ ta,+ 42  (elabena woase wò ŋkɔ gã+ la kple wò asi sesẽ kpakple wò abɔ si nèdo ɖa la ŋkɔ), eye wòva hetrɔ mo ɖo ɖe xɔ sia gbɔ do gbe ɖa la, 43  ekema nàsee le nɔwòƒe le dziƒo,+ eye nàwɔ nu siwo katã amedzroa bia wò la nɛ; ne anyigbadzidukɔwo katã nadze si wò ŋkɔ la,+ ne woavɔ̃ wò, abe ale si wò dukɔ Israel vɔ̃a wòe ene, ne woadze sii be, wò ŋkɔe woyɔ ɖe xɔ sia si metu la ŋu. 44  “Ne wò dukɔ ho aʋa ɖe woƒe futɔ aɖe ŋu le mɔ si dzi nèdɔ wo ɖo,+ eye wotrɔ mo ɖo ɖe du si nètia+ kple xɔ si metu na wò ŋkɔ+ la ŋu hedo gbe ɖa+ na wò, Yehowa la, 45  ekema nàse woƒe gbedodoɖa kple woƒe kokoƒoƒo be nàve yewo nu la le dziƒo, eye nàwɔ nu si sɔ la na wo. 46  “Ne wowɔ nu vɔ̃ ɖe ŋuwò (elabena amegbetɔ aɖeke meli si mewɔa nu vɔ̃ o),+ eye dzi ku wò ɖe wo ŋu, eye nèɖe asi le wo ŋu na futɔwo, eye woɖe aboyo wo yi futɔ la ƒe anyigba dzi, eɖanye didiƒe alo kpuiƒe o;+ 47  eye wonyɔ le wo ɖokuiwo me le anyigba si dzi woɖe aboyo wo yii la dzi,+ wotrɔ ɖe ŋuwò+ eye woɖe kuku be nàve yewo nu le ame siwo ɖe aboyo wo+ la ƒe anyigba dzi, gblɔ be, ‘Míewɔ nu vɔ̃, míeda vo; eye míewɔ nu tovo,’+ 48  eye wotrɔ ɖe ŋuwò kple woƒe dzi blibo+ kple woƒe luʋɔ* blibo le woƒe futɔ siwo ɖe aboyo wo la ƒe anyigba dzi, eye wotrɔ mo do ɖe anyigba si nètsɔ na wo tɔgbuiwo kple du si nètia kpakple xɔ si metu na wò ŋkɔ+ la ŋu hedo gbe ɖa na wò la, 49  ekema nàse woƒe gbedodoɖa kple woƒe kokoƒoƒo be nàve yewo nu la le nɔwòƒe le dziƒo,+ eye nàwɔ nu si sɔ la na wo, 50  eye nàtsɔ ake wò dukɔ si wɔ nu vɔ̃ ɖe ŋuwò la, eye nàtsɔ woƒe vo siwo katã woda ɖe ŋuwò la ake. Nàna woƒe nu nawɔ nublanui na ame siwo ɖe aboyo wo, ne woave wo nu+ 51  (elabena wò dukɔ kple wò domenyinu wonye,+ ame siwo nèkplɔ tso Egipte,+ tso galólokpo me).+ 52  Wò ŋkuwo nanɔ ʋuʋu ɖe wò subɔla ƒe kukuɖeɖe be nàve ye nu+ kple wò dukɔ Israel ƒe kukuɖeɖe be nàve yewo nu la ŋu, eye nàɖo to wo ɣesiaɣi si woyɔ wò.*+ 53  Elabena Oo Aƒetɔ Dziɖulagã Yehowa, wò ŋutɔe ɖe wo ɖe vovo le anyigbadzidukɔwo katã dome+ be woanye wò domenyinu, abe ale si nègblɔe to wò subɔla Mose dzi esime nèkplɔ mía tɔgbuiwo tso Egipte gbɔnae ene.” 54  Eye esi Salomo nya do gbe sia ɖa na Yehowa hebia amenuveve sia vɔ ko la, etso ɖe tsitrenu le Yehowa ƒe vɔsamlekpui la ŋgɔ, afi si wòdze klo ɖo heke eƒe abɔwo ɖo ɖe dziƒo.+ 55  Eye wòtso hekɔ gbe dzi sesĩe yra Israel ƒe ha blibo la katã gblɔ be: 56  “Woakafu Yehowa, ame si na gbɔɖemeƒe eƒe dukɔ Israel, abe ale si wòdo ŋugbee ene.+ Nya ɖeka pɛ hã medo kpo emevava le ŋugbe nyui siwo katã wòdo to esubɔla Mose dzi la me o.+ 57  Yehowa mía Mawu la nenɔ kpli mí, abe ale si ko wònɔ kple mía tɔgbuiwo ene.+ Megaɖe asi le mía ŋu alo agblẽ mí ɖi o.+ 58  Netrɔ míaƒe dzi ɖe eɖokui ŋu,+ be míazɔ le eƒe mɔwo katã dzi, eye míalé eƒe sededewo kple eƒe ɖoɖowo kpakple eƒe ʋɔnudrɔ̃ɖoɖo siwo wòtsɔ na mía tɔgbuiwo wònye sedede la me ɖe asi. 59  Eye nye nya siawo, siwo metsɔ ƒo koko na Yehowa be wòave nunye la, nanɔ Yehowa mía Mawu la ŋkume zã kple keli, ne wòadrɔ̃ ʋɔnu dzɔdzɔe na esubɔla kple eƒe dukɔ Israel gbe sia gbe, abe ale si wòhiã ene, 60  ne anyigbadzidukɔwo katã nadze sii be Yehowae nye Mawu vavã la.+ Ðeke megali o!+ 61  Eya ta mina miaƒe dzi naku ɖe Yehowa mía Mawu la ŋu bliboe,+ ne miazɔ le eƒe ɖoɖowo nu ahalé eƒe sededewo me ɖe asi, abe ale si wòle egbe sia ene.” 62  Eye fia la kple Israel blibo si le eŋu la sa vɔ gã aɖe le Yehowa ŋkume.+ 63  Salomo tsɔ nyi akpe blaeve vɔ eve kple alẽ akpe alafa ɖeka blaeve sa ŋutifafavɔ+ na Yehowa; ale fia la kple Israel-viwo katã kɔ Yehowa ƒe xɔ la ŋu.+ 64  Gbe ma gbe la, fia la kɔ xɔxɔnu si le Yehowa ƒe xɔ la ŋgɔ la titina ŋu, elabena afi mae wòatsɔ numevɔ kple nuɖuvɔ kpakple ŋutifafavɔawo ƒe amiawo+ asa vɔe le, elabena akɔblivɔsamlekpui+ si le Yehowa ŋkume la le sue akpa na numevɔsa kple nuɖuvɔsa kpakple ŋutifafavɔsawo ƒe amiawo. 65  Ɣemaɣi la, Salomo kple Israel blibo la ɖu ŋkekenyui+ la, wonye ha gã aɖe, tso Lebo-Hamat* va se ɖe Egipte-tɔʋu*+ la nu, le Yehowa mía Mawu la ŋkume ŋkeke adre eye woagaɖui ŋkeke adre bubu; wo katã le ŋkeke wuiene. 66  Le ŋufɔke* la, edo mɔ dukɔ la; eye woyra fia la hedzo yi woƒe aƒewo me kple dzidzɔ kpakple aseyetsotso le nu nyui+ siwo katã Yehowa wɔ na eƒe subɔla David kple eƒe dukɔ Israel la ta.

Etenuŋɔŋlɔ

Efia, Agbadɔŋkekenyui.
Egɔmeɖeɖe tẽe, “viwò si ado tso wò ali me.”
Alo, “eye ehavia ƒo fi dee.” Efia atam si ŋu fiƒode kpe ɖo nenye be alakpatam ye alo wogbe atam la dzi wɔwɔ.
Egɔmeɖeɖe tẽe, “eye fiƒode le edzi.”
Egɔmeɖeɖe tẽe, “esime fiƒode.”
Egɔmeɖeɖe tẽe, “be evɔ̃ɖi.”
Alo “nèwɔ fu wo.”
Egɔmeɖeɖe tẽe, “le anyigba la dzi le eƒe agbo nu.”
Alo, “nàɖo to wo le nu sia nu si wobia wò me.”
Alo, “Hamat ƒe dodonu.”
Egɔmeɖeɖe tẽe, “ŋkeke enyilia dzi,” si nye ŋkeke si kplɔ ŋkeke adre evelia la ɖo.