Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

1 Fiawo 5:1-18

EMENYAWO ƑE TOTOƉEME

  • Fia Hiram na xɔtunuwo (1-12)

  • Salomo ɖo dɔ sesẽ wɔlawo (13-18)

5  Esi Tiro-fia+ Hiram se be wosi ami na Salomo wòzu fia ɖe fofoa teƒe la, edɔ eƒe dɔlawo ɖe Salomo gbɔ, elabena Hiram nye David xɔlɔ̃ le eƒe agbenɔɣi katã.*+  Eya ta Salomo hã dɔ ame ɖo ɖe Hiram+ be:  “Ènyae nyuie be fofonye David mete ŋu tu xɔ na Yehowa eƒe Mawu la ƒe ŋkɔ o, le esi woho aʋa geɖe ɖe eŋu le goawo katã me ta, va se ɖe esime Yehowa tsɔ eƒe futɔwo de eƒe afɔ te.+  Ke azɔ la, Yehowa nye Mawu na gbɔɖemem godoo va kpe.+ Tsitretsiɖeŋula aɖeke meli o, eye vɔ̃ aɖeke hã meli o.+  Eya ta meɖoe be matu xɔ na Yehowa nye Mawu ƒe ŋkɔ, abe ale si Yehowa do ŋugbe na fofonye David ene be, ‘Viwò si matsɔ aɖo wò fiazikpui dzi ɖe tewòƒe lae atu xɔ na nye ŋkɔ.’+  Eya ta de se na wò amewo ne woatso sedertiwo nam le Lebanon.+ Nye subɔviwo awɔ dɔ kple wò subɔviwo, eye maxe home si nàdi be woaxe na wò subɔviwo la na wò, elabena wò ŋutɔ ènyae nyuie be mía dometɔ aɖeke menya atitsotso abe Sidontɔwo ene o.”+  Esi Hiram se Salomo ƒe nyawo la, dzi dzɔe ŋutɔ, eye wògblɔ be: “Woakafu Yehowa egbea, elabena ena vi nyanu David ɖe eƒe dukɔ gã sia nu!”*+  Eya ta Hiram dɔ ame ɖo ɖe Salomo, gblɔ be: “Mese gbe si nèɖo ɖem la. Mana woatso sedertiwo kple sesewutiwo abe ale si nèdi ene.+  Nye subɔviwo atsɔ wo tso Lebanon ava ƒu la nu, eye mabla wo tatata ato ƒu dzi ayi teƒe si nàɖo nam. Eye mana woatu ka wo le afi ma, ne nàva fɔ wo adzoe. Eye wò la, nu si medi be nàwɔ nam koe nye be, nàna nuɖuɖu nye aƒemetɔwo.”+ 10  Ale Hiram na sedertiwo kple sesewutiwo ale si nu Salomo di lae. 11  Salomo hã tsɔ lu kɔr* akpe blaeve na Hiram be wòanye nuɖuɖu na eƒe aƒemetɔwo hekpe ɖe amititsetse ƒe ami nyuitɔ* kɔr blaeve ŋu. Esiae Salomo naa Hiram ƒe sia ƒe.+ 12  Yehowa na nunya Salomo abe ale si wòdo ŋugbe nɛ ene.+ Eye ŋutifafa nɔ Hiram kple Salomo dome, eye wobla nu kple wo nɔewo. 13  Fia Salomo ɖo amewo dɔ sesẽ wɔlawoe le Israel katã; ame akpe blaetɔ̃ ye woɖo dɔ sesẽ wɔlawoe.+ 14  Eɖoa wo akpe ewoewo ɖe Lebanon ɣleti sia ɣleti. Wonɔa Lebanon ɣleti ɖeka, eye wonɔa aƒe ɣleti eve; eye Adoniram+ le dɔ sesẽ wɔlawo nu. 15  Agbatedɔwɔla* akpe blaadre kple kpekpala+ akpe blaenyi le Salomo si le towo dzi,+ 16  hekpe ɖe Salomo ƒe amegã dɔdzikpɔla akpe etɔ̃ alafa etɔ̃+ siwo nɔ dɔa nu la ŋu. 17  Eye fia la de se be woaɖe kpe gã siwo nye kpe xɔasiwo,+ ne woatsɔ kpe fufuwo+ aɖo xɔ la gɔme anyi.+ 18  Ale Salomo ƒe xɔtulawo kple Hiram ƒe xɔtulawo kpakple Gebaltɔwo+ trɔ asi le kpewo kple atiwo ŋu hena xɔ la tutu.

Etenuŋɔŋlɔ

Alo, “lɔ̃ David le eƒe agbenɔɣi katã.”
Alo, “eƒe dukɔ si me tɔwo sɔ gbɔ la nu.”
Kɔr ɖeka le lita 220. Kpɔ Megbenyawo B14.
Egɔmeɖeɖe tẽe, “amititsetse si woto ƒe ami.”
Alo, “Agbatsɔla.”